Փաստ ինֆո

Եթե նույնիսկ եղել է եռակողմ հանդիպում, ապա թշնամու շարժը Հայաստանի տարածքում պետք է խիստ վերահսկվեր և արգելվեր ամեն տեսակի նկարահանում։ «Փաստինֆո»-ի հետ զրույցի ժամանակ այս մասին ասաց անվտանգության հարցերի փորձագետ Արմեն Մանվելյանը՝ անդրադառնալով Սյունիքի մարզում ադրբեջանցիների կատարած տեսանկարահանումներին։

Հիշեցնենք, որ համացանցում տարածվել էր տեսանյութ, որում երևում էր՝ ինչպես են ադրբեջանախոս անձինք ավտոմեքենայից նկարահանում իրականացնում։ ՀՀ ԱԱԾ-ն պարզաբանում էր տարածել և նշել, որ այդ տեսանկարահանումը կատարել են Կապան համայնքի Սյունիք-Ճակատեն բնակավայրերի հատվածում մեկ ամիս առաջ կազմակերպված սահմանապահների եռակողմ աշխատանքային հանդիպմանը մասնակցելու նպատակով այնտեղ գտնվող ադրբեջանցի զինծառայողները՝ ռուս սահմանապահների ուղեկցությամբ և նախապես համաձայնեցված երթևեկության ընթացքում։

Փորձագետը նկատում է՝ առհասարակ նմանատիպ հանդիպումները պետք է չեզոք գոտիներում տեղի ունենան, այլ ոչ թե ՀՀ տարածքում։ Արմեն Մանվելյանի խոսքով այն փաստը, որ նրանք մտել են ՀՀ տարածք, ռուս խաղաղապահների ուղեկցությամբ շրջել և նկարահանումներ են արել, փաստում է այն մասին, որ հայկական կողմը չի վերահսկում իրավիճակը։ Փորձագետն ընդգծեց՝ պետք է տեսանկարահանումն արգելելու հստակ պահանջ դրվեր․ «Սա ևս մեկ անգամ ապացուցում է, որ գործ ունենք մի վարչակազմի հետ, որի համար ազգային անվտանգություն հասկացությունը երկրորդական, երրորդական նշանակություն ունի։ Փաստացի ադրբեջանցիները ոչ միայն մտել են Սյունիք, այլ բառիս բուն իմաստով պտտվել Սյունիքում։ Մինչ այդ էլ մի քանի անգամ տեղեկատվություն էր տարածվում, որ ադրբեջանցիները մտնում են քաղաք, բայց ամեն անգամ ԱԱԾ-ն հերքում էր։ Այս նկարահանումը փաստացի ցույց տվեց, որ այսօրվա իշխանություններին ընդհանրապես պետք չէ հավատալ։ Ամեն անգամ, երբ նրանք ինչ-որ բան հերքում են, նշանակում է՝ պետք չէ հավատալ։

Սա ոչ պրոֆեսիոնալ կազմակերպված աշխատանքի արդյունք է»,-նշեց Արմեն Մանվելյանը։

Հարցին՝ արդյոք ադրբեջանցիների այս քայլը հետախուզական բնույթի է, Արմեն Մանվելյանը նշեց, որ «Ռազմինֆո»-ն թարգմանել է ադրբեջանցիների զրույցը, ինչից պարզ է դառնում, որ խոսք է գնացել հենց հետախուզական նկարահանման մասին․ «Սա նշանակում է, որ նրանք, օգտվելով առիթից, հետախուզական գործունեություն են իրականացնում Սյունիքի տարածքում, ինչը կարելի էր թույլ չտալ, եթե ԱԱԾ կոչվածում մի երկու պրոֆեսիոնալ մարդ մնացած լիներ։ ԱԱԾ-ն այսօր զբաղվում է մեկ սատանա բռնելով, հիմա էլ ֆեյքերի փնտրտուքով։ Նիկոլն ու իր վարչակազմն այդ կառույցն ամբողջովին լուծարել են, ձևական անունն է մնացել։ ՀՀ անվտանգությունը երկրորդական երրորդական նշանակություն ունի այդ կառույցի համար»,-նշեց փորձագետը։

Արմեն Մանվելյանը նշեց՝ իրեն հայտնի են պրոֆեսիոնալ սպաներ, որոնք վաղուց հեռացել են, իսկ մնացածն էլ անհասկանալի գործառույթներ են իրականացնում․ «Այդ նկարահանումն ապացուցում է, որ այն մարդիկ, որոնք պատասխանատու են, չեն հասկանում՝ ինչ ասել է պատասխանատվություն և առավել ևս չգիտեն՝ ինչպես այդ ամենն իրականացնեն։ Սա ոչ պրոֆեսիոնալ աշխատանքի արդյունք է, իսկ դա ԱԱԾ-ի քայքայման արդյունքն է»,-ասաց Արմեն Մանվելյանը։

Անդրադառնալով հարցին՝ արդյոք հնարավոր է այդ նկարահանումը Սյունիքի հայաթափման պատճառ դառնա, Արմեն Մանվելյանը նկատեց՝ սա Սյունիքի հայաթափման սկիզբն է․ «Կովկասի ինստիտուտ հիմնադրամից գնացել էին Սյունիք, հետազոտություններ արել և արդյունքները տխուր են։ Հատկապես սահմանամերձ դարձած գյուղի բնակիչների մեծ մասը մտածում է հեռանալու մասին, որովհետև ոչ ոք չի ուզում ադրբեջանական զինված ուժերի վերահսկողության տակ ապրել։ Ալիևը չի էլ թաքցնում, որ ուզում են Սյունիքը գրավել, իսկ Հայաստանի ղեկավարը ոչ մի կերպ չի թաքցնում, ավելին՝ ճանապարհներ են հարթում այդ ծրագիրն իրականացնելու համար։ Սյունիքի հայաթափման ծրագիրը դրված է ռելսերի վրա և ժամանակի ընթացքում ընդամենը պետք է թափ հավաքի։ Սյունիքում 14 գյուղ սահմանամերձ է դարձել, և դրանցից շատերը եռակողմ շրջափակման մեջ են»,-նշեց Արմեն Մանվելյանը։

Աղբյուր` Փաստինֆո