Փաստ ինֆո

Մտավորականները, մշակույթի և գիտության ներկայացուցիչները հրատապ ժողով են հրավիրել՝ քննարկելու երկրում ստեղծված վիճակը։ Մշակութային գործիչ, բեմադրիչ Ռուբեն Հովհաննիսյանի խոսքով, պատերազմից հետո հայ ժողովուրդը կորցրել է հայրենիք, ունի զոհեր, իսկ այժմ էլ սկսվել է մշակութային եղեռն։

«Ֆեյսբուքյան պետություն ենք դարձել։ Չենք կարողանում հակադրվել ալիևյան հայտարարություններին։ Պետությունն ինձ համար չկա՝ պատերազմի առաջին օրերից սկսած։ Հետպատերազմյան շրջանում պախարակում են մեզ,հետագա սերունդների առաջ անեծքի տակ են դնում ու մենք շարունակում ենք լռել»։

Հովհաննիսյանի կարծիքով՝ պետք է միավորվել ու հակադրվել։ Նա ընդունում է, որ եղել է պետական ու ազգային դավաճանություն ու ժամանակն է ներքաշելու ռազմական գործիչներին՝ ամբողջական պատկերը հասկանալու համար։

«Չեն հայտարարում զոհվածների, անհետ կորածների, գերեվարվածների թիվը և որքան մարդ է զորակոչվել՝ դա պետական գաղտնի՞ք է։ Ցույց տվեք մեզ ճշմարտությունը»,- ասաց Հովհաննիսյանը։

Վերջինս կարծում է, որ ամբողջը բոլորի ցավը պետք է լինի և իրենք՝ որպես մտավորականներ ու մշակութային գործիչներ, պետք է գոնե այս պահին փրկեն ազգին այն սուտ տեղեկություններից, որոնք միտումնավոր տալիս է թշնամին։

«Ամբողջ պատմությունը հիմա խեղաթյուրված մատուցում են հայ ժողովրդին՝ օգտագործելով արհեստական բանականությունը, որին և զոհ ենք դարձել»։ Իր խոսքում Ռուբեն Հովհաննիսյանն անդրադարձավ նաև Բաքվի հաղթական շքերթին։ Նա նշեց, որ չի կարողացել հետևել դրան։

«Ինձ համար ամենացավալին հրապարակով անցնող մեքենայի համարները տեսնելն էր։ Ամեն համարի հետևում մեր հարյուրավոր զոհվածների անուն-ազգանուններն էին։ Իսկ մենք ի՞նչ ենք անում մեր բանակի համար։ Ո՞ւր է մեր կառավարությունը։ Այս ամենը մեր ցավն ու խնդիրն է»,- եզրափակեց խոսքը մշակութային գործիչը։

Աղբյուր` Փաստինֆո