Փաստ ինֆո

Պետք է հասկանանք՝ հանրային պահանջն ինչ չափումներով է գրանցվել։ Եթե դրանք սոցիալական հարթակներն են կամ նմանատիպ այլ խողովակները, ապա չեմ կարծում, որ դրանք արտացոլում են շոկային իրավիճակում գտնվող ժողովրդի դիրքրոշումը: Այս մասին լրագրողների հետ զրույցում ասել է ԱԺ անկախ պատգամավոր Գոռ Գևորգյանը՝ անդրադառնալով «Իմ քայլը» խմբակցության հայտարարությանը՝ որ հասարակության լայն շերտի մոտ արտահերթ ընտրությունների պահանջարկ չկա:

Պատգամավորը կարծում է որ ընտրություններ անցկացնելն անհրաժեշտ է, սակայն դրա  հարմար ժամանակ է պետք.

«Ընտրությունները չպետք է ինքնանպատակ լինեն: Ընտրությունները պետք է գան խնդիրներ կարգավորելու համար, այլ ոչ թե հավելյալ խնդիրներ ստեղծելու: Ես չեմ կարծում, որ նման ծայրահեղ լարված սոցիալական մթնոլորտում և հանրային փոխհարաբերություններում առկա ատելության պայմաններում մենք կարող ենք գնալ ընտրությունների, բայց միևնույն ժամանակ հստակ պետք է նշվի, որ ընտրությունները մնում են միակ բանալին ստեղծված իրավիճակից դուրս գալու համար»,-ասաց պատգամավորը:

Գոռ Գևորգյանն ընգծել է, որ ժողովուրդն ինքը պետք է որոշի՝ որ ճանապարհով է գնում և ում հետ է գնում.

«Հաղթանակի վրա ամբողջությամբ վստահ իշխանությունը գնում է դեպի այդ հաղթանակը, և եթե այստեղ կա երկմտանք, հետևաբար կա նաև տեղեկատվություն առ այն, որ ամեն ինչ չէ, որ միանշանակ է»,-ասաց Գոռ Գևորգյանը:

Աղբյուր` Փաստինֆո