Փաստ ինֆո

ԱՀ ԱԺ նախկին պատգամավոր, ազատամարտիկ Վահան Բադասյանի աջակիցները ԱԱԾ շենքի դիմաց էին՝ աջակցելու Բադասյանին։

Ավելի վաղ հայտնել էինք, որ Եռաբլուրում հնչեցրած հայտարարությունների համար Վահան Բադասյանը բերման է ենթարկվել ԱԱԾ, ինչի մասին տեղեկությունը «Փաստինֆո»-ին հաստատել էին նաեւ ՀՀ գլխավոր դատախազությունից։ Բադասյանի աջակիցներին, սակայն, ԱԱԾ աշխատակիցները վստահեցնում էին, որ Վահան Բադասյանն այնտեղ չէ։

ԱԱԾ-ի դիմաց հավաքվածները հայտնեցին, որ Վահան Բադասյանին զանգելու մեկ հնարավորություն են տվել․ «Զանգել է հարազատներից մեկին ու ասել, որ փաստաբանի հետ կապնվեն և ԱԱԾ ուղարկեն։ Հիմա ասում են, որ ԱԱԾ-ում չէ։ Ոստիկանությունը տեղյակ չէ, ԱԱԾ-ն տեղյակ չէ՝ որտե՞ղ է Վահան Բադասյանը, փաստորեն առևանգվա՞ծ է»,-նման մտահոգություն հայտնեցին Բադասյանի աջակիցները՝ նշելով, որ լրատվամիջոցների տարածած այն տեղեկությունները, որ Վահան Բադասյանն ԱԱԾ-ում է կա՛մ պետք է հերքվեն, կա՛մ հաստատվեն։

Հիշեցնենք, որ այսօր Եռաբլուրում ԱՀ ԱԺ նախկին պատգամավոր Վահան Բադասյանը հայտարարել է, որ Նիկոլ Փաշինյանը կործանել է բանակը և նրան պետք է հեռացնեն ոչ միայն որպես պարտության խորհրդանիշ, այլև թշնամի․«Հեռացնելու տարբեր ճանապարհներ կան ընդհուպ ֆիզիկապես հեռացնելը։ Դա ենթադրում է այն, որ թշնամուն պետք է վերացնենք, թեկուզ զենքի ուժով։ Այո, ես գիտակցաբար սպառնալիքի կոչեր եմ անում, թող ԱԱԾ-ն ձերբակալի ինձ։ Ցանկացած մեկը պետք է ցանկանա թշնամուն ոչնչացնել։ Դա անհատները պետք է անեն։ Ես ինքս պատրաստ եմ դրան»,-ասել է Վահան Բադասյանը։

Աղբյուր` Փաստինֆո