Փաստ ինֆո

Շուշին բուն հայկական, պատմամշակութային քաղաք է, որի մասին վկայում են բոլոր հուշարձանները և Շուշիում առկա 11 եկեղեցիները, պետք է այդ մասին խոսենք, ոչ թե Ալիևի աչքին լավ երևալու համար, հայտարարենք, որ Շուշին ադրբեջանական է: Այս մասին «Փաստինֆո»-ի հետ զրույցում ասաց Շուշիի նախկին քաղաքապետ Արծվիկ Սարգսյանը:

Վերջինս վստահեցնում է՝ 60-ական թվականներից սկսած Հեյդար Ալիևը սկսել է Շուշին հայաթափել, եղել է 10 տոկոս հայություն, բայց դա չի նշանակում, որ պետք է հայտարարենք՝ Շուշին ադրբեջանական է եղել.

«Շուշին Սովետի ժամանակ հայաթափել են, ադրբեջանցիների նպատակն է եղել, որ Շուշին հայաթափեն, Արցախը, Նախիջևանը չէի՞ն հայաթափում»,-ասաց Շուշիի նախկին քաղաքապետը՝ հավելելով՝ դրա մասին պետք է խոսեն, ոչ թե մեղքերին քավություն տալու համար հայտարարեն՝ Շուշին ադրբեջանական է եղել:

«Շուշիում ամեն մի քարը հայկական է, այն ժամանակ, երբ տեխնիկա չի եղել քարը ձեռքով ենք տաշել, որ տուն ու եկեղեցի կառուցենք: Ավերածություններ եղել են։ Սովետի ժամանակ չեն կարողացել Շուշին վերականգնել, հին հայկական պատմամշակութային շենքերը մնացել են, դա չի՞ խոսում, որ Շուշին հայկական է եղել»,-պատմում է Արծվիկ Սարգսյանը:

Վերջինս նկատում է, որ այս հայտարարությունները թշնամուն ուժ են տալիս և միշտ զանգի պես հնչեցնելու են՝ տեսեք՝ դուք եք ասել, որ Շուշին ադրբեջանական է եղել.

«Նախիջևանը հայկական է եղել, հետ բերեք, պահանջեք, Գետաշեն և Շահումյան ենք ունեցել, ու՞ր են դրանք: 98 տարեկան Ադրբեջանը եկել, դարձել է պետություն, մենք հայտարարում ենք, որ Շուշին ադրբեջանցիներով բնակեցված է եղել, իհարկե, ստիպողաբար տարել բնակեցրել են: Էլի նույնն է կատարվելու, որքանով տեղյակ եմ, ադրբեջանցիներ չեն ուզում գալ և Շուշիում բնակվել։  Նրանց սրտում նախկին վախը կա, որ մի օր հայը արթնանալու է, ոգին ուժեղ է լինելու և նորից մտնելու է Շուշին: Եթե Շուշին ադրբեջանական է, բա Քարինտակի, Հադրութի, Սղնախի մասին ի՞նչ ասենք, ինչու՞ չեք բարձրաձայնում, ասեք՝ դրանք էլ հայկական են եղել, հետ տվեք»,-ասաց Արծվիկ Սարգսյանը:

Նախկին քաղաքապետն արձանագրում է՝ սա հայտարարություն չէ, այլ՝ դավաճանություն:

«30 տարի սարքել ենք Շուշին, հետո հայտարարում են դժգույն քաղաք է, էլ ի՞նչ ասես: Իրենք այդպես են ասում, որպեսզի կարողանան իրենց սխալները ինչ-որ ձնով ծածկեն, բայց այդ ձյունը մի օր հալվելու է»,-ասաց Սարգսյանը:

Արծվիկ Սարգսյանը կարծում է, որ նման հայտարարություններով իշխանությունը ցանկանում է ադրբեջանական իշխանության աչքերին բարձրանալ, սակայն ոչ մի հայ դա երբեք չի ընդունի:

«Ով Շուշիում եղել է, Շուշիում քայլել և օդը շնչել, այդ արտահայտությունը չի անի: Շուշին ազատագրելուց հայը ոգևորվեց և սկսեց Արցախի մյուս շրջաններն ազատագրել: Այն ինչ ազատագրել ենք, Արցախ աշխարհի հողերն են եղել, որտեղ գնացել ենք սրբավայր է, ոնց կարող ենք ասել ադրբեջանական է եղել, մի օր էլ կարող է ասենք հայ ազգ չի եղել»,-մեզ հետ զրույցում ասաց Շուշիի նախկին քաղաքապետը:

Աղբյուր` Փաստինֆո