Փաստ ինֆո

«Տրամաբանորեն, այնքան էլ ճիշտ չէ քննադատել այն զենքը, որը ձեռք ես բերում քո ռազմավարական դաշնակից հանդիսացող երկրից, որն, առաջին հերթին, սխալ մոտեցում է հենց ռազմավարական դաշնակցի նկատմամբ։ Բնականաբար, ճիշտ քայլ չէ նաև սեփական բանակի նկատմամբ, որով ցույց ես տալիս, որ քո բանակը զինված է եղել, Փաշինյանի բնորոշմամբ՝ ոչ որակյալ զինամթերքով և, երրորդ հերթին, նմանօրինակ արտահայտությունները դրական հաղորդագրություն չեն նաև այն երկրի հանդեպ, որի նկատմամբ կիրառվել է այդ զինատեսակը»,- «Փաստինֆո»-ի հետ զրույցում ասել է միջազգայնագետ Սուրեն Սարգսյանը՝ ընդգծելով, որ Փաշինյանի կողմից երեկ՝ Իսկանդերի վերաբերյալ արված հայտարարությունը որևէ առումով դրական ընկալում չի կարող ունենալ՝ ո´չ ներքին, ո´չ արտաքին լսարանի համար։

Ինչպես արդեն տեղեկացրել ենք՝ Նիկոլ Փաշինյանը, արձագանքելով ՀՀ երրորդ նախագահ Սերժ Սարգսյանի հայտարարությանը, որ Իսկանդերը պետք է կիրառվեր պատերազմի 4-5-րդ օրը, նշել է. «Իսկ գուցե պատասխանեն՝ ինչու կրակած «Իսկանդերը» չի պայթել, կամ պայթել է 10 տոկոսով, օրինակ։ 80-ականների զենք էր, գուցե»։
Փաշինյանի այս դիտարկումները մեծ արձագանք են գտել Ռուսաստանում՝ Փաշինյանին մեղադրելով ստախոսության մեջ ու պահանջելով,որ ներողություն խնդրի՝ Ռուսաստանի հեղինակությանը պատճառված վնասի համար։

Անդրադառնալով Փաշինյանի վերոհիշյալ մտքերի հնարավոր դիվանագիտական հետևանքներին, Սուրեն Սարգսյանը նկատում է՝ պատահական չէ, որ այդ հայտարարությունն, արդեն իսկ, բացասաբար է ընկալվել հենց Ռուսաստանի Դաշնության կողմից, որտեղից պաշտոնական բարձր մակարդակով՝ Պետդումայից արդեն իսկ կոշտ արձագանքներ կան. «Այն, որ Ռուսաստանի Դաշնությունից դեռ հայտարարություններ կլինեն, սրանում չեմ կասկածում: Կարծում եմ նաև, որ այս առնչությամբ Ռուսաստանի Դաշնությունը կարող է նաև որոշակի քայլերի դիմել, հատկապես, եթե հաշվի առնենք, որ այդ երկիրն առանձնահատուկ հպարտությամբ է վերաբերում սեփական ռազմարդյունաբերության ձեռքբերումներին, ապա նման որակումներն անհետևանք մնալ չեն կարող: Փաստորեն, ստացվում է, որ Փաշինյանի՝ երեկ արված հայտարարությամբ, անմիջական հարված է հասցվել հենց զենք արտադրողի՝ Ռուսաստանի Դաշնության հեղինակությանը», - նշում է Սուրեն Սարգսյանը:

Խոսելով «Իսկանդեր» զինատեսակի կարևորության և արժեքավորության մասին, միջազգայնագետը նկատում է՝ սա համարվում է Ռուսաստանի Դաշնության ժամանակակից ռազմարդյունաբերության կարևորագույն համակարգերից մեկը, հետևաբար, Փաշինյանի՝ երեկ արված հայտարարությունն անհետևանք չի մնա:

Հարցին՝ արդյո՞ք Փաշինյանը մտածված է գնում հայ – ռուսական հարաբերությունների վատթարացման համառ ճանապարհով և արդյո՞ք պատահականություն էր արևմտյան արժեքներին հարող լրատվամիջոցի ընտրությունը, որի ընթացքում նա հանդես եկավ հերթական հակառուսական հռետորաբանությամբ, միջազգայնագետը պատասխանում է. «Չեմ ուզում հավատալ, որ սա դիտմամբ արված հայտարարություն էր: Կարծում եմ՝ գործ ունենք չհաշվարկված խոսքի հետ, իսկ լրատվամիջոցի ընտրությունը, կարծում եմ, ոչ մի նշանակություն չունի: Փաշինյանը նույն միտքը միևնույն հանգստությամբ կարող էր արտահայտել ցանկացած այլ լրատվամիջոցի եթերում, որտեղից առիթ կունենար հնչեցնելու իր խոսքը»,- ամփոփելով զրույցն, ասում է միջազգայնագետ Սուրեն Սարգսյանը:

Հեղինակ՝ Նվարդ Մանվելյան

Աղբյուր` Փաստինֆո