Փաստ ինֆո

Ռազմական դրությունը, իմ համոզմամբ ներդրվեց քաղաքական նկատառումներից ելնելով ՝ մասնավորապես խոսքի ազատությունը և ընդդիմության կամարտահայտման իրավունքը սահմանափակելու նպատակով, - այդ մասին «Ռեվյու» հաղորդաշարի եթերում ասել է ԱԺ աշխատակազմի նախկին ղեկավար-գլխավոր քարտուղար Արա Սաղաթելյանը:

Ըստ նրա՝ նպատակ էր դրվել արգելել տարբեր բողոքի միջոցառումների անցկացումը, բայց ընդդիմությունը կարողանում էր իրացնել իր իրավունքները: «Հիմա ռազմական դրությունը չեղարկվել է և անգամ իշխող խմբակցությունը կողմ է քվեարկել: Սակայն նաև ակնհայտ է, որ իրենք չունեն այդքան քաղաքական հոտառություն, որպեսզի ինքնուրույն առաջարկեն նման նախաձեռնություն և ընդդիմության առաջարկն էր,- նկատել է Սաղաթելյանը՝ արձանագրելով այն իրողությունը, որ այսօրվա դրությամբ մենք պատերազմական գործողությունների չենք մասնակցում, ռազմական դրության անհրաժեշտությունը չկա:

Ինչ վերաբերում իշխանության պնդումներին, թե Նիկոլ Փաշինյանի հրաժարականի համար հանրային պահանջ չկա՝ ընդգծել է, որ դա այդպես չէ:

«Չնայած այն փաստին, որ փողոցում շատ մարդ չի հավաքվում այդ պահանջը կա և դա շատ մեծ է: Այսօր փողոցում կարող է քիչ մարդ հավաքվել, վաղը՝ շատ: Փողոցային պայքարը արդյունք կունենա այն դեպքում, եթե փողոցում հավաքվի կրիտիկական հատված: Սակայն պետք չէ սպասել, որ Փաշինյանը կամ իր թիմակիցները կդրսեւորեն քաղաքական դիրքորոշում: Արդեն ակնհայտ է, որ եթե իրենք ունակ լինեին նման դիրքորոշում արտահայտելու, կհեռանային պարտությունից հետո»,- նկատեց Սաղաթելյանը՝ ավելացնելով, որ ընդդիմությունն ավելի շատ է մտածում երկրի վարկանիշի ու ժողովրդի մասին, քան իշխանությունները։

Աղբյուր` Փաստինֆո