Փաստ ինֆո

Երեկ հայրենիք վերադարձած տղաներից երեքը ՄՈԲ-ից են, երկուսը՝ զինծառայող։ Շիրակի մարզպետարանից «Փաստինֆո»-ին հայտնեցին, որ տղաներից երեքը Շիրակից են։ Արարատի մարզպետարանից «Փաստինֆո»-ին հայտնեցին,որ վերադարձած գերիների թվում մեկ զինծառայողը մարզի բնակիչ է, որն արդեն տանն է և ծանր վիրավորումներ չունի։ Մյուս ժամկետային զինծառայողը՝ Ալավերդի համայնքի Աքորի գյուղից է։ Մայրը որդու հետ օնլայն է կապ հաստատել, տեղեկացել առողջական վիճակի մասին։ Վերջինս դեռ շարունակում է հիվանդանոցում մնալ՝ բուժզննման համար։ 

Արցախի նախագահի հատուկ ներկայացուցիչ Բորիս Ավագյանը «Փաստինֆո» հետ զրույցում անդրադառնալով երեկ տարածված տեղեկությանը, թե սպասվում է 20-ից ավելի գերեվարվածների վերադարձին, նշեց, թե չգիտի որտեղից են անհետ կորածների հարազատներն իմացել դրա մասին։

«Չգիտեմ որտեղի՞ց էին տեղեկությունը վերցրել, որ 20 հոգի է վերադառնալու, ես այդ տեղեկությունը չունեի»։
20 հայորդի վերադարձի մասին «Փաստինֆո»-ին տեղեկություն տրամադրած անհետ կորած զինծառայողի հարազատներից մեկը վրդովված նշեց, որ հայկական կողմը իմացել է վերադարձող գերիների թվի մասին, սակայն այդպես էլ հավաքված ծնողներին չեն զգուշացրել։

«Եթե գիտեինք, որ հինգ հոգի են իջնելու, ինչո՞ւ էին ծնողներին այնտեղ պահում, ոչ մեկ չբարեհաճեց դուրս գար, ասեին, որ թեկուզ ինքնաթիռը թռել է հույս չունենաք 20-23 անձի վերադարձին, իրենք լսու՞մ էին չէ, որ մարդիկ սպասում էին 20 և ավելի գերիների վերադարձին, ինչո՞ւ դուրս չեկան ու չասացին, որ 20 չէ, հինգ է, մի սպասեք։ Ինքնաթիռը օդում, արդեն տեղյակ էին, որ հինգ հոգի է»։

62 զինծառայողներ, հրադադարի հաստատումից հետո գերեվարվել էին Հադրութի Խծաբերդ ու Հին Թաղեր գյուղերի տարածքներից, հայրենիք է վերադարձել, ընդհանուր առմամբ, 8-ը։ Բորիս Ավագյանն ասաց, որ գործընթացն առաջ է գնում։

«Շատ բարդ գործընթաց է, որին մեծ աջակցություն է ցուցաբերել Ռուսաստանի նախագահն անձամբ, ՌԴ պաշտպանության և արտաքին գործերի նախարարն են շատ մեծ աջակցություն ցուցաբերել։ Հույս ունենք, որ գործընթացն ավելի կարագանա, բոլորը շուտ կվերադառնան տուն ի շնորհիվ ՌԴ աջակցության։ Կարևոր է, որ գործընթացը սկսվել է և մաքսիմալ կարագանա, որովհետև դա շատ կարևոր է մեզ համար»։
Ադրբեջանական կողմը հայտարարել էր, թե նրանք «դիվերսանտներ» են,արդյոք սա չի խանգարում հետագայում գործընթացի ավելի դանդաղ իրականացմանը, Ավագյանը հակառակն է կարծում։

«Ուրախալի փաստ է անձամբ ինձ համար, որովհետև նրանց որակավորել էին որպես տեռորիստ՝ դիվերսանտներ, շատ ծնողներ հուսահատվել էին ու սպասում էին, որ այդ կարգավիճակի պատճառով Ադրբեջանը գուցե Թուրքիայի օգնությամբ կկարողանա գործընթացը տանել այն ուղղությամբ, որ չվերադարձնի, բայց մենք տեսնում ենք, որ ի աջակցություն ՌԴ-ի՝ նրանք վերադառնում են»։

Գերեվարվածների 62 հոգանոց խմբի մյուս անդամների մասին, ըստ Ավագյանի, կա տեղեկություն, Ադրբեջանում ռուս խաղաղապահների հրամանատարը հանդիպել է նրանց, նրանք նույն վիճակում են, ինչ վիճակում վերադարձված տղաներն են։

«Ֆիզիկապես նրանք նորմալ են, ես խնդրել էի հրամանատարին, որ նա տեսներ մյուս տղաներին, ովքեր Ադրբեջանում են պահվում, այցելել է 30 հոգու, որ տեսնի ֆիզիկական վիճակը, տեսնի որ առողջ են, նրանց չեն խոշտանգում»,- ասաց Ավագյանը։

Աղբյուր` Փաստինֆո