Փաստ ինֆո

Ոստիկանական ուժերը գիտակցում են, որ որևէ ուժի գործադրումը բերելու է հակազդեցության՝ շատ կոշտ և համարժեք ձևով։ Այս մասին «Փաստինֆո»-ի թղթակցի հետ զրույցում ասաց ՀՅԴ ԳՄ անդամ Արծվիկ Մինասյանը, որը գիշերել է Բաղրամյան պողոտայում։ Նրա հավաստմամբ՝ գիշերը պողոտայում հանգիստ է անցել, առանց միջադեպերի։

Մինասյանը նշեց, որ վճռական հավաքների միջոցով փորձում են համախմբել հանրությանը և դա է կարևոր երաշխիքը, որ իշխանափոխությունը լինի անցնցում։ Մեր զրուցակցի դիտարկմամբ՝ Նիկոլ Փաշինյանը և նրա հանցավոր հատվածը փորձում են պարբերաբար քաղաքացիական բախումներ հրահրել ։

«Հայաստանում այլևս որևէ հայի արյուն չպետք է թափվի և դրա միակ երաշխիքը բազմաքանակությունն է, որ բոլոր այն կառույցները, որոնք այսօր շարունակում են մնալ նրա հիմնական պահպանող հատվածը, կազմալուծվեն և միանան ժողովրդին»,- նշեց Մինասյանը՝ նկատելով, որ ՀՀ ԶՈՒ հայտարարությունը չափազանց կարևոր է և այն պետականության նկատմամբ պատասխանատու վերաբերմունքից է բխում՝ չնայած այն բազմաթիվ փորձերին, որ Նիկոլ Փաշինյանը և նրա թուրք-ադրբեջանական ընկերները փորձում են Հայաստանի միջազգային հեղինակությանը վնասել՝ ասելով, թե ռազմական հեղաշրջման փորձ է։ Ըստ Մինասյանի՝ դրանք աբսուրդային ներկայացումներ են։

«Մենք Զինված ուժերին հայտնում ենք մեր լիակատար աջակցությունը և համախոհությունը, որովհետև ԶՈՒ-երը ժողովրդի կողքին են, ինչպես հայտնել են իրենց հայտարարությամբ և ժողովուրդը պատրաստ է մինչև վերջ պաշտպանել իր բանակին, ինչպես բանակն է պատրաստ պաշտպանելու իր ժողովրդին։ Համոզված եմ՝ այս գործընթացը երկար չի տևի, եթե հասարակությունը հենց հիմա գա Բաղրամյան պողոտա»,- նշեց Մինասյանը։

Ինչ վերաբերում է ԶՈՒ ԳՇ պետ Օնիկ Գասպարյանի նկատմամբ հնարավոր ճնշումներին, Մինասյանն ընդգծեց, որ, դատելով գեներալի ճիշտ և ամուր կեցվածքից, ինչպես նաև՝ ԶՈՒ բազմաթիվ հրամանատարական կազմի բազմաթիվ հայրենիքը պաշտպանած անձանց վճռական գործողություններից և հայտարարություններից, վստահ է, որ չեն տրվի այդպիսի ճնշումների, եթե այդպիսիք կան։

Աղբյուր` Փաստինֆո