Փաստ ինֆո

Իշխանությունները տեղի ունեցող ողբերգության, կորուստների, ներքաղաքական օրակարգում հասունացած ճգնաժամում իրենց մեղավորությունը գիտակցելու փոխարեն, հերթական անգամ փորձում են մեղավորներ փնտրել և ամեն անգամ սլաքներն ուղղում են ընդդիմության ուղղությամբ: Այս մասին ԱԺ-ում լրագրողների հետ զրույցում ասաց ԲՀԿ պատգամավոր Իվետո Տոնոյանը:

Պատգամավորն ընգծեց, որ խորհրդարանական արտահերթ ընտրություններ կարող են անցկացվել միայն Նիկոլ Փաշինյանի հրաժարականի պարագայում.

«Մենք Նիկոլ Փաշինյանի գլխավորությամբ անցկացվելիք ընտրությունների հետ կապված ունենք շատ լուրջ վերապահումներ: Իշխանության ներկայացուցիչները չունեն բավականաչափ ազնվություն խոստովանելու, որ ոչ թե չկա ընտրությունների հանրային պահանջ, այլ ուղղակի Նիկոլ Փաշինյանը պատրաստ չէ հրաժարականի, պատրաստ չէ զրկվելու կառավարության ղեկավարի համար սահմանված բարիքներից»,-ասաց պատգամավորը:

Իվետա Տոնոյանն ընգծեց, որ իրենց օրակարգում շարունակում է մնալ Նիկոլ Փաշինյանի հրաժարականի պահանջը.
«Առանձին գործիչներ, որոնք պարբերաբար փորձում են հանդես գալ ընդդիմության մասին իրենց դիտարկումներով,լավ կլինի սեփական թիմի ներսում թիմի ներկայացուցիչների հայտարարությունները փորձեն վերարտադրել»:

Անդրադառնալով «Իմ քայլը«» խմբակցության հայտարարությանը՝ թե հանրության շրջանում արտահերթ ընտրություններ անցկացնելու պահանջ չկա, Տոնոյանն ասաց.

«Տպավորություն է, որ այդ հարցումներն Ադրբեջանում են իրականացվել, և Ադրբեջանում հանրային պահանջ չկա Հայաստանում ընտրություններ անցկացնելու՝ հաշվի առնելով, թե ադրբեջանական մամուլում և սոցցանցերում ինչ մեծ ոգևորություն առաջացավ, իմ քայլը խմբակցության՝ արտահերթ ընտրություններ չանցկացնելու վերաբերյալ հայտարարությունից հետո»,- նշեց Իվետա Տոնոյանը։

Իվետա Տոնոյանի համոզմամբ՝ իշխանությունը վախենում է սպասվող արտահերթ խորհրդարական ընտրություններից, քանի որ նրանց՝ մեծամասնություն կազմելը հավանական չէ.

«Իշխանությունը վախենում է, և դրա համար ունի բավարար հիմքեր, քանի որ նրանք չունեն հանրային աջակցություն և մեծամասնություն կազմելու մասին խոսք լինել անգամ չի կարող։ Եթե 2018 թվականին, երբ իրականացվեց հեղափոխության հանրաքվե և ոչ թե արտահերթ խորհրդարանական ընտրություններ, և «Բարգավաճ Հայաստան» կուսակցությունը 100 հազարից ավել մեր հայրենակիցների վստահության քվեն ստացավ և մեծությամբ առաջին ընդդիմադիր խմբակցությունը դարձավ։ Մենք որևէ վախենալու բան չունենք։ Մենք ունենք մեր համախոհների բանակը, մեր ընտրողներին և հետհեղափոխական տարիներին մեր վարկանիշը վստահաբար աճել է»,- ասաց Իվետա Տոնոյանը։

Իվետա Տոնոյանը հայտնեց, որ փետրվարի 20-ին սպասվող հանրահավաքին Գագիկ Ծառուկյանը հնարավոր է անձամբ մասնակցի։

Աղբյուր` Փաստինֆո