Փաստ ինֆո

ՀՀ օրենսդրությամբ չկա որևէ պաշտոն, որին կարելի է ուղղակի, առանց պատճառի, հայեցողությամբ հեռացնել պաշտոնից։ ՀՀ սահմանադրությունն այդպիսի բան արգելում է։ Այս մասին «Փաստինֆո»-ի հետ զրույցում ասաց ՀՀ ԱԺ աշխատակազմի նախկին ղեկավար, «Հայրենիք» կուսակցության խորհրդի անդամ Արսեն Բաբայանը։

Ավելի վաղ տեղեկացրել ենք, որ Փաշինյանի այսօր հրավիրած անվտանգության խորհրդի նիստից հետո ԱԱԽ-ն հայտարարություն էր տարածել՝ կոչ անելով ՀՀ նախագահին ստորագրել Օնիկ Գասպարյանին ԳՇ պետի պաշտոնից ազատելու Փաշինյանի ներկայացրած հրամանագիրը։

Ավելին՝ հաղորդագրությամբ նշվել էր, թե օրենքի համաձայն, ՀՀ Զինված ուժերի Գլխավոր շտաբի պետի, որպես բարձրագույն զինվորական ծառայության պաշտոն զբաղեցնող անձի, նշանակվման և ազատման առաջարկության հիմքում ընկած է կառավարության ղեկավարի հայեցողությունը։

«ՀՀ նախագահը, լինելով Սահմանադրության պահպանմանը հետեւող կարեւորագույն ինստիտուտ, պարտավոր է միանշանակ կերպով ցուցաբերել համապատասխան մոտեցում:

Ելնելով վերը նշվածից՝ Անվտանգության խորհուրդը Հանրապետության նախագահին կոչ է անում բավարարել ՀՀ վարչապետի` Գլխավոր շտաբի պետին պաշտոնից ազատելու միջնորդությունը եւ ստորագրել համապատասխան հրամանագիր»,- նշված է կառույցի տարածած առաջին հաղորդագրությունում, որը հետագայում սրբագրվել է:

Արսեն Բաբայանը մեզ հետ զրույցում ասաց, որ դա հերթական անգրագիտությունն է և ՀՀ օրենսդրությամբ չկա որևէ պաշտոն, որից կարելի է առանց պատճառի հեռացնել, իսկ ինչ վերաբերում է նախագահին, ապա նա չունի նման պարտականություն, նախագահը պարտավոր է հետևել Սահմանադրության պահպանմանը, ինչն արվում է։

«Վատ խմբագրից այդ անձն այդպես էլ չդարձավ պետական գործիչ։ Նրան թվում է, թե ՀՀ փաստաթղթերը, օրենսդրությունը, Սահմանադրությունը կամ իր կողմից ստորագրվող փաստաթղթերը «Հայկական ժամանակ» թերթի սյունակներն են, որ ինչ ուզի, ինչպես ուզի կգրի, ինչ բամբասանք և ինչ ստորություն ասես կարող է գրել և դա կարող է լինել ճշմարտություն, չի անցել, այդ մարդը չի դարձել պետական գործիչ, դրա համար էլ այդպես է » ,- նշեց Բաբայանը։

Անդրադառնալով նախագահի լիազորություններին և պարտականություններին՝ Բաբայանը նշեց, որ նախագահն ունի պարտականություն ՍԴ դիմելու կամ վերադարձնելու, երբ տեսնում է, որ ներկայացված միջնորդությունը, հրամանագրի նախագիծը, օրենքն ունեն Սահմանադրության հետ կապված խնդիրներ։

«Դա նախագահի պարտավորությունն է, որը տեղավորվում է Սահմանադրությունը պահպանելու պարտականության մեջ։ Այսինքն, եթե տեսնում է, որ խնդիր կա, անպայման պետք է ուղարկի, հակառակ դեպքում՝ կստացվի չարաշահում»,- նշեց Բաբայանը՝ հավելելով, որ այս պարագայում նախագահը պետք է դիմի ՍԴ, քանի որ նա արդեն տեսել է, որ սահմանադրականության հետ խնդիր։

Իսկ թե ինչ պետք է սպասել ՍԴ-ից՝ հաշվի առնելով, որ այսօր ՍԴ-ում մեծամասնություն են կազմում այս իշխանությունների օրոք ընտրված դատավորները, Բաբայանը նշեց, որ չի ցանկանում անձերի վրա կենտրոնանալ՝ հաշվի առնելով իրավիճակի փոփոխությունը։ Նրա խոսքով՝ հստակ է, որ Սահմանադրության պահանջն է, որ դա ճանաչվի Սահմանադրությանը հակասող։

«Չի կարելի որևէ մեկին հանիրավի մեղադրել կամ որևէ մեկին առանց հիմքին, առավել ևս՝ ԳՇ պետին, ազատել զբաղեցրած պաշտոնից»,- նշեց նա՝ ընդգծելով, որ որևէ կերպ ռազմական հեղաշրջման փորձը չի հաստատվել, անգամ՝ իրենց կողմից։

Անդրադառնալով ԱԺ իշխանական պատգամավոր Վահագն Հովակիմյանի հայտարարությանը, թե կան հիմքեր նախագահի իմպիչմենտի գործընթաց սկսելու համար՝ Բաբայանը նշեց, որ Հովակիմյանը շարունակում է փայլել մտքի հիմար գոհարներով։

«Նա այդպես էլ չկարողացավ Սահմանադրությունը հասկանալ, որովհետև այդ տղան նույնիսկ կրթություն չունի բարձրագույն»,- նշեց նա։

Աղբյուր` Փաստինֆո