Փաստ ինֆո

Կարծում եմ՝ այսօր նույնպես հնարավորություն կլինի Սերժ Սարգսյանին լսելու։ Կարծում եմ՝ հազարավոր աջակիցներին նա բնականաբար կմոտենա և ուղերձ կհղի։ Այս մասին լրագրողների հետ զրույցում ասաց ՀՀԿ փոխնախագահ Արմեն Աշոտյանը։

Նշենք, որ քիչ անց կմեկնարկի ՀՀ երրորդ նախագահ Սերժ Սարգսյանի և մյուսների գործով դատական նիստը։ Այս պահին Երևանի ընդհանուր իրավասության դատարանի Ավան նստավայրի բակում հավաքվել են երրորդ նախագահի աջակիցները։

Արմեն Աշոտյանը, որը ևս գտնվում է դատարանի բակում, լրագրողների հետ զրույցում ասաց, որ դատարանի բակի փողոցը նեղ է և հարմար չէ զանգվածային միջոցառման համար, բայց ամբողջ երկայնքով՝ մոտ 700 մ շղթա է, այսինքն՝ մի քանի հազար հոգի եկել են։ Աշոտյանի դիտարկմամբ՝ Սերժ Սարգսյանին աջակցությունը միայն այս գործի շրջանակներում չէ, որովհետև այս գործը ծիծաղելի է։ Աջակցությունը քաղաքական է, անձնական և գաղափարական։ Աշոտյանը նշեց, որ 2018թ իշխանազավթումից հետո Հանրապետականներն ի սկզբանե դիրքավորվել էին որպես ընդդիմություն, իսկ խորհրդարանական խայտառակ ընտրություններից հետո ընդդիմադիրների համար խրամատները պահել էին, դիրքավորվել էին։

«Ես շատ ուրախ եմ, որ մենք վաղուց մենակ չենք ընդդիմության խրամատներում, շատ տխուր եմ, որ դրա պատճառը սկզբից Նիկոլ Փաշինյանի միահեծան քաղաքականությունն էր, իշխանության զավթումը՝ բոլոր ճյուղերով, հետո Արցախի շուրջ բանակցային գործընթացի խայտառակ, իսկ այսօր արդեն կարող ենք ասել՝ դիտավորյալ տապալումն էր, հետո՝ կորոնավիրուսն էր և այդտեղից բխող ողբերգական հետևաքնքները»,-նշեց Աշոտյանը՝ հավելելով, որ պաշտոնական վիճակագրությամբ՝ կորոնավիրուսի հետևանքով նույնքան մարդ ենք կորցրել, որքան՝ Արցախյան երրորդ պատերազմում։ Աշոտյանի խոսքով՝ ցավալի է, որ որպես հասարակություն շատ արյունալի գին ենք վճարել հասկալու համար, որ իրականում 2018թ Սերժը ճիշտ էր, իսկ Նիկոլը սուտասան, խաբեբա և սխալ։ Աշոտյանը վստահություն հայտնեց առ այն, որ մոտ ապագայում թևավոր դարձած այդ դարձվածքի բացատրությունը կլսենք անձամբ Սերժ Սարգսյանից։

Աղբյուր` Փաստինֆո