Փաստ ինֆո

Նոյեմբերի 9-ին հայտնի փաստաթուղթը ստորագրելուց հետո Սյունիքի վերաբերյալ դեկտեմբերի 17-ին իջեցվել է հրահանգ, որ այն նպաստավոր դիրքերը, որ մեր տղաները զբաղեցնում են, հետ քաշվեն և կանոնավոր բանակը ներգրավվել է միայն հունվարի 5-ից հետո։ Ե՞րբ է հնչեցվել այդ հրահանգը և ինչու է կանոնավոր բանակն այդ ժամանակահատվածում սյունեցիներին թողել մենակ։ Խրամատների, խրամաբջիջների, հողաթմբերի, կապի ապահովման և այլ ինժեներական աշխատանքները մեկ օրում լուծվող հարց չեն և դա կանգնեցրել է լուրջ խնդիրների առաջ։ Երբ և ինչ պայմաններում, ինչն է դրդել, որ պայմանագրից դուրս այդ խնդիրն ի վնաս Հայաստանի և Արցախի՝ դրվի մեր տղաների առաջ։ Այս մասին ԱԺ-ում հայտարարել է Արտյոմ Ծառուկյանը՝ հարցեր ուղղելով Փաշինյանին։

Փաշինյանն արձագանքեց հարցին՝ նշելով, թե հնչող մեղադրանքները հաճախ մերժող և չեզոքացնող են և մի դեպքում իրենց մեղադրում են տարածքներ տալու համար, մյուս կողմից՝ մեղադրում են, որ տարածքները չեն տվել՝ ինչ-որ իրադարձություններից խուսափելու համար։ Փաշինյանի խոսքով՝ կայացված որոշումները կայացվել են ռազմական էսկալացիան, այդ թվում՝ Սյունիքում կանխելու և Սյունիքի անվտանգությունն ապահովելու համար։

Վերջինս պնդեց, թե Սյունիքից ոչ մի տարածք, ոչ մի միլիմետր տարածք չի զիջվել, որովհետև Սյունիքի այսօր գոյություն ունեցող տարածքն արձանագրված է, այդ թվում՝ 2010թ ՀՀ վարչատարածքային բաժանման մասին օրենքով, որին կողմ է քվեարկել նաև «Բարգավաճ Հայաստան» խմբակցությունը, այդ թվում՝ դահլիճում նստած պատգամավորներ, որոնք արձանագրել են, որ օրինակ Շուռնուխ համայնքի վարչական գծից այն կողմ գտնվում է Ադրբեջանի Հանրապետությունը։

«Բայց ես հասկանում եմ նաև, որ սերունդ է մեծացել, որը երբեք չի տեսել այն Սյունիքը, որը եղել է 1990թ առաջ և որը չի տեսել այն Սյունիքը, որն արձանագրված է ՀՀ վարչատարածքային բաժանման մասին օրենքով։ Այդ օրենքին կողմ քվեարկած բոլոր խմբակցությունները. առանց բացառության, ընդդիմություն են և իրենք են գծել Սյունիքի այն տեսքը, որն այսօր կա»,- նշեց Փաշինյանը՝ հավելելով, թե բանակցային բոլոր գործընթացներով, այդ թվում այն գործընթացով, որը ՀՀ-ն պատրաստակամություն էր հայտնել ստորագրելու դեռևս 2011թ և որի ստորագրումը մերժել է Ադրբեջանը, Կուբաթլուի և Զանգելանի շրջանները պետք է հանձնվեին Ադրբեջանին։

Ծառուկյանն էլ ավելացրեց, որ նոյեմբերի 9-ի հայտարարությունում Կովսականի վերաբերյալ որևէ բան չի տեսել և խնդրեց հստակ պատասխանել հարցին՝ երբ է ՊՆ նախարարին իջեցվել հրահանգ, որ մեր տղաները զբաղեցրած դիրքերից ետ քաշվեն, ինչ եղավ կանոնավոր բանակը և ինչու է հունվարի 5-ից հետո միացել Սյունիքի պաշտպանությանը։ Ծառուկյանը նշեց, որ վարչատարածքային բաժանումների վերաբերյալ նախկին հղումները հասկանում է և խնդրեց կոնկրետ և հստակ պատասխանել հարցին՝ ինչու է կանոնավոր բանակը միացել հունվարի 5-ից հետո։

«Դուք պատկերացնում եք հավանաբար՝ այդ ժամանակահատվածում մեր ժողովրդի և տղաների վիճակը՝ հատկապես նոյեմբերի 9-ի այդ հայտնի փաստաթուղթը ստորագրելուց հետո։ Զուտ մարդկային առումով նաև՝ ինչ վիճակի մեջ է դրել մեր տղաներին»,- նշեց պատգամավորը, ինչին ի պատասխան էլ Փաշինյանը շարունակեց իր արդեն ավանդական դարձած թեզը, թե դա արվել է հենց նշված տղաների անվտանգությունը պաշտպանելու համար։

Աղբյուր` Փաստինֆո