Փաստ ինֆո

«Խոսելով Թուրքիայի հետ հարաբերությունների վերանայման մասին, մենք պետք է հասկանաք, արդյո՞ք Թուրքիան պատրաստ է դրանք վերանայել», - «Փաստինֆո» -ի հետ զրույցում ասաց Արցախի արտգործնախարար Դավիթ Բաբայանը:

Հիշեցնենք, որ ԱԽՔ Արմեն Գրիգորյանը Հանրային հեռուստաալիքին տված հարցազրույցի ժամանակ, ձեռնպահ էր մնացել Թուրքիային թշնամի երկիր ներկայացնելու գնահատականից՝ նշելով, թե Թուրքիայի նկատմամբ մեր մոտեցումներում որոշակի շտկումներ պետք է լինեն, քանի որ տարածաշրջանում զարգացումներ են տեղի ունենում:

ԱՀ արտգործնախարար Դավիթ Բաբայանը արձանագրել է, եթե մենք ուզում ենք բարելավել հարաբերությունները այս կամ այն երկրի հետ, նախ պետք է հասկանանք ՝ արդյո՞ք այդ երկիրը պատրաստ է կարգավորել հարաբերությունները:

«Կարևոր է հասկանալ, եթե Թուրքիան պատրաստ է, ապա ինչ պայմաններով: Այդ պայմաններն ընդունելի՞ են մեզ համար: Ի վերջո, պետք է հաշվի առնել, որ դրանք պետք է ընդունելի լինեն տարբեր ոլորտներում ՝ անվտանգություն, պատմություն, հումանիտար ոլորտում և այլն: Մենք համաձայն ենք դրան գնալ, թե ոչ: Պատրա՞ստ ենք ծաղկեպսակ դնել Աթաթուրքի գերեզմանին: Նրանք ծաղիկներ կդնեն 1915 թվականի Հայոց ցեղասպանության զոհերի հուշարձանին: Այսինքն` մի բան է այս կամ այն երկրի հետ հարաբերությունները բարելավելու ցանկություն ունենալը, և մեկ այլ բան ՝ ունենք մենք նման հնարավորություն և նման ցանկություն մյուս պետության կողմից: Ի վերջո, եթե մեկ այլ պետություն չի ցանկանում, կամ ունի այլ պահանջներ, դրանից ոչինչ չի ստացվի: Բոլորս տեսանք, թե ինչպես է Թուրքիան մասնակցում պատերազմին Ադրբեջանի կողմից: Եվ հենց Թուրքիայի շնորհիվ է, որ մենք կորցրել ենք մեր տարածքների 80% -ը, այսքան անմեղ զոհեր ունեցանք», - նշել է Դավիթ Բաբայանն ու ավելացրել. « Եթե մենք պատրաստ ենք այս ամենին, ապա սա մեկ իրականություն է և մեկ ապագա»:

Դ. Բաբայանի գնահատմամբ` եթե Թուրքիան պատրաստ չէ մոռանալ անցյալը, իսկ մենք պատրաստ ենք, ապա մեր ապագան շատ խոցելի կլինի:

Թուրքիայի նախագահ էրդողանը նախօրեին հայտարարել էր, թե պատրաստվում է այցելել Շուշի: Արցախի արտգործնախարարի կարծիքով` Էրդողանի առաջիկա այցը Շուշի պատահական չէ:

«Թուրքիան պատահական գործողություններ չի անում, և Ադրբեջանը` նունպես: Ցավոք, նրանք ունեն շատ լավ կայացած պետական համակարգ և աշխարհաքաղաքական պայքարի շատ արդյունավետ համակարգ: Սա, ըստ էության, ուղերձ է մեզ և այլ երկրներին, ինչպես նաև նրանց իրական մտադրությունների մարմնացում », - շեշտել է Դ. Բաբայանն ու ընդգծել, որ Ղարաբաղյան հիմնախնդիրը դեռ լուծված չէ ՝ չնայած այն բանին, որ Ադրբեջանի նախագահը հակառակն է հայտարարում:

«Բնականաբար, այս հարցը չի լուծվել: Հակառակ դեպքում Բաքուն կճանաչեր Լեռնային Ղարաբաղի Հանրապետության անկախությունը:

Էրդողանի այցերը, պանթյուրքիստական գործունեությունը, ահաբեկչական, հակահայկական հռետորաբանությունը հստակ ցույց են տալիս, որ այս հարցը իրականում լուծված չէ: Եվ բոլոր այն հակասությունները, որոնք կային նախկինում, մնացել են:

Բանակցային գործընթացը պետք է վերսկսվի: Բաքուն ամեն կերպ խուսափում է դրանից: Այժմ գլխավորը տարածաշրջանում խաղաղության և կայունության պահպանումն է, ինչը Ռուսաստանի խաղաղապահ առաքելությունը ապահովում է շատ բարձր մակարդակով: Մնացածը ժամանակի հարց է », - եզրափակել է Բաբայանը:

Հեղինակ՝ Անի Մշեցյան

Աղբյուր` Փաստինֆո