Փաստ ինֆո

Վերաքննիչ քրեական դատարանը՝ դատավոր Լուսինե Աբգարյանի նախագահությամբ, հեռացել է խորհրդակցական սենյակ՝ «Գագիկ Սողոմոնյան» ֆեյքի գործով Արամ Լևոնի Սարգսյանին կալանավորելու որոշման դեմ բողոքի վերաբերյալ որոշում կայացնելու։ Այս մասին «Փաստինֆո»-ի հետ զրույցում հայտնեց Սարգսյանի պաշտպան Բենիկ Գալստյանը։

Դատարանի որոշումը կհրապարակվի մարտի 15-ին՝ ժամը 12։00-ին։ Նշենք, որ դատարանը խորհրդակցական սենյակ է գնացել մարտի 10-ին ,այսինքն՝ 5 օր կմնա խորհրդակցական սենյակում՝ մինչդատական վարույթի ընթացքում խափանման միջոցի գործով որոշում կայացնելու համար, ինչը բացառիկ երեւույթ է։

Հիշեցնենք, որ փետրվարի 21-ի գիշերը Երևանի ընդհանուր իրավասության դատարանը՝ դատավոր Վահագն Մելիքյանի նախագահությամբ, բավարարել է Արամ Սարգսյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը։ Դատարանը միևնույն ժամանակ մերժել է Սարգսյանին ձերբակալելու որոշման դեմ պաշտպանի բողոքը։

Նախաքննական մարմինն արգելանք է դրել նաեւ Սարգսյանի տեսակցությունների և հեռախոսազանգերի վրա, որը տարածվում է նաև ընտանիքի անդամների՝ կնոջ և մանկահասակ երեխաների վրա։
Փաստաբան Բենիկ Գալստյանը «Փաստինֆո»-ի հետ զրույցում հայտնեց, որ այդ արգելանքը դեռևս չի վերացվել։ Պաշտպանը հատկանշական համարեց այն հանգամանքը, որ Սարգսյանին կալանավորելուց հետո տեսակցությունների և հեռախոսազանգերի վերաբերյալ արգելք առկա չի եղել, այն առաջացել է փետրվարի 24-ին՝ օրվա երկրորդ կեսին, մինչդեռ՝ եթե քննչական մարմինն ունի քրեական գործից բխող նպատակներ, որ անձը չշփվի ինչ- որ անձի հետ, պետք է որ արգելքը դրվի առաջին օրը։

Փաստաբանի դիտարկմամբ՝ պարզ է դառնում, որ այդ արգելքը ձևական է և նպատակ է հետապնդում մարդու վրա ճնշում գործադրելու։

Պաշտպանը չի բողոքարկել արգելանք դնելու մասին քննիչի որոշումը, ինչպես նաև չի միջնորդել վերացնել այն, քանի որ գտնում է, որ դա անիմաստ է համարում, վստահ է, որ կմերժվեր, իսկ դատարան բողոքարկելու դեպքում դա ամիսներ կարող է տևել։ Բացի դա, փաստաբանն ընդգծեց, որ ԱԱԾ- չի կարող քննություն իրականացնել նշված գործով, իսկ քննչական մարմնի հետ պաշտոնական, փաստաթղթային շփման մեջ գտնվելու դեպքում որոշակի չափով կհաստատվի լեգիտիմությունը։ Փաստաբանը տեղեկացրեց, որ քննիչին բացարկի միջնորդություն է ներկայացրել՝ հիմնավորելով, որ հայտնի «Գագիկ Սողոմոնյան» օգտատերը ոչ միայն հայհոյախառն արտահայտություններ է կատարել ԱԱԾ տնօրենի հասցեին, այլև՝ կոնկրետ հանցագործության դեպքեր էր նկարագրում և այս պայմաններում նույն մարմինը քննում է գործ մի անձի վերաբերյալ, որը պարբերաբար հայհոյում է իրենց ղեկավարին, ուստի՝ արդեն իսկ նախատրամադրվածություն է ստեղծվում իր պաշտպանյալի նկատմամբ, որքան էլ, որ իր պաշտպանյալը «Գագիկ Սողոմոնյան» չլինի։ Գալստյանը նկատեց՝ նախատրամադրվածությունն ակնհայտ է դարձել արդեն իսկ առաջին օրը, երբ ձերբակալման որոշման դեմ բողոք է մուտքագրվել դատարան։

