Փաստ ինֆո

ՀՀ նախկին գլխավոր դատախազ Գևորգ Կոստանյանի նկատմամբ քրեական հետապնդումը դադարեցնելու մասին միջնորդություն է ներկայացվել՝ հանցակազմի բացակայության հիմքով: Այս մասին «Փաստինֆո»-ն տեղեկացավ փաստաբան Գևորգ Գևորգյանից:

Նշենք, որ մարտի 26-ին ՍԴ-ն հակասահմանադրական է ճանաչել ՀՀ քրեական օրենսգրքի 300.1-րդ հոդվածը, ինչի հիման վրա ՀՀ երկրորդ նախագահ Ռոբերտ Քոչարյանի, ՀՀ ԶՈՒ ԳՇ նախկին պետ Յուրի Խաչատուրովի, ՊՆ նախկին նախարար Սեյրան Օհանյանի և ՀՀ նախկին փոխվարչապետ Արմեն Գևորգյանի նկատմամբ քրեական հետապնդումը դադարեցվել է՝ հանցակազմի բացակայության հիմքով, իսկ այդ մասով քրեական գործի վարույթը կարճվել է: Այլ խոսքով՝ ՀՀ քրեական օրենսգրքի 300.1-րդ հոդվածի հատկանիշներով նրանք արդարացվել են:

Փաստաբան Գևորգ Գևորգյանի դիտարկմամբ՝ Գևորգ Կոստանյանի նկատմամբ իրականացվող քրեական հետապնդումը նույնպես ենթակա է դադարեցման՝ արդարացնող հիմքով, իսկ խափանման միջոց կալանավորումը՝ վերացման, քանի որ ենթադրյալ սահմանադրական կարգի տապալումը հանդիսանում է Գևորգ Կոստանյանին մեղսագրված արարքների հանցակազմերի պարտադիր հատկանիշ, որի բացակայությունն ինքնին վկայում է Կոստանյանի արարքներում հանցագործության հանցակազմի բացակայության մասին: Մասնավորապես՝ սահմանադրական կարգի տապալումը հակասահմանադրական ու անվավեր ճանաչելու պայմաններում սահմանադրական կարգի ենթադրյալ տապալումն իբրև թե թաքցնելն ինքնին դադարում է քրեորեն պատժելի արարք հանդիսանալուց: Բացի դա՝ միջնորդության հիմքում դրվել է նաև Ինտերպոլից ստացված գրությունը, համաձայն որի՝ Ինտերպոլի գլխավոր քարտուղարությունը մերժել էր Գևորգ Կոստանյանի նկատմամբ հետախուզում հայտարարելու ՀՀ իրավապահների պահանջը՝ գտնելով, որ քաղաքական հետապնդում է իրականացվում և, դիմել Ինտերպոլի միջազգային ստորաբաժանումներին՝ հորդորելով իրենց տվյալների բազայից հեռացնել Կոստանյանի վերաբերյալ տվյալները։ Այլ խոսքով՝ միջնորդության հիմքում դրվել է նաև Կոստանյանի նկատմամբ իրականացվող ապօրինի քրեական հետապնդման հանգամանքը, որը հաստատվել է նաև Ինտերպոլի կողմից: Նշենք, որ միջնորդությունը ներկայացվել է ապրիլի 7-ին:

Ինչպես ավելի վաղ հայտնել ենք՝ ԱԺ անկախ պատգամավոր Թագուհի Թովմասյանը հրապարակել էր աղմկահարույց փաստաթղթեր առ այն, որ Ինտերպոլի գլխավոր քարտուղարությունը մերժել է Գևորգ Կոստանյանի նկատմամբ հետախուզում հայտարարելու ՀՀ իրավապահների պահանջը՝ գտնելով, որ քաղաքական հետապնդում է իրականացվում և, դիմել Ինտերպոլի միջազգային ստորաբաժանումներին՝ հորդորելով իրենց տվյալների բազայից հեռացնել Կոստանյանի վերաբերյալ տվյալները։ Նշված հանգամանքը քննության առարկա է դարձվել Վերաքննիչ քրեական դատարանում՝ Գևորգ Կոստանյանի նկատմամբ ընտրված խափանման միջոց կալանավորումը վերացնելու մասին միջնորդությունը մերժելու որոշման դեմ բողոքի շրջանակներում, ինչը փաստորեն ևս մերժվել է:

Ինչ վերաբերում է Վերաքննիչ դատարանի որոշմանը, ապա փաստաբանը նշեց, որ դատարանը կայացրել է ակնհայտ ապօրինի որոշում:

«Այսինքն՝ դատարանը հրաժարվել է Գևորգ Կոստանյանի նկատմամբ առանց որևէ ապացույցի, առանց որևէ իրավական կամ փաստական հիմքի կիրառված խափանման միջոց կալանավորումը վերացնելուց, այն դեպքում, երբ միջազգային հեղինակություն ունեցող կառույցը՝ Քրեական ոստիկանության միջազգային կազմակերպությունը (Ինտերպոլը) Գևորգ Կոստանյանի նկատմամբ իրականցվող քրեական հետապնդումը գնահատել է որպես անօրինական և քաղաքական »,- նշեց փաստաբանը՝ հավելելով, որ դատարանը հաշվի չի առել նաև այն հանգամանքը, որ ՍԴ-ն հակասահմանադրական է ճանաչել ՀՀ ՔՕ 300.1-րդ հոդվածը:

Հիշեցնենք, որ Գևորգ Կոստանյանին «Մարտի 1»-ի գործով որպես մեղադրյալ ներգրավելու մասին ՀՔԾ-ն հայտարարել է նոյեմբերի 25-ին, սակայն միայն 10 օր անց՝ դեկտեմբերի 5-ին, հայտարարվեց նրան մեղսագրվող հոդվածները։ Ըստ այդմ՝ նա մեղադրվում է ՀՀ քրեական օրենսգրքի 5 հոդվածով՝ 314-րդ հոդվածի 1-ին մասով, 38-308-րդ հոդվածի 2-րդ մասով, 38-314-րդ հոդվածի 1-ին մասով, 38-334-րդ հոդվածի 1-ին մասով և 38-349-րդ հոդվածի 3-րդ մասի 1-ին կետով, այսինքն՝ պաշտոնեական կեղծիք կատարելու, ծանր հետևանք առաջացնող պաշտոնեական լիազորությունների չարաշահման օժանդակման, պաշտոնեական կեղծիքի օժանդակման, ծանր կամ առանձնապես ծանր հանցագործության պարտակելը օժանդակելու և ծանր կամ առանձնապես ծանր հանցագործությունների վերաբերյալ գործերով ապացույցների կեղծմանը օժանդակելու համար ։

Գ.Կոստանյանի նկատմամբ հետախուզում հայտարարվելու մասին ՀՔԾ-ն հայտնեց 2019թ. նոյեմբերի 28-ին և քննիչը նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրեց դատարան, ինչը բավարարվել է 2019թ. դեկտեմբերի 4-ին։ ՌԴ իրավապահները մերժել են Գևորգ Կոստանյանի նկատմամբ հետախուզում հայտարարելու վերաբերյալ ՀՀ իշխանությունների պահանջը, իսկ 2021թ մարտի 16-ին հայտնի դարձավ, որ Կոստանյանի նկատմամբ հետախուզումը մերժել է նաև Ինտերպոլը։

Հեղինակ՝ Իզաբել Սահակյան

Աղբյուր` Փաստինֆո