Փաստ ինֆո

ԵՊՀ հոգաբարձուների խորհրդի՝ կառավարության անդամ հանդիսացող 11 անձի դիմում է գրել իր անդամակցությունը դադարեցնելու համար։ Այս մասին «Փաստինֆո»-ի հետ զրույցի ժամանակ ասաց ԵՊՀ ուսանողական խորհրդի նախագահ Դավիթ Ափոյանը։

Նրա փոխանցմամբ՝ կառավարությունը ձևավորման առաջին իսկ օրվանից անընդհատ համալսարանի առջև ուլտիմատումներ է դրել, որ կա՛մ իրենց ուզածն է լինելու, կա՛մ էլ ոչինչ չի լինելու. «Այս սկզբունքն առկա է նրանց բոլոր գործողություններում։ Նախ՝ համալսարանին պարտադրեցին, որ պետք է իրենց ռեկտորի թեկնածուն լինի, փորձեցին ինչ-որ կերպ անցկացնել նրան և երբ հասկացան, որ չեն կարող, այնքան ձգձգեցին, որ խորհրդի լիազորությունների ժամկետը լրացավ։ Երբ խորհուրդը լուծարվեց, մեկ ամիս հետո պետք է այն ձևավորեին, բայց կարգի խախտումով՝ 4-5 ամիս հետո նոր խորհուրդը ձևավորեցին, հետո էլի ռեկտորի ընտրություն չկազմակերպեցին։ Դրանից հետո նոր օրենքի նախագիծ բերեցին, որով չափանիշները մեղմացնում են՝ իրենց ավելի հավատարիմ մարդ բերելու համար»,-ասաց Դավիթ Ափոյանը՝ ընդգծելով, որ իշխանության ներկայացուցիչների համար օրենքն ու իրավաբանությունը որևէ տեղ չեն զբաղեցնում, հետևաբար ավելորդ է խոսել այն մասին, որ նրանց հետաքրքրում են համալսարանական արժեքները։

«Նրանք թքած ունեն ամեն ինչի վրա։ Համալսարանը, արժեքները նրանց համար որևէ նշանակություն չունեն։ Կա՛մ պետք է ռեկտորի իրենց թեկնածուն լինի և շարժվի իրենց ասածով, կա՛մ պետք է ոչ մեկ չլինի ու քանդվենք»,-նշեց ԵՊՀ ՈւԽ նախագահը։

Դավիթ Ափոյանի կարծիքով իրենց անդամակցությունը դադարեցրած 11 անձանցից շատերն անգամ չգիտեին, թե ինչու են հոգաբարձուների խորհրդում գտնվում, նրանց պարզապես հրահանգավորել էին, որ գնան այնտեղ և ըստ իրենց ցուցումների այս կամ այն հարցի վերաբերյալ կողմ կամ դեմ դիրքորոշում հայտնեն. «Հիմա եկել է պահը, ասել են, որ դիմում պետք է գրեն ու դուրս գան, նրանք էլ արել են դա։ Ո՛չ այսքան ժամանակ հոգատար վերաբերմունք են դրսևորել, ո՛չ էլ հետաքրքրվել են համալսարանի հարցերով, որ այս հարցի շուրջ էլ սկզբունքայնություն դրսևորեին և աչքերը փակ չենթարկվեին։ Ինչքան միամիտ պետք է լինել, որ մտածեն, թե 11 անձ առավոտյան արթանացավ ու պատահական դիմում գրեց»,-ասաց Դավիթ Ափոյանը։

Ընդհանուր առմամբ ԵՊՀ հոգաբարձուների խորհուրդն ունի 32 անդամ, որից 16-ին ընտրում է կառավարությունը։ Նրանցից 11-ն այսօր հրաժարական տվեցին, այդ թվում ԿԳՄՍ փոխնախարարներ Ժաննա Անդրեասյանն ու Արթուր Մարտիրոսյանը, «Հայաստան» համահայկական հիմնադրամի տնօրեն Հայկակ Արշամյանը։ Կառավարության կողմից ընտրված 5 անդամները, ինչպես նաև 16 համալսարանականները շարունակում են իրենց գործունեությունը. «Ներկա պահին ունենք 21 անդամ, բայց հոգաբարձուների խորհուրդը պետք է լուծարվի, եթե խորհրդի կեսից ավելին փոփոխվում է։ Իմ կարծիքով նրանք պայքարում են հենց դրա համար, որ կեսից ավելին փոփոխվի, որպեսզի վերակազմավորում լինի։ Հույսն ունեմ, որ այն մարդիկ, որոնք դեռ չեն ստորագրել, սկզբունքայնություն և գաղափար ունեն, գիտակցում են իրենց վրա դրված պատասխանատվությունը և չեն գնա այդ քայլին ու չեն ստորագրի»,-ասաց ԵՊՀ ՈւԽ նախագահը։

Աղբյուր` Փաստինֆո