Փաստ ինֆո

ՀՀ ԱԺ աշխատակազմի նախկին ղեկավար Արա Սաղաթելյանի կալանավորվորման հիմքում կրկին կապիտուլյանտի վախերն են։ Ինչպես Ա․ Սաղաթելյանի գործընկերներին / Կարեն Բեքարյան, Անժելա Էլիբեկովա, այլք/, նրան առաջադրված մեղադրանքը ևս առնչվում է այսպես կոչված՝ «Գագիկ Սողոմոնյան» ֆեյքի գործին։ Այն, որ ԱԱԾ-ին սատանաների որս անելու հանձնարարական տված իշխանությունը կարող է նաև տասնյակ մարդկանց ձերբակալել՝ որպես գագիկսողոմոնյաններ՝ կասկածից դուրս է։ Թիրախում, սակայն, կոնկրետ անձինք են․․․ 

Փաստորեն, վարչապետի աթոռին սոսնձված անձը Ադրբեջանի դեմ պատերազմում ժողովրդին ծրագրված պարտություն պարտադրելուց և կապիտուլյացիոն ակտը ստորագրելուց հետո իշխանությունից կառչելով, հիմա էլ անցնում է տեղեկատվական պատերազմների ոլորտ։

Ընդ որում, հատկապես այն անձանց դեմ է պատերազմում, ովքեր տարիներ շարունակ Ադրբեջանի դեմ տեղեկատվական պատերազմում մեր իրականության մեջ թուրք-ադրբեջանական ստի և կեղծիքի դեմ լուրջ քաղաքականություն իրականացնողներն են եղել։ Իսկ այս համատեքստում Արա Սաղաթելյանի դերը խարսխային է։

Իրականում Արա Սաղաթելյանի և նրա գործընկերների հանդեպ ներկա իշխանության հիստերիան հասկանալի է, մանավանդ, եթե այն դիտարկում ենք պետության համար՝ թշնամական հարձակումներն պատասխանող և դիմադարձող լրջագույն դերակատարում ունեցած ՊՈԱԿ-ի գործունեությունը ներկաների կողմից՝ զուտ ներսում, ընդդիմախոսների դեմ ֆեյքային հարձակումներ իրականացնող , ներքին թշնամի որոնող, ազգը սև-սպիտակի բաժանող, հայհոյախոս մի կազմակերպության վերածվելու համատեքստում։

Ավելին, Արա Սաղաթելյանը և նրա գործընկերները Արցախյան երրորդ պատերազմը առաջին օրից իսկ ողջ ընթացքը տեղում լուսաբանող պրոֆեսիոնալների թիմն են եղել՝ այնտեղից կազմակերպելով թուրք-ադրբեջանական տանդեմի պատերազմական հանցագործությունների լուսաբանումը՝ այդ թվում՝ օգնելով միջազգային լրատվամիջոցների աշխատանքների կազմակերպմանը, աշխարհին հասանելի դարձնելով Արցախի և արցախցիների ձայնը։

Բնականաբար, թուրք-ադրբեջանական եղբայրությանը հպատակորեն ենթարկվող իշխանության համար իր կադրային պոտենցիալը պահպանած նախկին ՊՈԱԿ-ի համակազմը այսօր վտանգ է ներկայացնում, քանի որ այն այսօր էլ թշնամիներ+ հակահայ իշխանություն՝ Հայաստանի և Արցախի հանրապետությունների դեմ ոտնձգությունները լուսաբանող կարևոր ուժ է փորձագիտական և քաղաքագիտական մակարդակում։

Ի դեպ, Արա Սաղաթելյանի դեմ ներկա իշխանությունների սևեռումը նոր բան չէ, վերջինս առնչվում է այն հասարակական-քաղաքական և միաժամանակ՝ տեղեկատվական ընդգրկուն և հիմնավոր գործունեության հետ, որն իրականացնում է Արա Սաղաթելյան գործիչը։

Հստակ է, որ ԱԺ աշխատակազմի նախկին ղեկավար Արա Սաղաթելյանը քաղբանտարկյալ է։

Երևանի ընդհանուր իրավասության դատարանը՝ դատավոր Արմինե Մելիքսեթյանի նախագահությամբ, բավարարել է Արա Սաղաթելյանի նկատմամբ կալանավորումը՝ որպես խափանման միջոց ընտրելու մասին ԱԱԾ քննիչի միջնորդությունը։ ՈՒշագրավ է, որ նման որոշում կայացնելով դատարանը միևնույն ժամանակ՝ ոչ իրավաչափ է ճանաչել Արա Սաղաթելյանի ձերբակալությունը՝ բավարարելով պաշտպանի բողոքը։

Փաստինֆոն, բնականաբար, ուշի-ուշով կհետևի այս համատեքստում տեղի ունեցող գործընթացներին, դիտարկելով նաև շուրջ 10 օր առաջ, ինչպես նաև՝ դեռ նախորդ տարի նոյեմբեր-դեկտեմբեր ամիսներին ներկա հակահայ իշխանության մտասևեռումները՝ առ Արա Սաղաթելյան։

