Փաստ ինֆո

«Այն, որ ընդդիմությունը գերիների հարցը շահարկելով՝ քաղաքական դիվիդենտներ է վաստակում, հասկանալի է՝ ընդդիմություն է, սակայն երբ դա իշխանությունն է անում՝ չեմ հասկանում, անկեղծ ասած»: Այս մասին ԱԺ-ում՝ լրագրողների հետ զրույցում, ասաց ԱԺ անկախ պատգամավոր Սոֆյա Հովսեփյանը՝ պատասխանելով գերիների մասին «շահարկումների» հարցին:

Պատգամավորը նշեց, որ գերիների հարցն ամբողջ ազգին է վերաբերում, և ով ինչ ջանք կարողանում է ներդնել այս հարցում, պետք է անի՝ այս հարցը լուծելու համար: Պատգամավորի խոսքով՝ ինքը թեև ներկայումս իշխանության մեջ չէ, բայց առաջին օրից շարունակում է զբաղվել այդ հարցով:

Անդրադառնալով Արթուր Վանեցյանի հայտարարությանը, որ եթե լիազորություններ ունենա, կկարողանա գերիների հարցը մի քանի օրում լուծել, պատգամավորը նշեց, որ օր առաջ  գերիների վերադարձը յուրաքանչյուրիս խնդիրն է։

«Քո ազգի ներկայացուցչի ազատ լինելը, Ադրբեջանից վերադարձը քեզ համար գերխնդիր չէ,  իշխանությո՞ւնն է գերխնդիր: Սա ընդամենը կա՛մ չմտածված, կա՛մ այդքան գրագիտություն չունեցող անձի մոտեցում է, որը ես չեմ հարգում»:

Լինելով անկախ պատգամավոր, չունենալով Կառավարության կողմից որևէ լիազորություն, Սոֆյա Հովսեփյանը նշեց, որ օգտվում է բոլոր հնարավոր տարբերակներից և գործում է:

«Եթե ինքը կարող է կարճ ճանապարհ գտնել և նաև ՌԴ-ում կամ այլ կապերով կարող է այդ հարցը լուծել, կարող է անձամբ Կառավարությունից լիազորություն պահանջել, չեմ ասում խնդրել, և այդ հարցը, աջակցության կարգով, հանուն գերիների լուծել: Եթե զուտ լծակի մասին է խոսքը, ես չեմ կարծում, որ իշխանությունը չտա նրան այդ լիազորությունը»,- հավելեց Հովսեփյանը:

Պատգավավորը նշեց, որ Ռուսաստանը ջանքեր է գործադրում՝ գերիների վերադարձի հարցում, Ադրբեջանը փորձում է օգտվել հայ-ռուսական «թվացյալ լարված հարաբերություններից», բայց հայկական կողմը որևէ բան չի անում՝ ՌԴ-ի հետ հարաբերությունները կարգավորելու համար, այլ ամեն ինչ անում է ՝ փչացնելու համար։

Աղբյուր` Փաստինֆո