Փաստ ինֆո

Գերիների և անհետ կորած զինծառայողների հարազատների հետ խոսում են սպառնալիքի լեզվով, - այդ մասին «Ռեվյու» հաղորդաշարի եթերում ասել է ՀՀ ԱԺ աշխատակազմի նախկին ղեկավար- գլխավոր քարտուղար Արա Սաղաթելյանը:

Ըստ նրա՝  այդ մասին վկայում են այն փաստերը, որ գերիների և անհետ կորած զինծառայողներն հարազատները գալիս էին հանրահավաքների՝ խնդրելով դադարեցնել միջոցառումը, հակառակ դեպքում իրենց երեխաները կարող են գերի մնալ:

«Գերիները վաղուց գտնվում են Ադրբեջանում և վաղուց անցել են նրանց հետ բերելու բոլոր ողջամիտ ժամկետները: Բայց նրանց հարազատները լռում են: Նրանք գտնվում են անորոշության մեջ, հարազատներին համոզում են, որ իրենց երեխաներին բերելու ուղղությամբ քայլեր են ձեռնարկվում: Բայց մի օր նրանց սուտը բացահայտվելու է, գերիների հարազատների մեջ կա մի մեծ զանգված, որը շատ դժգոհ է: Եվ այդ դժգոհ մարդիկ դուրս են գալու փողոց», - շեշտել է նա:

Նրա դիտարկմամբ՝ այսօր Բաքուն կարող է ցանկացած բան պահանջել, քանի որ ի դեմս նրա Հայաստանի պետություն չի տեսնում: Սաղաթելյանի խոսքով այսօրվա դրությամբ մենք չգիտենք անգամ գերիների իրական թիվը և դա սարսափելի է:

«Ստեղծված իրավիճակում Բաքուն իրեն պահելու է շատ լկտի, քանի որ հաշվի չի նստում Հայաստանի գործող իշխանության հետ, և կիրառելու է փափուկ ուժ՝ Հայաստանի և Սփյուռքի հանդեպ: Ադրբեջանի պահվածքը չի փոխվի, քանի դեռ Հայաստանի վարչապետն է Նիկոլ Փաշինյանը»,- նկատել է բանախոսը եւ հավելել, որ Ադրբեջանին և Թուրքիային ձեռնտու է Փաշինյանը, որպես ղեկավար, քանի որ նա կարողանում է պառակտել հասարակությունը Հայաստանում:

Աղբյուր` Փաստինֆո