Ի դեպ, հետաքրքիր զուգադիպություն կա՝ կառավարության ենթակայությամբ գործող ՊՈԱԿ-ի ղեկավարի պաշտոնում 3 օր առաջ նշանակված՝ ֆեյքեր աշխատեցնելու գծով մասնագիտացած Տարոն Չախոյանի և Արա Սաղաթելյանի ու նրա գործընկերների հանդեպ նախօրեին սկսված տոտալ հարձակումների միջև։ Վերջապես՝ վարչապետի պաշտոնը զբաղեցնող անձը կողմնորոշվել է յուր կադրային նշանակման մեջ՝ բուն գործառույթից հեռացած և ֆեյքեր աշխատեցնող կառույցի վերածված կառավարության ՊՈԱԿ-ի համար գտնելով ճիշտ ղեկավարի։

Սա այն նույն անձն է, որի դեմ ԱԺ աշխատակազմի նախկին ղեկավար Արա Սաղաթելյանը հայցադիմում է ներկայացրել դատարան, քանզի դեռ որոշ ժամանակ առաջ համացանցի ուսումնասիրությամբ պարզվել էր, որ քաղաքացի Տարոն Չախոյանի կողմից վարվող ֆեյսբուքյան էջում և ԶԼՄ-ներում հրապարակվել են Արա Սաղաթելյանին զրպարտող և վիրավորող տեղեկություններ, ինչի առնչությամբ էլ դատական հայց էր ներկայացվել՝ հրապարակայնորեն զրպարտությունը հերքելու և վիրավորանքի համար ներողություն խնդրելու պահանջներով։

Խոսքը վերաբերվում է պատերազմի օրերին՝ «ներքին թշնամիների, դավաճանների» կեղծ թեզը խաղարկելով՝ ակնհայտ կեղծ տեղեկատվությամբ ԱԺ աշխատակազմի նախկին ղեկավար Արա Սաղաթելյանին թիրախավորելուն, որն, ըստ էության, ֆեյսբուքյան օգտատեր Տարոն Չախոյանի ձեռագիրն էր, քանզի նա հայտնի լինելով որպես իշխանության «ֆեյքերի» ֆաբրիկայի «ղեկավար» ֆեյսբուքյան իր էջում տեսանյութ էր հրապարակել, թե՝ «Արա Սաղաթելյան» անունով էլեկտրոնային հասցեից այլ էլեկտրոնային հասցեների նամակներ են ուղարկվել՝ իշխանության ներկայացուցիչների վերաբերյալ որոշակի գրառումներով։ Այն օրերին Սաղաթելյանին վարկաբեկող Չախոյանի տարածած տեսանյութի կեղծ լինելու մասին անմիջապես էին հայտարարել անկախ փորձագետները։ Արդյունքում՝ իշխանական քարոզիչը, ներկայումս պաշտոնյան, ստիպված եղավ հեռացնել տեսանյութը։
Արա Սաղաթելյանն այդ օրերին հայտարարեց, որ իր համար ակնառու են իր դեմ իրականացվող քարոզչության թե՛ կատարողները, թե՛ պատվիրատուները։ Դրանք քաղաքական նպատակներ են հետապնդում։

«Մտասեւեռվածություն ու զգուշավորություն կա իմ անձի նկատմամբ եւ միջոցներ են ձեռնարկում ինձ վարկաբեկելու կամ ընթացող գործընթացներից ինչ-որ կերպ զերծ պահելու համար»,-«Փաստինֆո»-ի հետ զրույցում հայտարարել է ՀՀ ԱԺ աշխատակազմի նախկին ղեկավար Արա Սաղաթելյանը օրեր առաջ, ընդգծելով, որ իր դեմ գործողություններն ուղղորդվում են իշխանության վերնախավի կողմից:

«Նիկոլ Փաշինյանը ղեկավարվում է միայն իր անձնական վախերով՝ ինչպես ընդհանրապես որպես մարդ, այնպես էլ՝ որպես երկրի վարչապետի պաշտոնը զբաղեցրած մարդ»,- նշել էր նա դեռեւս 2020 թվականի դեկտեմբերին։

Այսինքն՝ տառապանքը փորձ ունի։ Թիրախում՝ արցախյան հարցը տեղեկատվական դաշտում, թուրք-ադրբեջաականական տեղեկատվական պատերազմում՝ մշտապես ակտիվ հակաքարոզչություն իրականացնող բոլոր այն պրոֆեսիոնալների դեմ է, որոնց դերակատարումն այսօր ավելի քան կարևորվում է։

Ցավալի է և վիրավորական, որ այս անոմալ իրադարձությունները տեղի են ունենում մի կառույցի ձեռամբ, որը կոչվում է Ազգային անվտանգության ծառայություն։

Աղբյուր` Փաստինֆո