Փաստ ինֆո

«Նիկոլ Փաշինյանը՝ փուչ ու անհիմն ամբիցիաներից ելնելով փորձում է ծառայությունից ազատել հայոց բանակը գլխավորող, երկրի անվտանգությունը ապահովող գեներալներին։ Դա անթույլատրելի է։ Չի կարելի պարզապես քաղաքական ու հակասական պատկերացումների պատճառով ազատել նման մարդուն, այն էլ, նման խնդիրներ ունեցող երկրում։ Այս կերպ փորձում ես քո պատասխանատվության ու մեղքի բաժինը փոխանցել բանակին»,- այս մասին Կապանի Գարեգին Նժդեհ հրապարակում`մարզպետարանի դիմաց ի աջակցություն «Հայրենիքի փրկության շարժման» հավաքի ժամանակ ասաց համայնքապետ Գևորգ Փարսյանը։ Ըստ նրա՝ բանակը կռվել է «գլադիատոր»-ների նման, չի կարծում, որ Գլխավոր շտաբի պետ Օնիկ Գասպարյանիը պետք է պաշտոնից ազատվի։ 

Փարսյանը պաշտոնապես հայտարարեց, որ երկրում ծառացած քաղաքական սուղ իրավիճակից, Կապանում առաջացած հետպատերազմյան խնդիրներից ելնելով ու օր օրի խորացող ճգնաժամը ավելի ու ավելի են իրենց վճռական դարձնում, ավելի են համոզվում, որ Նիկոլ Փաշինյանի ու կառավարության հրաժարականը խիստ անհրաժեշտություն է։

«Պարոն Փաշինյան, ասում եք՝ բոլորը ձեր եղբայրներն ու քույրերն են, ապա այդ դեպքում խնդրում եմ ձեզ, որպես մարդը մարդուն, պահանջում եմ՝ որպես երկրի վարչապետ, կանգնեցրեք մեր պետության գահավիժման ընթացքը, հաստատեք համակարգի անխափան աշխատանքը, մտցրեք կայունություն ու կարող եք անել դա միայն ձեր հրաժարականով։ Հասկացեք վերջապես, դուք խանգարում եք, հեռացեք և վերջ՝ վերջակետ»։

Կապանցիները մեկ անգամ էլ վերահաստատեցին՝ բանակի կողքին են, նրանք պահանջում են վարչապետի հրաժարականը, բացականչում էին ՝ «Առանց, Նիկոլ Հայաստան»։

Աղբյուր` Փաստինֆո