Փաստ ինֆո

«Իմ քայլ»-ը  խմբակցությունը նախաձեռնել է խորհրդարանը ինքնալուծարման տանելու սահմանադրական փոփոխություն։ Թեմայի մասին «Փաստինֆո»-ն զրուցել է ԱԺ «Բարգավաճ Հայաստան» խմբակցության պատգամավոր, իրավաբան Գևորգ Պետրոսյանի հետ։

-Պարոն Պետրոսյան, ինչպե՞ս եք վերաբերվում  Սահմանադրությունում փոփոխություններ նախաձեռնելու  իշխող ուժի որոշմանը։ Կա՞ դրա անհրաժեշտությունը։

-Նախագծին տեղյակ չեմ, բայց գաղափարին դեմ եմ, որովհետև այսօր Ազգային ժողովը ինչի՞ն է խանգարում, որ լուծարեն։ Դրանով ի՞նչ խնդիր են ուզում լուծել։ Եթե ուզում են արտահերթ խորհրդարանական ընտրություններ, իմ կարծիքով դրա անհրաժեշտությունը չկա, որովհետև խորհրդարանը իր բոլոր թերություններով հանդերձ, շարունակում է աշխատել և այսօր ցանկացած ընտրություն դուք շատ լավ գիտեք, որ պետական բյուջեի վրա ահռելի գումարներ է նստում և ինչո՞ւ դա պետք է արվի։ Եթե դա հանուն Նիկոլ Փաշինյանի  ընտրության  է արվում, որպես փրկօղակ, ուրեմն թող ինքը բարոյականություն  ունենա հրաժարական տա, թող ընտրվի նոր վարչապետ, որը կկարողանա իր ձևավորած պրոֆեսիոնալ թիմով Ազգային ժողովի  հետ ներդաշնակ աշխատել, ոչ թե այսօր մենք  մարդկանց  փրկելու համար հիմնարկներ ենք լուծարում, հիմնարկներ ենք ստեղծում։ Այդպես չի կարելի։

Մեզ ասում են, դուք պաշտոնի կռիվ եք տալիս, ի՞նչ պաշտոնակռվի մասին է խոսքը։ Այդ իրենք են պաշտոնակռիվ տալիս, վախենում են, որ հանկարծ պատգամավոր չլինեն, ուրիշ ոչ մի բան չեն կարող աշխատել։ Մենք նման խնդիր չունենք։ Եթե Ազգային ժողովը չարդարացնի իր գործունեությունը, խնդիր չկա, կարելի է լուծարել, բայց պատգամավորներն ի՞նչ մեղք ունեն, երբ  Նիկոլ Փաշինյանը՝ լինելով գերագույն գլխավոր հրամանատար, ձախողեց պատերազմը։ Ինչի՞ է  այդ ամբողջ մեղքը ուզում բարդել ԱԺ-ի վրա, ես չեմ հասկանում։ Թող ինքը հրաժարական տա, ԱԺ-ն կընտրի նոր վարչապետ, որը թե հեղինակությամբ, անցյալի մաքրությամբ, թե ունեցած կապերով կարող է ապահովել ներդրումներ, զարգացնել տնտեսությունը։

-Ռազմական դրության ժամանակ ԱԺ-ն ինքնալուծարմանը տանելու իշխանության գործողություններն ինչպե՞ս եք գնահատում։

-Եթե չեմ սխալվում ռազմական դրության ժամանակ սահմանադրության մեջ փոփոխություններ անելու արգելք չկա ։ Այս ընթացքում ամենակարևոր հարցը իշխանությունը Նիկոլ Փաշինյանից ազատելն է։ Նա է մեր գլխավոր սպառնալիքը։ Նա ընդհանրապես չպիտի լինի լծակ տնօրինող՝ ի դեմս ԱԱԾ-ի և ոստիկանության, հակառակ դեպքում վերահսկողության տակ է վերցնելու ընտրական գործընթացը և իր համար թվեր նկարի, ծեծ ու ջարդ անի, ոստիկաններին լարի ժողովրդի ուղղությամբ, ոնց որ հիմա է անում։ Նա բարձր արդյունք կգրանցի՝ ցույց տալու ամբողջ աշխարհին, որ ինքը դեռևս շարունակում է մնալ որպես վստահություն վայելող քաղաքական գործիչ և դրանով հավերժացնել իր իշխանությունը։ Դրա համար ոչ մի պարագայում չպետք է թույլ տանք արտահերթ ընտրություններ՝ իր  գոյության պայմաններում։

