Փաստ ինֆո

«Հայաստանի Հանրապետությունում խայտառակ իրավիճակ է: Պետության առաջին կարևորության այնպիսի կառույցներ, ինչպիսիք են՝ ԱԱԾ-ն ու Ոստիկանությունն, ուղղակիորեն վերածվել են Նիկոլ Փաշինյանի անձնական օգտագործման գործիքների և բացարձակ չեն ծառայում պետության շահերին, եթե չասենք, նույնիսկ, վտանգում եմ պետության հիմքերը,- «Փաստինֆո»-ի հետ զրույցում ասել է ասում է  քաղաքագետ Գագիկ Համբարյանը՝ անդրադառնալով  հանրային գործչների ձերբակալություններին։

Ինչպես արդեն տեղեկացրել ենք՝ փետրվարի 19-ի երեկոյան ձերբակալվել են ԱԺ աշխատակազմի նախկին գլխավոր քարտուղար Արա Սաղաթելյանը, վերլուծաբան Կարեն Բեքարյանին, քաղաքացիներ Մհեր Ավագյանին, Արամ Լեւոնի Սարգսյանին, բերման ենթարկել ադրբեջանագետ Անժելա Էլիբեգովային, սահմանադրագետ Գոհար Մելոյանին։ Նրան կասկածում են պատերազմի ժամանակ տեղեկատվության կանոնները խախտելու մեջ։

«ԱԱԾ-ն դարձել է Նիկոլ Փաշինյանի մահակը՝ մարդկանցից անձնական վրեժ լուծելու, նրանց լռեցնելու, շանտաժի ենթարկելու գործում: Պատկերավոր ասած՝ Հայաստանում ԱԱԾ-ն դարձել է Նիկոլ Փաշինյանի ոտքի տակի փալասը, ինչի արդյունքում մենք ունենք այն, ինչ ունենք՝ պարտված երկիր, թշնամական երկու պետությունների անմիջական վտանգի տակ հայտնված սահմաններ, քայքայված տնտեսություն, ահռելի արտագաղթ, պառակտված և ատելությամբ լցված հասարակություն: Ահա սա է Նիկոլ Փաշինյանի ղեկավարած երկրի իրական դիմագիծը»,- ասել է քաղաքագետը:    

Գագիկ Համբարյանը նկատել է՝ երկիրը, փաստացիորեն, հայտնվել է միջազգային հանրության կողմից արհամարհվածի կարգավիճակում, խայտառակ կապիտուլյացիա ստորագրած պետության հետ ոչ ոք հաշվի չի նստում. «Այսքանից հետո, զբաղվել պետության ոտնահարված հեղինակությունը պաշտպանող հանրային անձանց հետապնդմամբ, բոլոր տեսակի մեկնաբանություններից դուրս երևույթ է, սակայն, Փաշինյանի պարագայում ինձ համար սա ակնակնկալ չէր, ես սպասում էի: Այս ամենում ամենաանսպասելին, թերևս, առաջ քաշված «մեղադրանքներն» են: Պատկերացնո՞ւմ եք՝ ԱԱԾ-ն բերման է ենթարկում և ձերբակալում է մարդկանց, որոնց մեղադրում է ֆեյք լինելու մեջ: Այնինչ, նույն այդ ֆեյքը՝ Գագիկ Սողոմոնյանը, ԱԱԾ-ի վերոհիշյալ գործողություներից րոպեներ անց գրառումներ է կատարում իր ֆեյսբուքյան տիրույթում՝ հեգնելով մի ողջ պետության և Նիկոլ Փաշինյանի ոտքի տակ հայտնված կարևորագույն գործառույթներով օժտված այդ կառույցին: Արդյունքում, Գագիկ Սողոմոնյան անունով ֆեյքը շեշտակի մեծացնում է իր նկատմամբ հանրության հետաքրքրությունը և, առնվազն, կրկնապատկում իր հետևորդների թիվը: Սա, ուղղակի, աղետ է, մարդ չգիտի, թե ինչպե՞ս մեկնաբանի այս ամենը… »,- ասել է քաղաքական վերլուծաբանը:

Անդրադառնալով «Գագիկ Սողոմոնյան» անունով գործող ֆեյք օգտատիրոջ ծավալած  վիրտուալ գործունեությանը՝ Գագիկ Համբարյանը նկատել է՝ սա  ինֆորմացիայի եզակի աղբյուրներից մեկն էր, որ 44 օր տևած պատերազմի ընթացքում, ի հակակշիռ պետական մասշտաբով տարածվող ապատեղեկատվության ահռելի ծավալներին, իրական ինֆորմացիա էր հաղորդում առաջնագծից. «Փաստորեն, ստացվում է, որ իշխանություններն՝ ի դեմս ԱԱԾ-ի, մեղադրանք է առաջադրում այդ էջի ենթադրյալ վարողների նկատմամբ՝ պատերազմի ընթացքում ճշգրիտ ինֆորմացիա տրամադրելու և մարդկանց ապակողմնորոշումից զերծ պահելու համար: Պարզվում է, որ մեր երկրում  սեփական հայրենակիցներին իրական և ճշգրիտ ինֆորմացիա հաղորդողները վտանգ են ներկայցանում պետության համար: Սա Հայաստանի օրվա իշխանությունների իրական դեմքն է, միաժամանակ, այս քայլով, Նիկոլ Փաշինյանը մեկ անգամ ևս ապացուցում է, որ ինքը Հայաստանում գործող բոլոր ֆեյքերի արքան է, տարածվող կեղծիքի և ապատեղեկատվության տիրակալը»,- ասել է  քաղաքագետը:

