Փաստ ինֆո

Սա աննախադեպ հակաժողովրդական նախագիծ է և սահամանափակում է խոսքի ազատությունը: Այս մասին «Փաստինֆո»-ի հետ զրույցում ասաց «Բարգավաճ Հայաստան» խմբակցության պատգամավոր Նաիրա Զոհրաբյանը՝ անդրադառնալով ԱԺ-ի կողմից ընդունված՝ ԱԺ փոխնախագահ Ալեն Սիմոնյանի հեղինակած նախագծին։

Հիշեցնենք, որ հեղինակի առաջարկով փոփոխություններ են կատարվել ՀՀ քաղաքացիական օրենսգրքում, որով աննախադեպ մեծ ծավալների է հասցվել զրպարտության և վիրավորանքի համար նախատեսված տուգանքի չափը: Մասնավորապես՝ առաջարկվում է վիրավորանքի դեպքում սահմանել մինչև 5 մլն փոխհատուցում, իսկ զրպարտության դեպքում՝ մինչև 10 մլն:

Զոհրաբյանը վստահեցնում է, որ բացարձակ մանիպուլյացիա է, թե նախագիծը կապ ունի զրպարտանքի և վիրավորանքի հետ, նախագծի նպատակն է լռեցնել իշխանությանը քննադատող քաղաքացիներին և լրատվամիջոցներին.

« Նախագիծը մեկ խնդիր է հետապնդում, փակել բոլոր նրանց բերանները, ովքեր կհամարձակվեն քննադատել իշխանությանը: Այն հատկապես նախընտրական փուլի համար է երկնված: Արցախի հանձնումից, Արցախի դավաճանական կապիտուլյացիայից խոսելը իշխանության գրպանի դատարանները կորակեն որպես զրպարտություն և վիրավորանք, և քաղաքացիների, լրատվամիջոցների վզին կկախեն ծանրագույն տուգանքները»,-ասաց պատգամավորը:

Զոհրաբյանը տեղեկացրեց, որ արդեն իսկ դիմել է Վենետիկի հանձնաժողով, Եվրոպայի խորհրդի մարդու իրավունքների հանձնակատարին.

«Նրանց ներկայացրել եմ, որ նման անհամաչափ տուգանքներով, որոնք ուղղակի անհամատեղելի են Հայաստանում նվազագույն աշխատավարձի հետ, փորձ է արվում ճնշել ազատ խոսքը: Ամենազարհուրելին այն է, որ այս ամենի նախաձեռնողը լրագրող վարչապետն է»,-ասաց զրուցակիցը:

Զոհրաբյանը համոզված է, որ նախագիծը սահմանափակում է մարդու իրավունքները, և սրանով զսպելու են մարդու խոսքը, մարդու ազատ արտահայտվելու իրավունքը՝ անհամաչափ տուգանքներ կիրառելով.

«Սա ուղղակի զսպաշապիկ է բոլոր բերանին: Սա նաև լրատվամիջոցների դեմ մահակ է, նրանց զրկում է ազատ խոսքը արտահայտելու իրավունքից»,-ասաց Նաիրա Զոհրաբյանը:

Պատգամավորը վստահ է, որ նախագահը ստորագրելու է այս նախագիծը.

«Նա ստորագրում է այն ամենը, ինչ դեմ է տալիս Նիկոլ Փաշինյանը»,-եզրափակեց զրուցակիցը:

Աղբյուր` Փաստինֆո