Փաստ ինֆո

Սյունիքի մարզի Ներքին Հանդ բնակավայրի հարևանությամբ թշնամին պարբերաբար անկանոն կրակոցներ է արձակում, ընդ որում՝ հատկապես այն ժամանակ, երբ գյուղացիները զբաղվում են գյուղատնտեսական աշխատանքներով։

«Փաստինֆո»-ի հետ զրույցի ժամանակ Ներքին Հանդի գյուղապետ Խաչատուր Բաղդասարյանն տեղեկացրեց, որ հիմնական վարելահողերը սահմանի վրա են, և թշնամու կողմից պարբերաբար արձակվող անկանոն կրակոցների պատճառով մարդիկ վախենում են մոտենալ իրենց հողին․

«Վարելահողերը հիմնականում սահմանի երկայնքով են։ Չնայած գյուղատնտեսական աշխատանքները դեռ ամբողջությամբ չեն սկսվել, կան մարդիկ, որ ուզում են գնալ ու մշակել իրենց հողերը, բայց վախենում են։ Լինում է, որ գնում են մշակելու և երբ կրակոց է լինում, հետ են գալիս։ Հիմա կրակոցներն առաջվա նման չեն։ 15-20 օր առաջ կրակոցներ շատ էին լինում, հիմա փոխվել է։ Կարող է օրվա մեջ մեկ անգամ կրակեն, կամ հինգ օր չկրակեն, հետո նորից կրակեն»,-ասաց Խաչատուր Բաղդասարյանը։

Ներքին Հանդի բնակիչների սոցիալական վիճակն օրեցօր վատանում է։ Գյուղապետը նկատում է՝ եթե այսօր մարդը չի կարողանում իր անասունը պահի, հողը մշակի, պարզ է, որ սոցիալական վիճակը շարունակելու է վատանալ։ Նախկինում գյուղի արոտավայրերը սահմանի տարածքում էին, սակայն հիմա գյուղացիները անասուններին սահմանից հնարավորինս հեռու են տանում արածացնելու․

«Անասուններն այդ տեղին սովոր էին, հիմա նոր վայրում մի քիչ դժվար է պահել, մինչև սովորեն ահագին ժամանակ կանցնի»,-ասաց Խաչատուր Բաղդասարյանը։

Գյուղացիները հերթափոխով են անասուններին տանում արածացնելու և նրանց կողքին մնում, որպեսզի չփախնեն ու սահմանին մոտ չգնան։ Այս ընթացքում գյուղում նման դեպքեր եղել են․ «Նոյեմբերին 3 գլուխ խոշոր եղջերավոր, 7 գլուխ խոզ անցել են սահմանը»,-նշեց գյուղապետը։

Մարդիկ դեռևս մեծ քանակությամբ անասուններ չեն վաճառել․ «Կարող է սոցիալական վիճակից ելնելով 1-2 գլուխ մորթի ընտանիքի համար, բայց դժվարանում են պահել, այնպես չէ, որ չեն մորթելու»,-ասաց Խաչատուր Բաղդասարյանը՝ նշելով, որ գյուղում կա 50 գլուխ խոշոր եղջերավոր և 30-40 գլուխ խոզ։ Քաշաթաղի շրջանից Ներքին Հանդ տեղափոխված բնակիչներ էլ կան, որոնք իրենց հետ 100 գլուխ խոշոր եղջերավոր են բերել։

Խաչատուր Բաղդասարյանը նշեց, որ այս պահին գյուղում 70 մարդ է բնակվում, որոնցից 15-16-ը երեխաներ են։ Գյուղապետի խոսքով գյուղը լքելու մտադրություն բնակիչներից ոչ ոք դեռ չունի, այս ընթացքում գնացողներ չեն եղել։

«Մարդիկ կան վարկ են վերցրել, չեն կարողանում մուծումներն անել։ Այդ հարցն էլ այդպես է մնում»,-հավելեց գյուղապետը՝ ընդգծելով, որ Ներքին Հանդում սոցիալական շատ վատ վիճակ է։

Աղբյուր` Փաստինֆո