Փաստ ինֆո

«Այն, որ քաղաքական իրավիճակը Հայաստանում, մեղմ ասած, անհասկանալի ընթացքի մեջ է, փաստ է: Ասեմ ավելին՝ իմ կարծիքով այդպես էր դեռևս 2018 թվականի մայիսից: Մենք ունեինք մի Ազգայի ժողով, որն իր մեջ ներառում էր բացարձակ մեծամասնություն, սակայն, ստացվեց այնպես, որ վարչապետ ընտրվեց փոքրամասնություն հանդիսացող ընդդիմության կողմից: Նման բան, երևի, ամբողջ աշխարհում չի եղել, դա աննախադեպ մի բան էր»,- ասում է Շիրակի պետական համալսարանի դասախոս

Արթուր Համբարձումյանը, «Փաստինֆո»-ի հետ զրույցում խոսելով ներքաղաքական դաշտի վերջին զարգացումների մասին:

Վերջինս հավելում է՝ քաղաքական անտրամաբանությունների շարքը շարունակվում է մինչ օրս. «Մենք ունենք մի նախագահ, որը երկրի Սահմանադրության թիվ մեկ երաշխավորն է, սակայն այդ Սահմանադրությունը նրա ամենաթողության արդյունքում, բազմաթիվ անգամներ խախտվել է և նա որևէ քայլ չի ձեռնարկել դա կանխելու կամ թույլ չտալու համար: Այդ նույն նախագահն արդեն իսկ պահանջել է գործող վարչապետի հրաժարականը, բայց, զարմանալիորեն, շարունակում է ստորագրել այն մարդու անօրինական հրամանների տակ, որի հրաժարականի և հեռացման հրապարակային պահանջով հանդես եկավ ինքը և այսպես շարունակ: Այս ամենն, արդեն, զավեշտի է վերածվել և ես սա մեծ ցավով եմ արձանագրում», - ասում է Արթուր Համբարձումյանը:

Անդրադառնալով նախագահ Սարգսյանի գործողություններին առ այն, որ հայտարարեց Օնիկ Գասպարյանին ԳՇ պետի պաշտոնից ազատելու հրամանագրի նախագծի հակասահմանադրականության մասին, բայց չդիմեց ՍԴ՝ բանախոսը , նկատում է՝ Գլխավոր շտաբի պետի հեռացման հրամանը Սահմանադրական դատարան ուղարկելուց առաջ, կարծեմ, նա հանդիպում ունեցավ ՀՀ-ում վարչապետ աշխատող անձի հետ, իսկ սա խոսում է այն մասին, որ այստեղ ներքին, կուլիսային պայմանավորվածություններ են եղել. «Հայաստանի ներքաղաքական կյանքում կուլիսային կյանքը երբեք այսքան ակտիվ չի եղել, որքան հիմա է: Այն, ինչ մենք տեսնում ենք քաղաքական կյանքում, իրականում 10 տոկոսն է այն ամենի, ինչ կատարվում է կուլիսների հետևում: Ինչ վերաբերում է նախագահի՝ Սահմանադրական դատարան դիմել – չդիմելու հարցին՝ պարզ է ու ակնհայտ, որ այս հարցի վերաբերյալ նա գաղտնի պայմանավորվածության է եկել վարչապետ աշխատող անձի հետ: Ի վերջո, ինչի՞ մասին է խոսքը, երբ Ազգային ժողովը, փաստացի, ղեկավարվում է թուրքական գործակալի կողմից և այնտեղ գործող երկու, այսպես կոչված, ընդդիմադիր խմբակցություններն այս ուղղությամբ որևէ քայլ չեն ձեռնարկում: Այստեղ տեղի է հիշել և հիշեցնել նաև այն մասին, որ ժամանակին ընդդիմադիր խմբակցության ղեկավարներից մեկը՝ Գագիկ Ծառուկյանը մեծ - մեծ հայտարարում էր՝ ով հետքայլ անի նա, մեղմ ասած, վատ տղա է…Հենց այս ամենի համար է, որ մեր զրույցի հենց սկզբից ասեցի՝ Հայաստանում ներքաղաքական կյանքը, մեղմ ասած, անհասկանալի է, իսկ ավելի կոնկրետ՝ արդեն շատ զավեշտալի»,-ասում է Շիրակի պետական համալսարանի դասախոսը:

Հարցին՝ ի՞նչ քայլեր պետք է ձեռնարկի Գլխավոր շտաբն ու դրա պետը, Հայաստանում ստեղծված ներքաղաքական այսպիսի իրավիճակում, Արթուր Համբարձումյանը պատասխանում է՝ մի բան է, երբ վարչապետի հրաժարականը պահանջում է, ասենք՝ Սպիտակ քաղաքի ղեկավարը, մեկ այլ բան է, երբ ասենք՝ ակադեմիական ինստիտուտներ են դա պահանջում, բայց բոլորովին այլ իրավիճակ է, երբ երկրի ղեկավարի հրաժարականը պահանջում է բանակն ու դրա փաստացի ղեկավարը, ընդ որում, հանդես գալով հստակ դիրքորոշմամբ. «Այդ հայտարարությունից հետո, երկրի ներսում, առնվազն, կոնկրետ գործողություններ պետք է կատարվեին, սակայն, այստեղ ևս հանգում ենք անհասկանալի և զավեշտալի երևույթների քննարկմանը:

Իսկ ավելի հստակ՝ Գլխավոր շտաբի հայտարարությանը որևէ կոնկրետ քայլ չհաջորդեց, որովհետև իշխանությունը անդրկուլիսյան ակտիվ վազվզուքների մեջ է: Եթե այս ամենին էլ գումարենք, որ Գլխավոր շտաբի հայտարարությունն, իրականում, շատ ուշացած և կիսատ էր, ապա գալիս ենք այն եզրահանգման, որ մենք ու մեր հայրենիքը, մեղմ ասած, հուսալի վիճակում չենք: Ասեմ ավելին, եթե մեր հրամկազմն իր բարձունքի վրա լիներ, վստահ եմ պատերազմ չէր լինի, իսկ եթե համատարած ամենաթողության արդյունքում մենք, այնուամենայնիվ, ունեցանք դավադիր պատերազմ, ապա կարող էինք, գոնե, խուսափել այսօրինակ նվաստացուցիչ և դավաճանական պարտությունից, եթե այդ նույն Գլխավոր շտաբը պատերազմի առաջին օրվանից, բառի բուն իմաստով, վնասազերծեր հողատու և գործակալ վարչապետին, ինչը ևս, ինչպես տեսանք, Գլխավոր շտաբը չարեց, ինչի արդյունքում մենք այսօր ունենք այն, ինչ ունենք»,- եզրափակելով զրույցն, ասում է Շիրակի պետական համալսարանի դասախոս Արթուր Համբարձումյանը:

Հեղինակ՝ Նվարդ Մանվելյան

Աղբյուր` Փաստինֆո