Փաստ ինֆո

Բելգիան այս պահին պասիվ վիճակում է։ Սփյուռքի ներկայացուցիչները պետական ո՞ր մարմին էլ դիմեն, դրական որևէ պատասխանի ակնկալիք չեն կարող ունենալ, քանի որ առաջին հերթին պետք է պարտված իշխանությունը փոխվի։

«Փաստինֆո»-ի հետ զրույցում միջազգային դաշինքի անդամ բելգիաբնակ Սարգիս Սիմոնյանը, որը Հայաստանի և Արցախի շահերն է պաշտպանում միջազգային ատյաններում նշեց, որ պարտված իշխանությունները Սփյուռքի համար խնդիրներ են առաջացնում․ որևէ գործողություն չեն կարողանում իրականացնել, քանի որ ավելի շատ իրավունք է ստանում այն կողմը, որը շահել է պատերազմում, այս դեպքում այդ կողմն Ադրբեջանն է։

«Քայլեր անում ենք, դիմումներ ուղարկում ենք, բայց որտեղ ուղարկում ենք այդ դիմումները, տվյալ կառույցները պատասխանատվությունից դուրս են գալիս՝ նշելով, որ գոյություն ունի Մինսկի խումբ, որի որոշումներից է կախված ամեն ինչ։ Այսինքն՝ Բելգիան պատասխանատվությունն իր վրայից գցում է։ Եթե Փաշինյանի տեղն ուրիշ մեկն էլ լիներ, նույն գործընթացն էր լինելու։ Խնդիրն այն է, որ երբ իշխանությունը պարտվում է, պետք է փոխվի, որովհետև չի ընդունվում, արհամարվում է և այն կառույցները, որոնց դիմում ենք, պատճառաբանություններ են գրում, որ չմիջնորդեն։ Այստեղի հայերը ոչինչ չեն կարող անել այնքան ժամանակ, մինչև իշխանությունները չփոխվեն»,-նշեց Սարգիս Սիմոնյանը՝ նշելով, որ այս պահին Եվրոպայի կողմից միայն հումանիտար օգնություն է փոխանցվել։

Եվրոխորհրդարանի կողմից 3․9 մլն եվրո է փոխանցվել, սակայն Սարգիս Սիմոնյանը նկատում է՝ դեռևս չեն տեսնում այդ գումարների արդյունավետ օգտագործումը։

Բելգիաբնակ Սարգիս Սիմոնյանն ասաց, որ դիմել են Եվրոխորհրդարանին, ներկայացրել պատերազմի ընթացքում գրանցված բոլոր խախտումները, այդ թվում կասետային ռումբերի կիրառումը, ինչպես նաև պատերազմական այլ անօրինական գործողություններ, բայց ամբողջ պատասխանատվությունը դրվում է Մինսկի խմբի վրա․ «Եվրոպան հրաժարվեց մեզ օգնել՝ ասելով, որ եթե մեր վարչապետը չի դիմել Արցախի օրինական ճանաչման համար, ապա ինչու ենք մենք կատարում այդ քայլը։ Այսինքն՝ պետական մակարդակով ոչ մի դիմում չի եղել։ Եվրոպան հումանիտար օգնություն է ցուցաբերում, բայց մնացած հարցերում չի միջամտում»,-ասաց Սարգիս Սիմոնյանը։

Վերջինս նշեց՝ պատերազմի ողջ ընթացքում Սփյուռքի հետ հաղորդակցություն չի եղել։ Հայաստանից հստակ նորություններ չէին կարողանում ստանալ և հիմնվում էին լրատվամիջոցների ասածների վրա․ «ԱԳ նախարարը պարտավոր էր յուրաքանչյուր պետությունում գտնվող հայկական համայնքի հետ պահպանել հարաբերությունները։ Դիմել էինք Եվրոխորհրդարան, որպեսզի Հայաստանում ու Արցախում մոնիթորինգ իրականացնենք՝ հասկանալու այնտեղ տիրող իրավիճակը։

Անգամ այդ հարցում Հայաստանը չընդառաջեց, ասացին՝ Մինսկի խումբն է որոշում կայացնողը։ Որոշեցինք Հայաստան գալ, բայց ինչ ներկայացվեց որպես զեկույց, դա պետական մարմինների կողմից չէր արվել, հետևաբար չէր կարող պաշտոնապես ընդունվել, որպեսզի քայլերի դիմեն։ Եթե Սփյուռքին դիմում են միայն օգնության համար, բայց այլ հարցերով Սփյուռքն իրավունք չի ստանում, արդեն հիասթափություն է առաջանում»,-նշեց Սարգիս Սիմոնյանը՝ ընդգծելով, որ եթե մոտակա 2 ամսվա ընթացքում Հայաստանում փոփոխություն չլինի, ապա նոր պատերազմ է սպասվում։

Սարգիս Սիմոնյանը կարծում է՝ ոչ մի պետություն չի կարող ընդառաջել Հայաստանին այնքան ժամանակ մինչև իշխանությունը չփոխվի։

«Թող մենք չորոշենք, թե ով է լինելու վարչապետ, բայց չէ՞ որ եթե Սփյուռքում ենք, ուզում ենք մեր հայրենիքը պաշտպանել, պետք է ռեսուրսներ տան, որ դրանց հիման վրա կարողանանք պաշտպանել պետությունը։ Բայց ոչ մի ռեսուրս չի փոխանցվել մեզ, համագործակցությունը թափանցիկ չէր և ամեն մեկն ինքնուրույն անում էր այն, ինչ կարողանում էր»,-եզրափակեց Սարգիս Սիմոնյանը։

Աղբյուր` Փաստինֆո