Փաստ ինֆո

«Հանրահավաքից առաջ մարդկանց բերման ենթարկելու երևույթն, իմ կարծիքով,  դրական պրոցես է, թեկուզ միայն այն պատճառով, որ ավելի է սրում հանրահավաքի նկատմամբ հետաքրքրությունը, ինտրիգ է հաղորդում հանրության շրջանակներում և այլն: Սրանով իշխանությունները ցույց են տալիս իրենց թուլությունը, որովհետև չեն կարողանում մարդկային լեզվով խոսել հանրության հետ, ցույց տալ իրենց դիրքորոշումը, արդյունքում՝ ոստիկանական ուժի միջամտությամբ մարդկանց բերման և  հետախուզությունների են ենթարկում՝ փորձելով ուժային մեթոդներով  ճնշումներ գործադրել հակառակ ճամբարում գտնվողների նկատմամբ»,- ասում է  քաղաքական վերլուծաբան Ստեփան Դանիելյանը, «Փաստինֆո»-ի հետ զրույցում անդրադառնալով  վաղը կայանալիք հանրահավաքից առաջ լրատվամիջոցի ներկայացուցիչներին բերման ենթարկելու նախադեպի մասին: 

Հիշեցնենք, որ այսօր ԱԱԾ-ն  խուզարկություն է իրականացրել «Քառյակ մեդիա»-ի համահիմնադիր, վերլուծաբան Կարեն Բեքարյանի բնակարանում, որից անմիջապես հետո, վերջինիս  բերման են ենթարկել:

Ստեփան Դանիելյանը նկատում է՝ շատ հետաքրքիր է դիտարկել, թե այսօրվա Հայաստանում լրատվամիջոցների ներկայացուցիչներին կամ քաղաքական գործիչներին  բերման ենթարկելու կամ ձերբակալելու պարագայում մարդու իրավունքներով զբաղված ո՞ր իրավապաշտպան կազմակերպություններն են ակտիվություն ցուցաբերում.

«Ինձ շատ հետաքրքիր է իմանալ, թե ո՞ր հասարակական կազմակերպություններն ու իրավապաշտպաններն են այսօր իրապես  զբաղվում մարդու իրավունքների պաշտպանության գործով, այսինքն, առանց հաշվի առնելու մարդկանց քաղաքական հայացքները, ո՞ր կազմակերպություններն են իրավապաշտպանությամբ զբաղվելով՝ իրականում քաղաքականությամբ զբաղվում և քաղաքական աջակցություն ցույց տալիս այդ մարդկանց: Այս ստատիստիկան պարզելն, իրականում, խիստ դրական և պրոֆիլակտիկ ազդեցություն կարող է ունենալ: Այս առումով, շատ հետաքրքիր կլինի  հետևել նաև Հայաստանում գործող միջազգային կազմակերպությունների և դեսպանատների պահվածքին նույնպես»,- ասում է քաղաքական վերլուծաբանը:

Անդրադառնալով վաղը կայանալիք հանրահավաքի թեմային, Ստեփան Դանիելյանը նշում է՝ չի կարող ասել, թե հստակ ի՞նչ արդյունք կտա վաղվա հանրահավաքը, սակայն, դրանք պետք է շարունակական բնույթ կրեն. «Ավելին ասեմ, կարծում եմ, որ հաջորդ հանրահավաքները պետք է տեղի ունենան «Բարգավաճ Հայաստան» և «Լուսավոր Հայաստան» կուսակցությունների գրասենյակների առաջ: Շատերը կարծում են, թե, ըստ Սահմանադրության, արտահերթ ընտրություններ հայտարարել կարող է միայն Ազգային Ժողովի իշխող մեծամասնությունը կամ երկրի վարչապետն՝ իր ներկայացրած հրաժարականով: Իրականում մարդիկ խորապես սխալվում են, որովհետը տեղյակ չեն,  որ նույնիսկ «Բարգավաճ Հայաստան» կամ  «Լուսավոր Հայաստան» կուսակցությունները միայնակ, առավել ևս՝ միասին, մեկ օրվա ընթացքում ի զորու են խորհրդարանական ճգնաժամ ստեղծել, ինչը կարող է հանգուցալուծվել, միմիայն արտահերթ ընտրություններ հայտարարելով: Մեխանիզմը պարզ է՝ խմբակցություններից մեկը, կամ երկուսը միասին, վայր են դնում մանդատները և, ըստ գործող Սահմանադրության ու ընտրական օրենսգրքի, խորհրդարանն ուղղակիորեն  դադարում է գործել:

Հասկանալու համար, թե ինչո՞ւ նրանք, երկրում ստեղծված այսօրինակ խորը ճգնաժամի պայմաններում, մինչ այս պահը չեն գնացել այդ քայլին, պետք է հաջորդ հանրահավաքներն անցակացնել հենց այդ կուսակցությունների գրասենյակների առջև՝ պահանջելով  սպառիչ բացատրություն տալ՝ ինչո՞ւ նրանք դա չեն անում, ի՞նչ պայմանավորվածություններ ունեն իշխանությունների հետ, արդյո՞ք իրենք երկակի խաղի մեջ չեն, որտե՞ղ են բախվում իրենց  քաղաքական շահերը և  այլն»,- եզրափակելով զրույցն, ասում է քաղաքական վերլուծաբան Ստեփան Դանիելյանը:

 Հեղինակ՝ Նվարդ Մանվելյան

Աղբյուր` Փաստինֆո