Փաստ ինֆո

«Տունը քնած էի, զանգեցին ասեցին, կուզե՞ս օգնական, ես էլ մանկուց երազում էի՝ ասացի այո»,- այս մասին կառավարության շենքի մոտ անհետ կորած զինծառայողների հավաքի ժամանակ ասաց վարչապետի օգնական Գագիկ Իսախանյանը։

Հիշեցնենք, որ նա ևս անհետ կորած զինծառայողների հարազատների հետ ակցիաներ էր իրականացնում՝ փնտրում էր եղբորը, սակայն եղբոր աճյունն արդեն գտնվել և հուղարկավորվել է ։

Իսախանյանը վստահեցրեց՝ կառավարության մոտ է նախ որպես ակցիայի մասնակից։ Նա  հայտարարեց, որ իշխանությունների թերացումների մասին չի կարող խոսել, քանի որ ինքն ատամնաբույժ է,  փոխարենը նա պահը բաց չթողեց լրատվամիջոցներին մեղադրելու համար։

«Լրատվամիջոցները շատ են խանգարում թե որոնողական աշխատանքներին, թե գերիների վերադարձին։ Լրատվամիջոցների պատճառով գերիներից մեկը, որը պետք է վերադառնար, վերջին պահին փոխանակվեց, որովհետև բոլոր լրատվամիջոցները չգիտես խի այդ երեխային էին սպասում ու վերջին պահին այդ երեխուն փոխեցին, ուրիշն եկավ»։

Թե ո՞ր լրատվամիջոցին նկատի ունի վարչապետի օգնականը, պարզ չդարձավ, քանի որ նա  ժամանակ չունի լրատվամիջոցներն ուսումնասիրելու, վստահեցնելով, որ անգամ ֆեյսբուք չունի։

«Եկեք օբյեկտիվ լինենք, հարցերը չխառնենք իրար։ Եկեք մեր բոլոր ծնոնղներին օգնենք գտել իրենց եղբայրներին, հարազատներին, հետո սենսացիաներ էլ կանենք, «ֆեյերվերկ» էլ կանենք, ամեն ինչ էլ կանենք։ Շատ թերություններ եմ տեսել, չեմ ուզում մատնանշել։ Կիսում եմ ակցիա իրականացնողների կարծիքը, բայց բազմազան են կարծիքները։ Ինչ- որ բան  կա՞, որ վարչապետը կարող է անել ու չի անում, թե որպես վարչապետ, թե որպես անձ։ Դեմոկրատիա է մեզ մոտ, ամեն մարդ խոսում է այն, ինչ գիտի»,- եզրափակեց վարչապետի օգնականը։

Աղբյուր` Փաստինֆո