Փաստ ինֆո

Գորիսի համայնքապետ Առուշ Առուշանյանի գործով տեսաերիզի զննություն է իրականացվել, որով տուժողներից մեկի պատմածն ամբողջությամբ հերքվում է։ Այս մասին «Փաստինֆո»-ի հետ զրույցում ասաց Առուշ Առուշանյանի պաշտպան Արմեն Մելքոնյանը։

«Տեսաերիզում ոչինչ չի երևում, միայն ուրվագծեր են երևում, իսկ երևացող ուրվագծերի վերաբերյալ էլ, այն, ինչ տուժողը նշում է, որ բացարձակ իրականության հետ աղերս չունի, բոլորովին այլ շարժումներ են»,- նշեց փաստաբանը՝ տեղեկացնելով, որ վարույթն իրականացնող մարմնին միջնորդություն է ներկայացրել՝ նոր փորձաքննություն նշանակելու վերաբերյալ, ինչը մերժվել է։

Քրեական գործի շրջանակներում Առուշ Առուշանյանի մասնակցությամբ այլ քննչական գործողություններ չեն եղել, հարցաքննվել են գործով երկու մեղադրյալները։ Ինչ վերաբերում է շրջանառվող տեղեկություններին, որ Գորիսի համայնքապետի գործով քննիչն այցելել է ԲԴԽ անդամ Գագիկ Ջհանգիրյանին, փաստաբանը զերծ մնաց այս փուլում դիրքորոշում հայտնելուց, թե արդյոք քննիչին բացարկ հայտնելու կամ վերջինիս կարգապահական պատասխանատվության հարց կբարձրացվի, թե ոչ՝ նշելով, որ այդ տեղեկությունները նոր են ստացել և այս պահին զերծ կմնա այդ հարցով մեկնաբանություն տալուց։

Հիշեցնենք, որ Առուշ Առուշանյանը ձերբակալվել է Սյունիքի անվտանգության վերաբերյալ հարցադրումները բարձրացնելուց հետո։ Երեւանի ընդհանուր իրավասության դատարանը դեկտեմբերի 22-ին ոչ իրավաչափ է համարել Առուշ Առուշանյանի ձերբակալությունը ու ազատ արձակվել ու մինչ ՁՊՎ-ում ձեւակերպում էին Առուշանյանին ազատ արձակելու փաստաթղթերը՝ ՀՀ քննչական կոմիտեն հայտարարեց, թե որոշում է կայացվել Առուշանյանին որպես մեղադրյալ ներգրավելու մասին։ Իսկ 2020թ դեկտեմբերի 24-ին Երևանի ընդհանուր իրավասության դատարանը՝ դատավոր Ռոբերտ Պապոյանի նախագահությամբ, մերժել է Առուշ Առուշանյանի նկատմամբ կալանավորումը որպես խափանման միջոց ընտրելու մասին ՔԿ ՀԿԳ պետի տեղակալ Արսեն Գեղամյանի միջնորդությունը՝ կալանավորման հիմքերի բացակայության պատճառով։ Առուշանյանի նկատմամբ որպես խափանման միջոց է կիրառվել գրավը՝ 2 մլն դրամի չափով։

ՔԿ-ն նրան մեղադրում է ՀՀ քրեական օրենսգրքի 308-րդ հոդվածի 1-ին մասով՝ պաշտոնեական լիազորությունները չարաշահելու, 38-188-րդ հոդվածի 3-րդ մասի 1-ին կետով՝ ապօրինի ձեռնարկատիրություն կազմակերպելու, 38-291-րդ հոդվածի 2-րդ մասով՝ ընդերքի պահպանման և օգտագործման կանոնները խախտելու, 34-322-րդ հոդվածի 2-րդ մասով՝ ինքնիրավչության փորձի, որը կատարվել է բռնություն գործադրելով, 113-րդ հոդվածի 2-րդ մասի 3-րդ և 6-րդ կետերով՝ մի խումբ անձանց կամ կազմակերպված խմբի կողմից խուլիգանական դրդումներով առողջությանը միջին ծանրության վնաս պատճառելու և 34-225.1-րդ հոդվածի 1-ին մասով՝ օրենքով սահմանված կարգի խախտմամբ հավաք կազմակերպելու և անցկացնելու փորձի հատկանիշներով։

Բացառությամբ հավաքներ կազմակերպելու փորձի վերաբերյալ քրեական գործի՝ մյուս դրվագներով քննություն արդեն տևական ժամանակ է, կատարվում է։ Որպես մեղադրյալ ներգրավելու մասին որոշման համաձայն՝ Ա.Առուշանյանն իր ընտանիքին պատկանող մեկ այլ ՍՊ ընկերությունում 2020թ. հունվար-փետրվար ամիսներին կատարված գույքագրմամբ արձանագրված շուրջ 33,000,000 ՀՀ դրամ պակասորդի վերաբերյալ պարզաբանումներ ստանալու և պատճառված վնասը հատուցելուն հարկադրելու նպատակով 2020թ. փետրվարին ընկերության պահեստ է կանչել ՍՊ ընկերության աշխատակցին և վերջինիս հետ հանդիպման ընթացքում ֆիզիկական բռնություն գործադրելով և բռնություն գործադրելու սպառնալիքով, որպես պատճառված ենթադրյալ վնասի դիմաց փոխհատուցման միջոց՝ աշխատակցից պահանջել է իրեն տրամադրել նրան պատկանող «Նիսսան պայտֆայնդեր» մակնիշի ավտոմեքենան, բանկում գրավադնել կնոջ հարազատներին պատկանող բնակարանը և ստացած վարկային միջոցները տրամադրել իրեն։

Աղբյուր` Փաստինֆո