Փաստ ինֆո

Այս իշխանությունը ամեն օր մի անակնկալ է անում՝ բնականաբար վատ իմաստով: Հեղափոխությունից հետո ակնհայտ է լրատվամիջոցների նկատմամբ այս իշխանության ճնշումը, բոլոր հնարավոր միջոցներով փորձ է արվում խոչընդոտել լրատվամիջոցների աշխատանքը: «Փաստինֆո»-ի հետ զրույցում նման տեսակետ է հայտնել «Բարգավաճ Հայաստան» խմբակցության պատգամավոր Նաիրա Զոհրաբյանը՝ անդրադառնալով Սյունիքում լրագրողների աշխատանքի սահմանափակումների վերաբերյալ ԱԱԾ հայտարարությանը:

Հիշեցնենք, որ երեկ ԱԱԾ հայտարարություն տարածեց՝ տեղեկացնելով, որ Սյունիքի մարզի սահմանային տարածքներում տարբեր թեմաներ լուսաբանելու համար լրագրողներին անհրաժեշտ է ունենալ ՀՀ ազգային անվտանգության մարմինների համաձայնությունը:

Նաիրա Զոհրաբյանը այս որոշումը որակեց աբսուրդ և մտավախություն հայտնեց, որ դա միգուցե կապված է Սյունիքում հավանական սահմանային նոր փոփոխությունների հետ.

«Ինչու պետք է լրատվամիջոցը իր օբյեկտիվ տեղեկատվությունը փոխանցելու համար ունենա ԱԱԾ-ի թույլտվությունը: Սա աբսուրդ է, այստեղ տրամաբանական որևէ հիմնավորում չկա: Միգուցե պատճառն այն է, որ արդեն հստակ է՝ ադրբեջանցիներն իրենց GPS-ը գրկած Սյունիքում մետր առ մետր գալիս են առաջ, տեսեք՝ ինչ է կատարվում Խնձորեսկում, անգամ համայնքապետարանը ստիպված եղավ հանդես գալ հայտարարությամբ որովհետև այնտեղ արդեն բազմաթիվ խնդիրներ են առաջացել, ինչն էլ համայնքում առաջացրել է մեծ լարվածություն և բնականաբար առաջիկայում նման խնդիրներ առաջ են գալու Սյունիքի մի շարք բնակավայրերում, և քանի որ այդ տեղեկատվությունը փակելու, հանրությանը չներկայացնելու խնդիր կա, այս պատճառով ԱԱԾ-ն նման հայտարարությամբ է հանդես եկել»,-ասաց Զոհրաբյանը:

Պատգամավորը հորդորեց լրատվամիջոցներին դիմել ԱԱԾ և ստանալ հավելյալ պարզաբանում՝ որն է պատճառը, որ լրագրողը չպետք է կարողանա լուսանկարահանել կամ մեկնաբանել այն ինչ այսօր կատարվում է Սյունիքում.

«Ես ունեմ մտավախություն, որ նման խնդիրների մենք բախվելու ենք Տավուշում և Գեղարքունիքում: Ի դեպ, երեկ Ավինյանը չթաքցրեց, որ բացի նոյեմբերի 10-ի փաստաթղթից կան ևս այլ հավելվածներ, որոնք ինքը ներկայացրեց որպես պետական գաղտնիք: Մենք պետք է հասկանանք՝ ի՞նչ հավելվածներ են դրանք, կարող է այդ հավելվածներով մեր տները հանձնվել են թուրքին, և վաղը թուրքը GPS-ով գալու է մտնի Գեղարքունք կամ Տավուշ և ասի՝ ազատեք այդ տարածքները: Սա աբսուրդ չէ, սա ամենազարհուրելին է, որ ցեղասպանությունից հետո պատահեց Հայաստանի և հայ ժողովրդի հետ»,-ասաց Նաիրա Զոհրաբյանը:

Պատգամավորն արձանագրում է, որ ամեն օր նոր սահմանային փոփոխություններ են լինում, Սյունիքի տարբեր հատվածներում հակառակորդն անընդհատ առաջ է գալիս և մենք ստիպված ենք լինում անընդհատ մեր դիրքերից կատարել հետ նահանջ.

«Առաջիկայում երևի թե այլ սահմանային փոփոխություններ են լինելու: Հիմա հասարակության նյարդերը պրկված են, մարդիկ այլևս չեն վստահում իշխանությանը, և խնդիր կա փակել լրատվամիջոցների բերանը, և այն ինչ իրենք պատրաստվում են անել իրենց գաղտնի հավելվածներով չդառնա հանրության սեփականությունը և էլ ավելի չլարի առանց այն էլ լարված հանրային տրամադրությունները»,-ասաց պատգամավորը»,-ասաց պատգամավորը:

Նաիրա Զոհրաբյանը պատրաստակամություն հայտնեց մասնակցել լրատվամիջոցների շահերի պաշտպանության համար իրականացվող բոլոր ակցիաներին և լրագրողների բողոքի ձայնը հասցնել միջազգային իրավապաշտպան և լրագրողական կազմակերպություններ:

Աղբյուր` Փաստինֆո