Փաստ ինֆո

«Այս մակարդակի դիլետանտիզմը, ամեն ինչից անտեղյակությունն ու այս մակարդակի ցինիզմը, ապաշնորհությունը վկայությունն է այն բանի, որ մենք այսօր ունենք կորսված Արցախ, որ մենք այսօր ունենք ՀՀ անվտանգությանը սպառնացող լրջագույն ռիսկեր։ Սա ողբերգություն է և բնավ ծիծաղելի չէ»,- այս մասին «Փաստինֆո»-ի հետ զրույցում ասաց ԱԺ ԲՀԿ պատգամավոր Նաիրա Զոհրաբյանը՝ անդրադառնալով ԱԺ փոխնախագահ Լենա Նազարյանի երեկվա հայտարարություններին։ Վերջինս նշել էր, որ համաձայն չէ այն կարծիքների հետ, որ Արցախի կորցրած տարածքները պետք է վերադարձնենք պատերազմի միջոցով։

«Ես միշտ ձեռնպահ եմ մնացել կանանց մեկնաբանելուց։ Իմ դաստիարակությունն ինձ թույլ չի տվել, բայց սա էլ որերորդ անգամ մենք գործ ունենք իշխանության, խորհրդարանական ղեկավար կազմի ներկայացուցչի մակարդակով արված անիրազեկ, դիլետանտ, հայտարարությունների հետ։ Այնպիսի հայտարարություններ է արվում, որ համացանցը զվարճանում է, բայց այստեղ զվարճանալու բան չկա։ Սա ողբերգություն է, աղետ է, որ երկրի քաղաքական էլիտան կազմված է այսպիսի մարդկանցից։ Եթե մենք այսօր ունենք լրջագույն ճգնաժամ, դրա հավաքական կերպարներից մեկն էլ սույն տիկինն է»,- ասաց Զոհրաբյանը։

ԱԺ փոխնախագահը հետադիմական և վնասակար էր համարել տարբեր փորձագետների հայտարարությունները, թե մի քանի տարի խաղաղ կապրենք, կհզորանանք, կվերազինվենք և մեր բաժին հաղթանակը կունենանք։ Զոհրաբյանն էլ նշեց, որ Նազարյանը ներկայացնում է քաղաքական թիմի հավաքական կարծիքը,ըստ որի ՝ Արցախն ամենամեծ «Ճիտին պարտքն էր» և իրենք ազատվեցին Արցախից։

«Իրենք ազատվեցին իրենց համար իրական ու իրենց տերերի կարծիքով մեծագույն խնդրից՝ Արցախից։ Դա ներկայացնում է քաղաքական թիմի հավաքական տեսակետը։ Իրենք լուծեցին Արցախի խնդիրը 5000 և ավելի զինվորների կյանքի գնով, տասնյակ հազարավոր վիրավորների, կորսված Արցախի ու տեղահանվածների գնով։
Զոհրաբյանը մեկ անգամ էլ շեշտեց, որ ներկա իշխանությունները քանի դեռ երկրի ղեկին են, ամեն գնով պետք է դիմադրեն կորցրած տարածքների վերադարձի գաղափարին անգամ։ Իշխանությունն այլևս ոչինչ չի կարողանում անել։ Լենա Նազարյանը նշել էր, որ ինքը պատերազմով չի ուզում հետ բերել կորցրած տարածքները։
«Իրենց խոսքը ունի մինուս անսահմանություն արժեք։ Այն, որ իրենք կարող էին փորձ անել դիվանագիտական հարթությունում լուծել օրինակ ռազմագերիների հարցը, ինչպես ակնկալում էին շատերը, մենք պիտի լինենք օբյեկտիվ, այլևս դա էլ չեն կարողանում անել։ Ինքը երկիրը ներքաշել է լրջագույն ճգնաժամի, ատելության, միմյանց հանդեպ անհանդուրժողականության մի վակումի միջև և աշխատում է ևս մեկ օր իր իշխանությունը ձգելու համար»։

Նաիրա Զոհրաբյանը համամիտ չէ Լենա Նազարյանի այն պնդմանը, թե պետք է փորձենք մեր բոլոր հարևանների հետ երկարատև խաղաղություն պահպանել, քանի որ նրանք անգամ ներքաղաքական խաղաղություն չեն կարողանում ապահովել ։
«Եթե իրենք կարծում են, որ չլուծված ռազմագերիների ու դեռևս անթաղ դիակների խնդրով, զոհերի և վիրավորների իրական թիվը թաքցնելով, ֆեյք զինվորական ու ֆեյք զոհված ծնող հորինելով, իրենք կարողանալու են ներհայաստանյան հանդուրժողականության հասնել, ապա դա իրենց հերթական մոլորությունն է»,-եզրափակեց Զոհրաբյանը։

Աղբյուր` Փաստինֆո