Փաստ ինֆո

Ադրբեջանում լավ չեն հասկանում ամսի 9-ին ստորագրված հրադադարի համաձայնագրի բուն էությունը, որևէ սահմանափակումներ չեն կարող լինել ո՛չ քաղաքացիների, ո՛չ քաղաքացիական անձանց, ո՛չ բարձրաստիճան պաշտոնյաների ելքի և մուտքի հետ կապված: Այս մասին «Փաստինֆո»-ի հետ զրույցում ասաց «Իմ քայլը» խմբակցության պատգամավոր, ադրբեջանագետ Տաթևիկ Հայրապետյանը՝ անդրադառնալով Ալիեւի հոխորտացող հայտարարություններին։ 

Հիշեցնենք, որ Ալիևը մասնավորապես հայտարարել էր՝ «դեպի Արցախ բոլոր այցելությունները պետք է դադարեցվեն, ոչ մի օտարերկրյա քաղաքացի չի կարող մտնել այդ գոտի՝ առանց մեր թույլտվության»: Պաշտոնական Բաքվին, պարզվում է դուր չէր եկել ՀՀ արտգործնախարարի՝ Արցախի հանրապետություն կատարված այցը, որի շրջանակներում նաեւ ստորագրվել է Հայաստանի և Արցախի արտաքին գործերի նախարարությունների միջև 2021 թվականի խորհրդակցությունների պլան:

«Հայաստանի արտգործնախարար, ո՞վ ես դու, որ մեկնել ես Խանքենդի: Եթե նման քայլը կրկնվի, մեր արձագանքը շատ կոշտ կլինի։ Մենք նրանց առաջին անգամ նախազգուշացրել են ԱԳՆ-ի միջոցով. Սրանից հետո նախազգուշացումը կտրվի այլ կերպ. թող նստեն իրենց երկրում»,- ասել էր Ալիեւը։

Ադրբեջանագետ պատգամավոր Տաթևիկ Հայրապետյանը նկատում է, որ Ալիևը փորձում է էյֆորիկ տրամադրությունների վրա էլ ավելի ընդգծել իր ռազմատենչությունը և հայատյացությունը, քանի որ այն հայտարարությունները, որ Ալիևը շարունակաբար անում է, դրանք չեն բխում նոյեմբերի 9-ի համաձայնագրի բուն էությունից և չեն համապատասխանում այնտեղ առկա դրույթներին.

«Ալիևը բավականին «հմուտ» կերպով օգտագործում է Հայաստանում առկա ներքաղաքական խնդիրները և տրամադրությունները, փորձում է դրանց հիման վրա դիվիդենտներ շահել, նրա բոլոր հայտարարությունները կառուցվում են Հայաստանում առկա ներքաղաքական տրամադրությունների հիման վրա»,-ասաց պատգամավորը՝ հավելելով, որ, հաշվի առնելով հակառակորդի մտադրությունները, մենք պետք է մի կողմ դնենք քաղաքական հայացքները և վերաբերմունքը, փորձենք ուժեղ դիրքերից հանդես գալ,որովհետև ցանկացած անկայունություն էլ ավելի սանձարձակ է դարձնում Ալիևին:

Պատգամավորը որևէ հիմք չի տեսնում, որով պետք է արգելվի հայ քաղաքացիների այցը Արցախ.

«ՀՀ արտգործնախարարի այցից սկսած հայտարարություն տարածեցին, բայց մինչ այդ էլ Հայաստանի բազմաթիվ բարձրաստիճան պաշտոնյաներ այցերով գտնվել են Արցախում, ինչը որևէ ռեակցիա առաջ չէր բերել, կարծում եմ, հունվարի 11-ի հանդիպմանն ընդառաջ Ալիևը նմանատիպ հայտարարություններ է անում՝ փորձելով իր դիրքերը ամրապնդել, այդ հայտարարությունները իսկապես հիմնազուրկ են և որևէ կերպով չեն կարող կյանքի կոչվել առկա պայմանավորվածությունների շրջանակներում»,-ասաց Տաթևիկ Հայրապետյանը:
Վերջինս նաև նշեց, որ հունվարի 11-ին Մոսկվայում կայանալիք եռակողմ հանդիպումը լինելու է նոյեմբերի 10-ին ստորագրված համաձայնագրի, դրա դրույթների շուրջ, ինչպես նաև արձանագրելու՝ որոնք են մեր առաջնահերթությունները համաձայնագրի դրույթների իրագործման առումով.

«Մեզ համար որքանով էլ ցավոտ է եղել, բայց հայկական կողմը հայտարարության կետերի համաձայն հայկական կողմը իրագործել է իր ստանձնած պարտավորությունները, իսկ Ադրբեջանը շարունակում է դրանց ձգձգումը, այդ թվում՝ մեր գերիների խնդիրը, գիտակցելով, թե ինչ ազդեցություն դա ունի Հայաստանում՝ իրենք շարունակ ձգձգում են այդ թեման, ավելին՝ անհեթեթ հայտարարություններ են անում, իբրև նոյեմբեր 9-ից գերի ընկածները գերի չեն, այլ կարգավիճակ ունեն, Ադրբեջանի հերթական գործելաոճն է, ոչինչ չի փոխվել, ամեն ինչ էլ ավելի է բարդացել»,-մեզ հետ զրույցում ասաց «Իմ քայլը» խմբակցության պատգամավոր Տաթևիկ Հայրապետյանը.

Պատգամավորը նաև արձանագրում է՝ Ադրբեջանը ակնհայտ ցույց է տալիս, որ ինքը միտված չէ երկարատև խաղաղության, ինչի մասին շարունակ խոսում էր

«Ալիևը փորձում է ցույց տալ, որ Արցախի հարց այլևս գոյություն չունի, մինչդեռ Արցախյան հարցը առկա է այնքանով, որքանով լուծված չէ Արցախի կարգավիճակի հարցը, որը հետագա բանակցությունների առարկա է, հենց սրանից ելնելով էլ Ալիևը փորձում է սահմանափակումների մասին հայտարարություններ անել»,-ասաց Տաթևիկ Հայրապետյանը:

Աղբյուր` Փաստինֆո