Գագիկ Համբարյանն ավելացրել է՝ ի հակակշիռ ԱԱԾ-ի վերջին ժամանակների որդեգրած անարժանապատիվ և  նվաստացուցիչ վարքագծի, կուզենար այդ կառույցն, օրինակ` հետաքններ բոլորովին վերջերս հանրապետության երրորդ նախագահի կողմից բարձրաձայնված  մտահոգիչ հարցերը՝ ո՞վ է նախաձեռնել պատերազմի օրերին  600 եվրո արժողությամբ զրահաբաճկոններ պատվիրելու գործը, ինչի՞ն կամ ո՞ւմ են ծառայել այդ զրահաբաճկոնները, երբ մեր նահատակված զինվորների ճնշող մեծամասնությունը զոհվել է, որովհետև չի ունեցել համապատասխան պաշտպանիչ արտահագուստ՝ զրահաբաճկոն, ո՞ւր են գնացել  600 եվրո արժողությամբ զրահաբաճկոնները, ի՞նչ գումարներով են գնվել դրանք  և այլն. «Սերժ Սարգսյանը բացահայտեց նաև, որ ամբողջությամբ փոփոխության է ենթարկվել իր օրոք հաստատված զենքի գնման պլանը: Նույն այդ հարցազրույցից պարզ է դառնում, որ 2020 թվականի դրությամբ, մենք պետք է ունենայինք ոչ պակաս , քան 1000 դրոն: Ինչո՞ւ մենք չունեինք այդ դրոնները, ո՞վ եւ  ինչո՞ւ է փոխել  ռազմամթերքի գնման պլանը և, թե ինչո՞ւ է Նիկոլ Փաշինյանն իր մամուլի քարտուղարի միջոցով հայտարարում, թե չի պատրաստվում մեկնաբանել Սերժ Սարգսյանի տված հարցազրույցը, առաջին պլան բերելով անհոդաբաշխ մտքերով հայտնի իրենց թիմակից  Ռուբեն Ռուբինյանի  բարբաջանքները, կամ պրիմիտիվությամբ աչքի ընկնող և, բառի բուն իմաստով՝ տգետ Մակունցի արդարացումները, որով նա անպտուղ ճիգեր է գործադրում կեղծել՝ պատերազմի վերաբերյալ  Մովսես Հակոբյանի բացահայտած փաստերը: Մենք մինչև այսօր չգիտենք, թե ո՞վ է եղել պատերազմի ընթացքում Արցախի հարավային շրջանների պաշտպանության պատասխանատուն, որի հանցագործության արդյունքում ադրբեջանական զորքին հաջողվել է ճեղքել պատնեշն ու հասնել մինչև Շուշի: Պատերազմից հետո՝ երեք ամիս անց, մինչև այսօր ոչ ոք այդպես էլ չիմացավ Շուշիի հանցավոր ու դավաճանական հանձնման առեղծվածը: Ի վերջո, ոչ ոք չի պատասխանում այն հարցին, թե ինչո՞ւ պատերազմից առաջ Արցախում Ազգային Անվտանգության  ծառայության ղեկավար նշանակվեց թուրքական ծագում ունենալու մեջ կասկածվող Կամո Աղաջանյանն, ում մասին այս իրողությունը հիմա լայն քննարկման թեմա է դարձել հենց ադրբեջանական մամուլում և այլն»:

Ըստ Գագիկ Համբարյանի այսպիսի օրինակները  չափազանց շատ են: Սրանք անպատասխան մնացած և պարզաբանում պահանջող  հրատապ հարցեր են, որոնք նորմալ երկրներում  Ազգային Անվտանգության Ծառայության առջև դրված հիմնական խնդիրները պետք է լինեին, այնինչ, մենք տեսնում ենք, որ փաշինյանական Հայաստանում ԱԱԾ-ն զբաղված է սատանաներ փնտրելով կամ ֆեյքերի հետևում թաքնված  հավանական և չճշտված  անձանց բերման ենթարկելու և ձերբակալելու գործով, միայն նրա համար, որ այդ մարդիկ հանդգնել են հասարակությանը պատմել իրենցից  թաքցվող դաժան իրականության մասին:

 Հեղինակ՝ Նվարդ Մանվելյան

Աղբյուր` Փաստինֆո