Փաստ ինֆո

ՀՀ-ում անկախ դատական իշխանություն ստեղծելու մեր պայքարը չի ավարտվել։ Լրագրողների հետ զրույցի ժամանակ այս մասին հայտարարեց ՀՀ արդարադատության նախարար Ռուստամ Բադասյանը։

Դիտարկմանը, որ ամենաբարձր մակարդակով հայտարարվել էր՝ Մարտի 1-ը բացահայտված է, Ռուստամ Բադասյանը նկատեց՝ հիմա նոր հանգամանքներ և Սահմանադրական դատարանի որոշում ունեն. «Ես իմ մասով կարող եմ ասել, որ պատասխանատու եմ դատաիրավական ոլորտի բարեփոխումների համար։ Քննադատության հիմնական թիրախը կայանում է նրանում, որ վեթթինգ չի կատարվել։ ՀՀ-ում անկախ դատական իշխանություն ստեղծելու մեր պայքարը չի ավարտվել։ Անձնապես իմ պայքարը չի ավարտվել՝ ինչ կարգավիճակով էլ դա լինի»,-ասաց նախարարը։

Անդրադառնալով հարցին՝ համարու՞մ է, որ ունենք անկախ ՍԴ այն փոփոխություններից հետո, որոնք իշխանություններն իրականացրեցին, Ռուստամ Բադասյանն ասաց. «Երբ ՍԴ-ի ճգնաժամն առաջացավ, մեկնաբանվել է, թե ինչ ասել է ճգնաժամ։ Ճգնաժամը նրանում էր կայանում, որ ՍԴ-ում կային դատավորներ, որոնք փաստացի ունեին տարբեր կարգավիճակներ։ ՍԴ-ի ճգնաժամը, որի լուծման կապակցությամբ դիմեցինք Վենետիկի հանձնաժողովին, ստացանք իրավական կարծիք, վերաբերում էր այդ ճգնաժամի հաղթահարմանը։ Ես անընդհատ շեշտում էի, որ դատական համակարգում կան խորքային խնդիրներ և ՍԴ-ն ընդամենը մեկ կոմպոնենտ էր՝ միտված այդ ճգնաժամի հաղթահարմանը»,-ասաց Ռուստամ Բադասյանը։

Հարցին՝ 300.1 հոդվածով Ռոբերտ Քոչարյանի և մյուսների նկատմամբ քրեական հետապնդումը վերացնելու որոշումը դատական համակարգում փոփոխությունները ձախողելու՞ հետևանք է համարում, նախարարն ասաց, որ ցանկացած մեկնաբանություն կարող է լինել. «Մինչև այդ գործի քննությունը, երբ որոշ պատասխանատուներ ասել են, որ հիմա ունենք անկախ դատական իշխանություն, ես ասել եմ, որ մոտ էլ չենք անկախ դատական իշխանության սկզբունքին։ Խորքային պրոբլեմներ կան քրեական, վարչական, քաղաքացիական գործերով բոլոր մակարդակներում։ Հայաստանում լուրջ խնդիր կա գործարար միջավայրի առումով, որոնք առնչվում են դատական համակարգին, քաղաքացիական վեճերի քննության առումով։ Շարունակում ենք արձանագրել, որ կան լրջագույն խնդիրներ, որոնց լուծումը տեսել եմ դատաիրավական բարեփոխումների ռազմավարությամբ, մի շարք օրենսդրական նախաձեռնություններով»,-ասաց Ռուստամ Բադասյանը։

Ինչ վերաբերում է հարցին՝ իշխանությունները չէ՞ին շտապում, երբ հայտարարում էին, որ Մարտի 1-ը բացահայտված է՝ հաշվի առնելով դատական ոլորտի խնդիրները, նախարարը նշեց՝ պարզաբանվել է, թե ինչ նկատի ունեին, երբ ասում էին Մարտի 1-ի բացահայտում.

«Բացահայտված են այն դերակատարները, որոնք որոշումներ են կայացրել, որոնց արդյունքում Երևանում ինչ է տեղի ունեցել։ Բնականաբար դա չէր նշանակում, որ մենք դատական ակտ ենք կայացնում, պարզաբանվել է, թե ինչ է նշանակում բացահայտում։ Այսինքն ինչ հանգամանքներ կան, որ ի հայտ են եկել գործի քննության ընթացքում»,-ասաց Ռուստամ Բադասյանը։

Աղբյուր` Փաստինֆո