Փաստ ինֆո

Նիկոլ Փաշինյանի աջակիցներից մեկը նախօրեին դանակով Բաղրամյան պողոտա է գնացել, մտել վրաններից մեկը և սպառնացել բոլոր նրանց, ովքեր հանդգնում են իր կուռք Նիկոլի հրաժարականը պահանջել: Բարեբախտաբար, ոստիկաններին հաջողվել է հեռացնել նրան: Այս մասին «Փաստինֆո»-ի հետ զրույցում պատմեց «Բարգավաճ Հայաստան» խմբակցության պատգամավոր Նաիրա Զոհրաբյանը:

Պատգամավորի համոզմամբ՝ նման միջադեպերը հաճախ հանդիպող երևույթներ են դարձել Հայաստանում և հասարակության մեջ առկա ատելության, անհանդուրժողականության մթնոլորտի արդյունք են.

«Ինձ համար այս երևույթը բացարձակ զարմանալի չէ Նիկոլ Փաշինյանի ստեղծած ատելության մեջ խեղդվող Հայաստանում: Ես չեմ իմացել, որ մեր երկրում նման որակի մարդիկ կան՝ չարությամբ, անհանդուրժողականությամբ , ատելությամբ լցված: Երբ ինձ հարցնում են, ո՞րն է Նիկոլի ֆենոմենը, ինչպե՞ս է նա կարողանում իր շուրջ համախմբել նման մարդկանց, դա շատ պարզ է՝ կա անհաջողակի, չկայացածի, չսիրվածի բարդույթ, այդ բարդույթով մարդկանց ինքը մագնիսի նման ձգում է, որովհետև ինքը նրանցիցի մեկն է»,-ասաց Զոհրաբյանը:

ԲՀԿ պատգամավորը նկատում է, որ նման ագրեսիվ, անհանդուրժող երևույթներն ամենուր են՝ փողոցներում, ընտանիքներում, բուհերում, խանութներում, ինչը սպառնալիք է համարում երկրի ազգային անվտանգությանը.

«Ես այս ատելությունը, թշնամանքը, ինտելեկտից , դաստիարակությունից, կրթվածությունից զուրկ մի զանգվածի ջրի երես դուրս գալը համարում եմ մեր ազգային անվտանգությանը սպառնալիք:Ինձ ասում են, որ այս որակը եղել է միշտ, պարզապես նախկինում իրենք զգուշավոր էին, ջրի երես դուրս չէին գալիս, որովհետև քաղաքական էլիտան իրենցից տարբեր էր, հիմա իրենք, ի դեմս այս քաղաքական էլիտայի , տեսան իրենց նմաններին և որոշեցին գալ առաջին պլան: Իրենք, ցավոք, միշտ եղել են, պարզապես, մենք նրանց այս քանակով չենք տեսել, և իրենք համարձակություն չեն ունեցել այսպիսի ագրեսիվ կերպով հարձակվել մարդկանց վրա, որովհետև հասկացել են, որ չեն ունենալու աջակցություն»,-ասաց պատգամավորը՝ վստահեցնելով, որ հիմա այս մարդիկ ունեն քաղաքական իշխանության աջակցությունը.

«Քաղաքական իշխանությունն էլ իրենց նման է՝ անհաջողակների, չսիրվածների, չկայացածների բարդույթով հավաքված մարդկանց խումբ»,-ասաց Նաիրա Զոհրաբյանը:

Աղբյուր` Փաստինֆո