Փաստ ինֆո

Ես չեմ ընդունում, որ ընդդիմադիր դաշտի ներկայացուցիչ եմ: Ես առաջիններից  եմ, որ ասել եմ, թե մեր իշխանությունը պետք է հրաժարական տա, պարտված իշխանությունը չի կարող շարունակել ղեկավարել: Այս մասին լրագրողների հետ զրույցում ասաց «Թովմասյան» հիմնադրամի նախագահ, գործարար Արտակ Թովմասյանը:

Գործարարը նկատում է, որ 105 տարվա ընթացքում արժանաատվության հետ կապված խնդիր չենք ունեցել, իսկ հիմա, որպես հայ մարդ, մեր արժանապատվությունն է ընկած.

«Մենք բոլորս համախմբվեցինք, ամեն մեկս իր չափով արեց, կռվեց, օգնեց: Բայց այսքանից հետո շնորհակալության փոխարեն լսեցինք՝ որ երկրի ղեկավարն ասում էր՝ փախչում էիք, չէիք կռվում: Դա է ամենավիրավորականը»:

Գործարարն ընդգծեց, որ վերջին 2 տարում հասարակությանը բաժանել էին սևերի և սպիտակների, հների-նորերի, ինչի արդյունքում էլ ունեցանք այսքան կորուստներ.

«Դուք ձեզ հարց չե՞ք տվել՝ հնարավո՞ր էր արդյոք, որ չլիներ պատերազմ և փաստաթուղթը ստորագրվեր, ինձ թվում է՝ հնարավոր էր: Արդյո՞ք հնարավոր էր նույնը ստորագրել,  վերադարձնել  5+2 շրջան, ունենալ ինչ-որ ստատուս կամ պայմանավորվածություն Արցախի հետ կապված և պատերազմ չլիներ։ Մենք չէինք ունենա այս կորուստները, որ ունենք, այսինքն՝ չէինք ունենա 5000 զոհ և անհետ կորածներ, որոնցից  յուրաքանչյուրը մի ընտանիք պիտի կազմեր։ Ստացվում է մենք մոտ 20000 հոգի կորցրեցինք»,-լրագրողների հետ զրույցում ասաց Արտակ Թովմասյանը:

Աղբյուր` Փաստինֆո