Փաստ ինֆո

Սյունիքի մարզի Շուռնուխ գյուղի անտուն մնացած մարդկանց համար պետության միջոցներով 12 տուն պետք է կառուցվի, սակայն կառավարությունը նման որոշում կայացրեց, երբ բարեգործներն արդեն որոշել էին գյուղում նոր տներ կառուցել։

Շուռնուխ համայնքի ղեկավար Հակոբ Արշակյանը «Փաստինֆո»-ին ասաց՝ երբ ներքևի թաղից ժողովրդին տարհանել են, բարեգործները ծրագրել են նրանց համար տներ կառուցել․ «Ինձ թվում է՝ երկու կողմն էլ իրար հետ հանդիպել է, խոսել և ընդհանուր կարծիքի եկել, թե ով քանի տուն է կառուցելու, իսկ շինարարական աշխատանքները կատարվում են և՛ բարեգործների, և՛ կառավարության կողմից»,-նշեց Հակոբ Արշակյանը։

Նկատենք, որ այս շաբաթ խորհրդարանում տեղի ունեցած հարցուպատասխանի ժամանակ ՀՀ փոխվարչապետ Տիգրան Ավինյանը, անդրադառնալով Սյունիքում առանց տուն մնացած մարդկանց խնդրին, ասել էր․ «Մեր պայմանավորվածության համաձայն՝ ուղիղ մեկ շաբաթ անց շինտեխնիկան անցավ գործի և չնայած այդ շինարարությունը համայնքապետարանի աշխատակիցների կողմից փորձ արվեց ներկայացնել որպես բարերարների կողմից իրականացվող աշխատանք, ուզում եմ շեշտել, որ դա պետական ծրագիր է և իրականացվում է պետության միջոցներով»։

«Փաստինֆո»-ն կապ հաստատեց նաև Գորիսի համայնքապետի տեղակալ Մենուա Հովսեփյանի հետ, ով ասաց՝ մի խումբ բարերարներ դեռևս նոյեմբերին առաջարկել են անտուն մնացած մարդկանց համար Շուռնուխում բնակարաններ կառուցել ենթակառուցվածքների հետ միասին, և այդ գործընթացն արդեն մի քանի ամիս է, ինչ շարունակվում է․ «Կառավարությունը ևս 11 կամ 12 տուն է կառուցելու։ Փոխվարչապետը 11 տուն է ասում, Սյունիքի մարզպետարանը 12 տուն է ասում։ Ինչ վերաբերում է փոխվարչապետի ասածին, ապա ես ոչ թե ասել եմ, որ կառավարությունը չի անում, այլ ասել եմ, որ կառավարությունը կապ չունի տվյալ շինարարության հետ, որն այդ պահին սկսվել է Շուռնուխում։ Իմ ասածից հետո կառավարությունը տարել մի 5 տրակտոր է լցրել Շուռնուխ, սկսել հողային աշխատանքներ կատարել։ Կարծում եմ՝ հողային աշխատանքը դեռևս շինարարություն չէ։ Այսինքն նրանք պատրաստ են բոլոր գործերը մի կողմ դնել ու թիթեռ նկարել։ Թիթեռ են նկարում նրա համար, որ ընդամենը ասեն՝ ես ճիշտ չեմ ասել։ Նորից եմ ասում՝ կառավարությունը փաստացի իրականացվող շինարարության հետ կապ չուներ, բայց այն, որ կառավարությունը ծրագիր ունի 12 տուն կառուցելու, ճիշտ է, բայց մինչև օրս նրանք հիմնական գործառույթը թողած, փոքր երեխայի նման ինչ-որ պատասխաններ են տալիս»,-նշեց Մենուա Հովսեփյանը։

Շինարարական աշխատանքները նախատեսվում է իրականացնել Շուռնուխի վերևի հատվածում։ Համայնքապետարանը բարերարներին տրամադրում է նաև համապատասխան տեխնիկա։ Առանց տուն մնացած շուռնուխցիները նախքան մշտական բնակավայր ունենալը, այս պահին տարբեր վայրերում են բնակվում։

Շուռնուխի գյուղապետ Հակոբ Արշակյանը, ում տունը ևս անցել է թշնամու վերահսկողության տակ, ընտանիքի հետ այս պահին ապրում է գյուղապետարանում․ «Կան մարդիկ, որ Երևանում, Կապանում են ապրում և տներն ազատ են, դրանք տրամադրել ենք այդ մարդկանց։ Մարզպետարանը երկու տնակ է տվել, որտեղ երկու ընտանիք է ապրում։ Երկու ընտանիք Գորիսում է, երկուսն էլ՝ Կապանում»,-նշեց Հակոբ Արշակյանը։

Գյուղում առկա է նաև լուրջ սոցիալական խնդիր։ Գյուղապետը նշում է՝ կենդանիներն այս եղանակին պետք է դուրս գային՝ արածելու, սակայն դուրս չեն գալիս, քանի որ կարող են փողոցն անցնել ու հայտնվել ադրբեջանական վերահսկողության տակ գտնվող հատվածներում․ «Ստիպված մարդիկ փակի տակ են պահում անասուններին, այս արևոտ եղանակին գոմում են մնում։ Խոտի պակասություն էլ է լինելու։ Այնպես, որ այստեղ արդեն ամբողջ գյուղն է տուժում»,-ասաց Հակոբ Արշակյանը։

Համայնքապետարանում այժմ փորձում են խնդրի լուծման տարբերակ գտնել, քննարկվում է նաև խելացի անասնագոմեր կառուցելու հարցը․ «Քննարկում են խելացի անասնագոմ կառուցել, փակի տակ պահելու սիստեմով։ Կառավարությունն էլ է առաջարկել, որ այդպիսի աշխատանքներ իրականացվեն»,-հավելեց Հակոբ Արշակյանը։

Աղբյուր` Փաստինֆո