-Ինչի՞ց են վախենում իշխող ուժի պատգամավորները, ինչո՞ւ են ուզում ու համաձայնում ամեն կերպ իշխանության պահել Նիկոլ Փաշինյանին։

-Որովհետև տարբեր գործիչներ խոստովանել են, որ շատերը ուսապարկի կարգավիճակ ունեն և առանց Նիկոլ Փաշինյանի, իրենք ոչ մի բանի չեն կարող հասնել։ Քիչ մարդիկ կան, որոնք անհատականություններ են, որոնց կյանքը պայմանավորված չէ Նիկոլ Փաշինյանով։ Եթե Նիկոլ Փաշինյանը չլինի իշխանության գլխին և չվերահսկի, ապա իրենց համարյա 90 տոկոսը չի հայտնվելու ԱԺ-ում։ Իսկ էնտեղ մարդիկ կան, որ եթե պատգամավոր չլինեն, շատ անհայտ է, թե ինչով պետք է զբաղվեն, որ կարողանան հանապազօրյա հացը հայթայթեն։

-Սահմանադրական փոփոխությունը, չպե՞տք է բխեցնի, որ նաև գործադիրը փոխվի, թե այս կերպ փորձ է արվում գործադիրը պահել՝ վերարտադրվելու համար։

-Եթե ԱԺ-ն լուծարվեց, բնականաբար նոր ընտրություն է լինելու, սա էլ բերելու է   կառավարության փոփոխության։ Նիկոլ  Փաշինյանը պետք  է հրաժարական տա ու ԱԺ-ն իր թիմակիցներով ընտրի նոր վարչապետ և այդ նույն  վարչապետը կարողանա ապահովել ԱԺ- կառավարություն ներդաշնակ համագործակցությունը և շարժվենք առաջ։ Բանը հասել է նրան, որ հանուն իրեն՝ պետական մարմիններ են լուծարում ու ստեղծում։ Հասկանալով իր հանցավոր գործունեությունը՝ զբաղված է բացառապես իրեն ապահովագրելով։

-Հնարավո՞ր է այս գործողություններին զուգահեռ  ընդդիմությունը իմպիչմենտի գործընթաց նախաձեռնի։

-Դրա համար 44 ձայն է պետք, բայց դա ինքնանպատակ կլինի, եթե  քվեարկությունը չլինի  ձայների մեծամասնությամբ, այսինքն՝ 67 ձայնով, իսկ այսօր այդքան ձայն ԲՀԿ-ն և ԼՀԿ-ն չունեն, իրենցից մարդիկ պետք է միանան մեզ, այստեղ է հարցը, թե ովքե՞ր իսկապես, ռեալ կգնահատեն  մարտահրավերները ու վտանգները, կգան ոչ թե զուտ կուսակցական շահ սպասարկելու  կամ մանդատը փրկելու ճանապարհով, այլ օբյեկտիվ ճանապարհով, որպեսզի կարողանանք ընդհանուր ջանքերով երկիրը դուրս բերել այս վիճակից։

-Ըստ Ձեզ, կլինեն նման պատգամավորնե՞ր։

-Ես հույս ունեմ, որ կգտնվեն մարդիկ, բայց այդ մարդկանց թիվն է կասկածելի։ Մեզ պետք է 22-ից ավելի պատգամավոր, որ միանա քվեարկությանը և կողմ  քվեարկի վարչապետի անվստահությանը։ Նախաձեռնել կարող ենք 44 պատգամավորով, բայց որոշումը կայացնելու համար պետք է  67 ձայն։ Այս պահի դրությամբ, անկեղծ ասած, կասկածում եմ, որ 67 ձայն  կապահովվի, որովհետև այսօր բան ու գործները թողած փոխանակ ղեկավարի տարօրինակ  հայտարարությունները ըմբոստանալուն, լծվել են այդ  հայտարարությունները հիմնավորելու գործին։ Հուսով եմ, 22 պատգամավորներ ուժ կգտնեն ու կկանգնեն ոչ թե Նիկոլ Փաշինյանի, այլ ՀՀ-ի կողքին։

Աղբյուր` Փաստինֆո