Փաստ ինֆո

«Հարցնում եք ինչի՞ հետևանք է Հայաստանում գրանցված և անհասկանալի պայմաններում Թեհրանում հայտնված ինքնաթիռի հանգամանքը՝ պատասխանում եմ ՝ համընդանուր բարդակի, որ տիրում է մեր երկրում՝ վերջին 3 տարիների ընթացքում: Մի՞թե քայքայված տնտեսությունը դրա հետևանք չէ, պատերազմն ու խայտառակ պարտությունը՝ նույնպես, քաղավիացիայի պատկերն՝ ընդհանուր առմամբ, նույն իրավիճակում չէ՞, շարունակե՞մ ոլորտներ թվարկել, թե՞ կանգ առնենք: Կարճ ասած՝ մեր երկրում տիրող այսօրվա իրավիճակը համընդհանուր բարդակի արդյունք է »,- «Փաստինֆո»-ի հետ զրույցում ասել է քաղտեխնոլոգ Կարեն Քոչարյանը՝ անդրադառնալով նախօրեից տարածված լուրերին, թե ՀՀ-ում գրանցված ամերիկյան արտադրության Boeing 737 ինքնաթիռը, դեռևս չպարզված հանգամանքներում, հայտնվել է Իրանի Իսլամական Հանրապետության մայրաքաղաք Թեհրանում:

Հիշեցնենք, որ փետրվարի 21-ին ՀՀ քաղաքացիական Ավիացիայի Կոմիտեն (ՔԱԿ) հեռագիր է ստացել Միացյալ Արաբական Էմիրությունների Քաղաքացիական Ավիացիայի Գլխավոր Վարչության կողմից (GDCA), հայկական գրանցմամբ, EK-FAA համարանիշով Բոինգ-737 օդանավի առևանգման մասին: Օդանավը թռիչք է կատարել Էստոնական Տալլինից, և, ըստ պլանի պետք է վայրէջք կատարեր Երևանում: Բայց դրա փոխարեն օդում որոշում է կայացվել գնալ Էմիրաթներ, տեխսպասարկման: Եվ «տեխնիկական անսարքության պատճառով» վայրէջք է կատարել Թեհրանում:

Կարեն Քոչարյանը կարծում է, որ երկրում ստեղծված իրավիճակից դուրս գալու համար, մարդիկ ոչինչ չեն կարողանում անել. «Արդյունքում ամերիկյան արտադրության Boeing ինքնաթիռը հայտնվում է Իրանում, իսկ, օրինակ, այն, ինչ պետք էր ժամանակին հասցնել Աբու Դաբի՝ ռազմական թեմատիկայով էքսպոյին արժանապատիվ կերպով մասնակցելու համար, չի հասնում, պատերազմի օրերին Հայաստան համահայկական հիմնադրամից ահռելի չափերի հասնող գումարներ են կորում և ոչ ոք իրավիճակին չի տիրապետում, կորում է, ի պաշտոնե, երկրի առաջին դեմքի՝ վարչապետի դիվանագիտական անձնագիրը և, կրկին, հստակ ոչինչ պարզ չէ, դպրոցներում տնօրեն են նշանակում, ինչի արդյունքում շաբաթներով կանգ է առնում դասապրոցեսը և, կրկին, ոչ ոք ոչնչի համար պատասխանատու չէ, որը մեկն ասեմ… Ոչ մի բան այս մարդիկ ի վիճակի չեն անել՝ հո զոռով չի՞», - ասում է Կարեն Քոչարյանը:

Խոսելով ՀՀ-ում գրանցված ինքնաթիռի առեղծվածային հանգամանքներում Թեհրանում հայտնվելու «օպերացիայի» հավանական հետևանքների մասին, Կարեն Քոչարյանը նկատում է՝ չէր ցանական խոսել մի բանի մասին, որը դեռ տեղի չի ունեցել, նկատի ունենալով այն զարգացումները, որի արդյունքում, Հայաստանի Հանրապետությունը կարող է որոշակի սանկցիաների տակ հայտնվելել. «Եվ ամենազվարճալին այն է, որ, ստեղծված իրավիճակում, Քաղավիացիայում ոչ ոք ոչինչից տեղյակ չէ: Հավանաբար այս ողջ պատմության մեջ շահող է դուրս գալիս Իրանը, իրենց հնացած ավիացիան համալրելով մեկ նոր Boeing ինքնաթիռով»,- ամփոփելով զրույցն, ասում է քաղտեխնոլոգ Կարեն Քոչարյանը:

Հեղինակ՝ Նվարդ Մանվելյան

Աղբյուր` Փաստինֆո