Փաստ ինֆո

Դիլիջանում մարտի 3-ին տեղի ունեցած անհնազանդության ակցիայից հետո ԱԱԾ-ն այսօր այցելել է ակցիայի մասնակից, փաստաբան Աննա Մանթաշյանի, ինչպես նաեւ նրա որդու տուն, որն ապրում է Երեւանում՝ վարձակալության հիմունքներով։

Ավելի վաղ «Փաստինֆո»-ն տեղեկացրել է, որ Դիլիջանում մի խումբ քաղաքացիներ, մտահոգված ստեղծված իրավիճակով, իրենց զորակցությունն էին հայտնել հայոց բանակին՝ փակելով Դիլիջանի կենտրոնական փողոցի ճանապարհները։ Ակցիայի մասնակից Աննա Մանթաշյանը հայտարարել էր, որ համաձայն չեն այս ազգադավ իշխանությունների հետ, որի ապաշնորհ դիվանագիտության և քաղաքականության հետևանքով հրահրվել է այս պատերազմը, եւ այսօր ունենք 7000 զոհ, ավելի քան 10.000 վիրավոր, որոնց ձեռքերի վրա ժամանակին եկել էին և նրանց արյան գնով այսօր էլ պահում են իշխանությունը։

Այս հայտարարությունից հետո ԱԱԾ-ն նախ այցելել է Երեւանում գտնվող Ա. Մանթաշյանի որդու տուն,որտեղ, ինչպես նշեցինք, նա բնակվում է վարձակալական հիմունքներով, ապա նաեւ Ա.Մանթաշյանի՝ Դիլիջանում գտնվող տուն՝ խուզարկության։ Ընդ որում, խուզարկությունը ձեւակերպվել է մի քրեական գործի շրջանակներում, որը հարուցվել է 1 տարի 8 ամիս առաջ եւ որի շրջանակներում Ա. Մանթաշյանի որդին անցնում է որպես տուժող։

Այսպես՝ 2019 թվականի հունիսին ավտոմեքենայով ազդանշան տալով համար վիճաբանություն է առաջացել, որի ժամանակ հարվածել են Ա.Մանթաշյանի որդու ընկերոջը՝ պատճառելով թեթեւ վնաս։ Սույն դեպքի առթիվ նախ մերժվել է քրեական գործի հարուցումը՝ տուժողի բողոքի բացակայության հիմքով, ինչը դատախազը վերացրել է, հարուցել քրեական գործ՝ խուլիգանության հատկանիշներով, որով փաստաբանի որդին ու նրա ընկերը հետագայում ճանաչվել են տուժող։ Տեւական ժամանակ տուժողները որեւէ տեղեկություն չեն ունեցել քրեական գործի ընթացքի մասին, նախաքննական մարմինը ոչ հիշել է իրենց, ոչ էլ որեւէ քննչական գործողության հրավիրել ու հանկարծ 2021 թվականի մարտի 3-ի ակցիայից հետո ԱԱԾ-ն հիշում է այս գործի մասին ու որոշում գնալ տուժողի բնակության վայրերում խուզարկություն կատարելու՝ ոչ ավել-ոչ պակաս դեպքի ժամանակ տուժողի հագին եղած հագուստն առգրավելու համար։

Այսինքն՝ ոչ միայն աբսուրդն այն է, որ սովորական ենթադրյալ խուլիգանության գործով նախաքննությունը կատարում է ԱԱԾ-ն՝ ազգային անվտանգությանն սպառնացող մարտահրավերները թողած, այլ նաեւ պարզվում է ժամանակին անգործություն են ցուցաբերել, չեն պարզել,թե դեպքի ժամանակ տուժողներն ինչ հագուստով են եղել ու 1 տարի 8 ամիս անց որոշել են այդ բացը «լրացնել»։ Պատկերացնում եք չէ, թե քրեական գործի համար որքան օգտակար կարող է լինել այս ընթացքում մի քանի անգամ լվացված հագուստը...։ Ինչեւէ՝ խուզարկությունը կատարվել է դատավորների՝ ֆարխոյանական ցուցակը գլխավորող դատավորի, նույն ինքը՝ Կարեն Ֆարխոյանի որոշմամբ եւ այստեղ սկսվում է ամենահետաքրքիրը՝ դատավորը թույլ է տվել տուժողի տանը խուզարկություն կատարել ոչ միայն հագուստն, այլ նաեւ արգելված առարկա հայտնաբերելու եւ առգրավելու համար։ Սա ուղղակի նոնսենս է, երբ տուժողի բնակարանում խուզարկություն է կատարվում արգելված առարկաներ հայտնաբերելու համար՝ առանց տվյալ դեպքի առթիվ քրեական գործի հարուցման։ Ասել է թե՝ դատարանի որոշումն ուղղակի մատնել է, որ խուզարկության նպատակը եղել է ինչ-որ բան գտնելը, որպեսզի հնարավոր լինի լռեցնել։

Աննա Մանթաշյանը «Փաստինֆո»-ի հետ զրույցում ԱԱԾ աշխատակիցների անակնակալ այցը պայմանավորեց հենց մարտի 3-ին տեղի ունեցած ակցիայի հետ։ «Չեմ կարող սա համարել ուղղակի զուգադիպություն։ Ակցիայից անմիջապես հետո հիշել մի գործ, որի մասին մոռացել էին շուրջ երկու տարի, գնալ տուժողի տուն խուզարկության՝ հագուստ առգրավելու համար ու նաեւ որոշման մեջ նախատեսել արգելված առարկայի առգրավում, չգիտեմ ինչ սցենարից է»,- ասել է մեր զրուցակիցը՝ նշելով, որ ինքը որպես իրավաբան շատ լավ հասկանում է այդ որոշման նպատակը։

Տիկին Մանթաշյանը վստահեցրեց, որ նման մեթոդներով իրեն վախեցնել կամ լռեցնել չի հաջողվի։ «Ես քաղաքականությամբ դեմ զբաղվում, քաղաքական նկրտումներ, նպատակներ չունեմ։ Սահմանամերձ բնակավայրի բնակիչ եմ, որը մտահոգված է երկրի ապագայով ու իմ քաղաքացիական պարտքն եմ կատարել՝ հայտնելով իր զորակցությունը հայոց բանակին, որի շնորհիվ 30 տարի հաջողվել էր պահպանել խաղաղությունը,- նշել Ա.Մանթաշյանն ու ավելացրել, որ չնայած ԱԱԾ գործողություններին, շարունակելու է բարձրաձայնել գործող իշխանությունների վարած քաղաքականության ազգակործան հետեւանքների մասին՝ ի համերաշխություն հայոց բանակի։

Անհնազանդության ակցիա Դիլիջանում. փակում են կենտրոնական ճանապարհը՝ ի համերաշխություն բանակի

Աղբյուր` Փաստինֆո