Փաստ ինֆո

«Բարգավաճ Հայաստան» խմբակցության պատգամավորներ Նաիրա Զոհրաբյանը, Միքայել Մելքումյանը և Գևորգ Պետրոսյանը չեն պատրաստվում լքել խմբակցությունը: Այս մասին «Փաստինֆո»-ի հետ զրույցում տեղեկացրեցին պատգամավորները: 

Նշենք, որ մամուլում շրջանառվող տեղեկությունների համաձայն՝ Գագիկ Ծառուկյանը մտադիր է նոր ցուցակով մասնակցել հաջորդ ընտրություններին, որտեղ ընգրկված չեն լինելու պատգամավորներ Նաիրա Զոհրաբյանը, Գևորգ Պետրոսյանը, Միքայել Մելքումյանը և, ըստ շրջանառվող լուրերի, նշված երեք պատգամավորները հնարավոր է լքեն ԲՀԿ խմբակցությունը։

Նաիրա Զոհրաբյանը «Փաստինֆո»-ի զրույցում ընդգծեց, որ իր և Գագիկ Ծառուկյանի միջև որևէ տարաձայնություն չկա և չի կարող լինել։ Ըստ նրա՝տարաձայնություններ ուզում են այն մարդիկ, ովքեր մամուլին հետևողականորեն նման տեղեկություն են մատակարարում:

«Ես ուզում եմ հասկանալ՝ ով է հետևողականորեն նման տխմարություններ տարածում, սա կատարյալ աբսուրդ է: Ես հիմա շատ կարևոր առաքելությամբ մեկնում եմ Մոսկվա՝ Պետդումայի հրավերով, իմ խնդիրը ռազմագերիներն են և անհետ կորածները: Ես ուղղակի ժամանակ չունեմ՝ նման կարգի անհեթեթություններ մեկնաբանելու համար: Ես ուզում եմ հարց տալ՝ կարող եք բերել գոնե մեկ պատճառ՝ հանունի որի ես պետք է խմբակցությունից դուրս գամ: Ես սա համարում եմ անհեթեթ տեղեկատվություն, ես չեմ պատրաստվում հերքել կամ հաստատել անհեթեթությունները, դա տարածում են մարդիկ, որոնք երևի շատ են ուզում, որ դա լինի իրականություն, բայց դա իրականություն երբեք չի դառնա»:

Պատգամավոր Միքայել Մելքումյանը նույնպես հերքեց շրջանառվող տեղեկությունը՝ հավելելով որ անհեթեթ խոսակցություններ չի մեկնաբանում.

«Ես «Բարգավաճ Հայաստան»- ում ոչ միայն քաղաքականություն իրականացնող եմ, այլ նաև՝ քաղաքականություն մշակող»,-ասաց Մելքումյանը:

Գևորգ Պետրոսյանը ևս նշեց, որ խմբակցությունը լքելու մտադրություն չունի և չգիտի՝ որտեղից են գալիս նման խոսակցությունները.

«Իմ և Գագիկ Ծառուկյանի միջև ոչ մի խնդիր չկա, միայն մի խնդիր կա ընդհանուր՝ ինչպես անենք, որ ժողովրդի կյանքը բարելավվի: Ես չգիտեմ այդ խոսակցությունները որտեղից են գալիս, իմ հետ նման քննարկում, խոսակցություն չի եղել: Եթե այդպես է՝ ինչու էի երեկ Գագիկ Ծառուկյանի հանձնարարությամբ Ազատության հրապարակում մասնակցում հանրահավաքին և կարծիքներ հնչեցնում, որտեղ ոչ միայն իմ անձնական կարծիքն է հնչել, այլ՝ հնչել է կարծիք, որը կարող է վերագրվել ԲՀԿ-ին»,-ասաց Գևորգ Պետրոսյանը:

Աղբյուր` Փաստինֆո