Փաստ ինֆո

Սահմանադրական դատարանի 8 դատավորները, որ այդ որոշումները կայացրեցին, պատասխանատվություն կրու՞մ են, որ մեր հասարակությանը զերծ պահեցին՝ հասկանալու Մարտի 1-ի գործը բացահայտված էր, թե ոչ։ Լրագրողների հետ զրույցի ժամանակ այս մասին ասաց ԱԺ «Իմ քայլը» խմբակցության պատգամավոր Անդրանիկ Քոչարյանը։

Դիտարկմանը, որ ՍԴ դատավորներին իրենք են ընտրել, Անդրանիկ Քոչարյանն ասաց, որ ընտրել են 3 դատավորի, իսկ մյուս 5-ն այս խնդրին պատրաստված էին. «Եթե Ռոբերտ Քոչարյանին մեղադրեին խուլիգանության մեջ, այդ հոդվածն էլ կդիտվեր հակասահմանադրական։ Այս դատավորների տրամաբանությունը դա է։ Ո՞վ է փորձաքննության ենթարկելու իրենց կայացրած որոշումը՝ 300.1-ն իրոք հակասահմանադրակա՞ն է, թե՞ Հրայր Թովմասյանի ճաշակով է։ Չէ՞ որ այդ հոդվածը տարիներ շարունակ իրենք են դրել։ Սահմանադրությունն անընդհատ փոխում էին ըստ ճաշակի։ ՍԴ-ն պաշտպանեց Ռոբերտ Քոչարյանի և մնացածի շահերը։ Ի՞նչ մարտի 1-ի ժամանակ ոչինչ չի եղե՞լ, բանակ չի՞ օգտագործվել»,-ասաց Անդրանիկ Քոչարյանը։

Հարցին՝ իշխանությունը քաղաքական պատասխանատվություն չի՞ զգում, որ հայտարարում էին մարտի 1-ը բացահայտված է, բայց չի բացահայտվել, Անդրանիկ Քոչարյանն ասաց. «Մեզ զրկեցին, որ դուք էլ զգաք՝ բացահայտված է։ ՍԴ 8 անդամները, որոնցից երեքին մենք ենք ընտրել։ Ինձ հետաքրքիր է այդ երեքին, հատկապես Խունդկարյանին ինչու՞ ենք ընտրել։ Բա այսքան տարվա մեջ թող արտահայտվեր, որ 300.1-ը հակասում է Սահմանադրությանը։ Ներողություն, մենք սխալ ՍԴ անդամներ ենք ընտրել»,-ասաց պատգամավորը։

Աղբյուր` Փաստինֆո