Փաստ ինֆո

Արցախի նախագահ Արայիկ Հարությունյանի խոսնակը հայտարարել է, թե Արայիկ Հարությունյանն այս պահին միջնորդի դեր է կատարում բանակի ու վարչապետի միջև։

Հիշեցնենք, որ ՀՀ ԶՈՒ ԳՇ պետն ու հրամկազմը երեկ հանդես են եկել Նիկոլ Փաշինյանի հրաժարականի պահանջով. «ՀՀ վարչապետը և կառավարությունն այլևս ի վիճակի չեն ընդունելու ադեկվատ որոշումներ՝ հայ ժողովրդի համար այս ճգնաժամային և ճակատագրական իրավիճակում: ՀՀ զինված ուժերը երկար ժամանակ համբերատար կերպով հանդուրժում էր գործող իշխանության կողմից զինված ուժերը վարկաբեկելուն ուղղված «գրոհները», սակայն ամեն ինչ ունի իր սահմանները: ՀՀ զինված ուժերը պատվով է կատարել իր պարտքը, իր ժողովրդի հետ ուսուսի մարտնչել թշնամու դեմ: Գործող իշխանությունների անարդյունավետ կառավարումը և արտաքին քաղաքականությունում ցուցաբերած լրջագույն սխալները երկիրը հասցրել են կործանման եզրին: Ստեղծված իրավիճակով պայմանավորված՝ ՀՀ զինված ուժերը պահանջում են ՀՀ վարչապետի և կառավարության հրաժարականը, միաժամանակ նախազգուշացնում՝ ձեռնպահ մնալ ժողովրդի դեմ ուժ կիրառելուց, ում զավակները զոհվել են՝ պաշտպանելով Հայրենիքն ու Արցախը: Բանակը միշտ եղել է ժողովրդի հետ, ինչպես ժողովուրդն է բանակի հետ»,- նշվում է հայտարարության մեջ:

Հայրենիքի փրկության շարժումը, հանրային, ռազմական գործիչներն իրենց համերաշխությունը հայտնեցին բանակին՝ կարեւորելով Նիկոլ Փաշինյանի անցնցում հրաժարականը։ Իսկ վերջինս հրավիրեց հանրահավաք ու անվտանգության աշխատակիցների մի քանի շարքով շրջապատված դուրս եկավ երթի։

Արցախի նախագահ Արայիկ Հարությունյանը հայտարարեց, թե պատրաստ է կողմերի միջեւ միջնորդական առաքելություն իրականացնել՝ իրավիճակը լիցքաթափելու համար։ Իսկ արդյոք ընդդիմությունը պատրաստ է հանդիպել Ա.Հարությունյանին «Փաստինֆո»-ի հարցին ի պատասխան՝ ԱՀ նախագահի խոսնակը նշեց.

«Արայիկ Հարությունյանն ասել է, որ ինքը պատրաստ է ստանձնել միջնորդություն։ Հարցրեք մյուսներից՝ իրենք պատրաստ են ընդունել այդ միջնորդությունը, թե չէ։ Իրավիճակը պետք է լիցքաթափվի՝ միակ նպատակը սա է»,- ասաց խոսնակը՝ արձագանքելով ընդդիմության հետ հանդիպելու հավանականությանը վերաբերող հարցին՝ նշելով, որ այս պահին միջնորդի դեր է կատարում բանակի եւ Նիկոլ Փաշինյանի միջեւ։

Նա վերահաստատեց, որ Արայիկ Հարությունյանը հանդիպել ԳՇ պետ Օնիկ Գասպարյանին եւ Նիկոլ Փաշինյանին։ Հիշեցնենք՝ դեռ երեկ խոսնակը նշել էր, որ «միջնորդության պատրաստակամությանը համապատասխան՝ նախագահ Հարությունյանը հանդիպումներ է ունեցել և՛ Նիկոլ Փաշինյանի, և՛ Օնիկ Գասպարյանի հետ, նրանց հետ քննարկել է առկա իրավիճակի հաղթահարման հետ կապված որոշ հարցեր՝ հիմք ընդունելով Հայաստանի ու Արցախի ներքին կայունության ու արտաքին անվտանգության առաջնահերթությունները»:

Հարցին՝ փաստացի միայն բանակի ու վարչապետի միջև է Հարությունյանը միջնորդի դեր կատարում, Ավանեսյանն ասաց. «Այս պահին՝ այո»։

Իսկ արդյոք ընդդիմությունը համաձայնություն տվե՞լ է, որ Հարությունյանը դառնա միջնորդ, ԱՀ նախագահի խոսնակը «Փաստինֆո»-ի հետ զրույցում նշեց, որ հարցն ավելի ճիշտ կլիներ ուղղել ընդդիմությանը։

ԱՀ նախագահի խոսնակը չմեկնաբանեց նաև, թե արդյոք Հարությունյանն ունի՞ այնքան հեղինակություն, որ կարողանա միջնորդի դեր կատարել.

«Նախագահը այս պահին զբաղված է միջնորդական բարդ աշխատանքով։ Միայն իրեն վստահ մարդը կարող է նման իրավիճակում ստանձնել նման պարտականություն՝ ընդ որում ինքնակամ»։

Առաջիկայում հնարավոր են նոր հանդիպումներ Նիկոլ Փաշինյանի եւ Օնիկ Գասպարյանի հետ՝ հարցին ի պատասխան խոսնակը նշեց, որ այս պահին դեռ հստակ չէ՝ նոր հանդիպումներ նախատեսված են, թե ոչ։ 

«Մենք խոսում ենք չավարտված գործընթացի մասին»,- նշեց խոսնակը։

Աղբյուր` Փաստինֆո