«Դատական նիստը նշանակվել էր ժամը 14։00-ին, գնացի բողոքի քննարկմանը, սակայն քննիչը չէր եկել՝ հեռախոսազանգով տեղեկացնելով, որ այլ քննչական գործողության է մասնակցում և, որ պաշտպանյալիս չեն կարող բերել, ընդ որում՝ պաշտպանյալս ոչ թե ԱԱԾ մեկուսարանում էր, այլ՝ ոստիկանության ՁՊՎ-ում։ Դատարանը չգիտես ինչու հետաձգեց նիստը, ըստ էության, չապահովվեց իմ պաշտպանյալի՝ դատարանի առջև կանգնելու իրավունքը։ Գնացի ԱԱԾ քննչական մարմին և արդեն իսկ այնտեղ տեղեկացա, որ իմ պաշտպանյալը ժամը 12։00-ից գտնվում է ԱԱԾ-ում։ Այսինքն՝ եթե անձին ՁՊՎ-ից բերել են ԱԱԾ, ողջամիտ է, որ կարող էին հասցնել ԱԱԾ» ,- նշեց Գալստյանը։

Ավելին՝ փաստաբանն ընդգծեց, որ ՀՀ-ում կա կառույց, որը քննում է համակարգչային ոլորտի հանցագործությունները, որը ՔԿ ՀԿԳ կիբերհանցագործությունների քննության առանձին վարչություն է։

«Իրենք ավելի մասնագիտացված են, գործից էլ երևում է, որ ԱԱԾ քննչական մարմինը չի հասկանում այս գործի էությունը, նույնիսկ ապացուցման շրջանակը չի կարողանում ընկալել»,- նշեց Գալստյանը՝ հավելելով, որ այս գործը պետք է քննի ՔԿ մասնագիտացված կառույցը, ԱԱԾ քննիչը չի կարող այս գործը քննել թե՛ մասնագիտական կարողությունների մասին, թե՛ որոշակի նախատրամադրվածության առումով։ Նրա խոսքով՝ յուրաքանչյուր անկողմնակալ դիտորդի համար պարզ է, որ իրենք օբյեկտիվ չեն կարող քննել գործը։

Բացի դա, առաջին ատյանի դատարանի որոշման կապակցությամբ ներկայումս ՀՔԾ-ում նյութեր են նախապատրաստվում, առկա է քրեական վարույթ, որի շրջանակներում պաշտպանը միջնորդել է պարզել դատավորների կապը՝ ԱԱԾ աշխատակիցների հետ։

«Այսինքն՝ առկա է  քրեական վարույթ, որով ԱԱԾ քննիչները կարող են լինել վկա, բացատրություն տվող անձ, ում հեռախոսը ՀՔԾ քննիչը կարող է վերցնել և ուսումնասիրել։ Այս պայմաններում այս գործն ԱԱԾ քննիչի վարույթում թողնելն աբսուրդ է »,- ասաց նա՝ հավելելով, որ այդ հիմքով ՄԻԵԴ-ում այս գործն ուղղակի «պայթելու» է, եթե անգամ դատարանում դատավճիռ կայացվի։

Ինչպես արդեն տեղեկացրել ենք՝ ԱԱԾ ծառայողները փետրվարի 19-ին խուզարկություն են իրականացրել վերլուծաբան Կարեն Բեքարյանի, ՀՀ ԱԺ աշխատակազմի նախկին ղեկավար Արա Սաղաթելյանի, ադրբեջանագետ Անժելա Էլիբեգովայի, սահմանադրագետ Գոհար Մելոյանի. քաղաքացի Մհեր Ավագյանի և Արամ Լ. Սարգսյանի աշխատասենյակներում, բնակարաններում, առգրավել հեռախոսներ և համակարգիչներ, ապա նրանց բերման ենթարկել: Անժելա Էլիբեգովան և Գոհար Մելոյանն ազատ են արձակվել՝ հրաժարվելով ցուցմունք տալուց, իսկ Կարեն Բեքարյանը, Արա Սաղաթելյանը, Մհեր Ավագյանը, Արամ Լ. Սարգսյանը ձերբակալվել են։ Նրանց ձերբակալման իրավաչափության հարցը վիճարկել են դատական կարգով, սակայն մինչ դատարանում կքննարկվեր ձերբակալման որոշման դեմ բողոքները, վարույթն իրականացնող մարմինը մեղադրանք է առաջադրել նրանց։ Կարեն Բեքարյանը և Մհեր Ավագյանն ազատ են արձակվել առաջին ատյանի դատարանի որոշմամբ, իսկ Արա Սաղաթելյանը՝ վերաքննիչ դատարանի։ Նշված գործիչների պարագայում դատարաններն արձանագրել են հիմնավոր կասկածի բացակայությունը։

Այս պահին գործով անցնող միակ անձը, որը գտնվում է անազատության մեջ, Արամ Սարգսյանն է։

Հեղինակ՝ Իզաբել Սահակյան

Աղբյուր` Փաստինֆո