Փաստ ինֆո

Այսօր իշխանության են տարիներ շարունակ պետական պարտքի մասին աղաղակող ուժերը, որոնք այդ պարտքը հիմա երկրաչափական պրոգրեսիայով  են ավելացնում՝ այն հասցնելով արդեն 9 միլիարդի, որը փորձագիտական գնահատականով գերազանցում է կառավարելի սահմանը։  Ընդ որում, պարզվում է բյուջեն իսպառ դատարկել է    նիկոլական կառավարությունը և կենսաթոշակներ, աշխատավարձեր վճարելու համար Արժույթի միջազգային հիմնադրամից է վարկ  վերցնում։  

Բնականաբար, այս համատեքստում կենսաթոշակները չնչին տոկոս են կազմում և առյուծի բաժինն ընկնում է մերձիշխանական ուժերի հսկայական  աշխատավարձերին ու  պարգևավճարներին, որոնք չնչին իսկ  կապ չունեն պատերազմական ու  հետպատերազմական բազմախնդիր իրականության  հետ և տարեցտարի շարունակում են ավելանալ։

Մենք ապրում ենք մի իրականության մեջ, որը ոչ միայն հսկայական մարդկային ռեսուրսների, երիտասարդ կյանքերի  կորուստներով է լի, նրանց մի զգալի մասը հաշմանդամ է դարձել, բազմաթիվ ընտանիքներ զրկվել են իրենց միակ աշխատողից, շատերը տունուտեղ, ապրուստի միջոց են կորցրել, սակայն իշխանության համար առաջնահերթությունը շարունակում է լինել և մնալ նեղ կուսակցական, թայֆայական շահը, իմքայլականների և փաշինյանական կառավարության անդամների պարգևավճարները։

Բնականաբար, պատահական չէ, որ դեռ պատերազմական օրերին, երբ աշխարհի հայությունը «Հայաստան» հիմնադրամին հսկայական հանգանակություններ էր կատարում, Փաշինյանն ու իր թայֆան մտածում էին այդ գումարները կառավարություն ուղղորդելու մասին։  Արդեն իսկ հայտնի է, որ այդ համատեքստում նրանք կանգ չեն առել ո՛չ օրենքների շրջանցման, ո՛չ էլ՝ փաստաթղթեր կեղծելու  և անհետացնելու վրա։ Նպատակը մեկն է եղել՝ թույլ չտալ, որ հիմնադրամի միջոցները նպատակային, այսինքն ի շահ և ի նպաստ Արցախի և արցախցիների, հայ զինվորների ծախսվեն։

Փոխարենը, այսօր շատերն են բարձրաձայնում՝ «Հայաստան» համահայկական հիմնադրամի գումարների մի մասը բաժանվել է Նիկոլ Փաշինյանի համախոհներին՝ ԱԺ պատգամավորներին, Ոստիկանությանը, ԱԱԾ-ին և կառավարության աշխատողներին, որ նրանք շարունակեն սատարել Փաշինյանին։

Մասնավորաբար, ոստիկանությանը։ Բնականաբար, դեռ անցյալ տարվանից Փաշինյանի «նոր որակի ոստիկանություն» ստեղծելու մտասևեռումը պատահական չէր։ Հավանաբար, շատերն են հիշում, թե ինչպես էին այդ ոստիկանները դիմակ չկրող մեր քաղաքացիներին ասֆալտին փռում ու «պակազուխա» այլ ակցիաներ իրականացնում։

Թերևս, շատերը կհիշեն, որ կապիտուլյացիոն պայմանագրի ստորագրման օրվան հաջորդող կառավարության առաջին հարցուպատասխանի ժամանակ ներկաներն ու հանրությունը որքան զարմացան իմքայլական պատգամավոր Արմեն Խաչատրյանի՝ Փաշինյանին ուղղված  հարցի վրա, որով վերջինս ուզում էր ճշտել ոստիկանության աշխատավարձերի բարձրացման հարցը շարունա՞կում է օրախնդիր լինել Փաշինյանի իշխանության համար։ Այսինքն, պարտված, կապիտուլյացիայի պայմանագիր ստորագրած իշխանությունը ոստիկանությանը շարունակելու՞ է կաշառել։

Ըստ ամենայնի՝ պայմանավորված հարցմանը տրվեց կոնկրետ պատասխան, որով ոստիկանությանը երաշխիք ստացավ, որ Փաշինյանը նրանց շարունակելու է օգտագործել որպես վահան՝ ՀՀ քաղաքացիների դեմ պայքարում։

Այն, ինչ այսօր տեսնում ենք մենք։

Ստացվում է, որ կառավարությունը միջազգային կառույցից բյուջետային վարկ է վերցնում, որ  պարգևավճար կարողանա տալ։ Այսինքն, պետական պարտքը ավելացնում է, որ օրինակ, ոստիկանությանը պարգևատրի,  մնացած ուժայիններին ֆինանսավորի՝ վարչապետի աթոռին մնալու համար։ 

Նիկոլ Փաշինյանը դավաճանաբար հանձնեց Արցախը, հիմա՝  մաս-մաս վաճառում է Հայաստանը, ՀՀ սահմանային բարձունքները նվիրելով թշնամուն, մյուս կողմից էլ՝հասկանալով, որ իր դավաճանական, հակահայ գործունեության համար անպատիժ չի կարող մնալ, սիրաշահում ու կաշառում է իր համախոհներին և ուժայիններին՝ այդպիսով ապահովելով իր անվտանգությունը։ Փաստորեն, այս մարդը իր իշխանության ողջ ընթացքում վայրկյան իսկ չի մտածել պետության, ՀՀ քաղաքացիների անվտանգության մասին, իր միակ մտածմունքը սեփական հետույքը պահելն է։ 

Իսկ պետական ինստիտուտները մեծ հաշվով, անգործության են մատնված, տնտեսական քաղաքականությունը  Ադրբեջանի հետ բիզնես ծրագրերի մասին երազանքից այն կողմ չի գնում, մինչդեռ, արդեն իսկ պարզ է՝ 2020-ի համար ունենք տնտեսական ակտիվության ցուցանիշի անկում, որը մոտավորապես  7.5-8  տոկոսի տիրույթում է։

Բնականաբար, կառավարչական հմտությունների, պրոֆեսիոնալիզմի մասին խոսք լինել չի կարող, մենք գործ ունենք բացառապես հարկերի ու վարկերի, կորոնավիրուսի համար ստացվող գումարների, հումանիտար օգնությունների և նույնիսկ՝ «Հայաստան» հիմնադրամի հաշվին ապրող իշխանությունների հետ։ Այդպիսին են եղել 90-ականներին նրանց հայրերը, հիմա նրանք նույն կերպ են։

Առևտրաշրջանառություն, ծառայությունների ոլորտ, շինարարություն՝ սրանք ոլորտներ են, որ 2020-ին  զգալի չափով են կրճատվել և գտնվում են անկումնային վիճակում։  

Մասնագիտական գնահատականներով աղքատության ցուցանիշի աճ է սպասվում և հացի խնդիր, ինչը Հայաստանի համար հաղթահարելն իսկ դժվար է լինելու, մանավանդ, Արցախում արդյունաբերական և գյուղատնտեսական կարևոր բնագծեր Փաշինյանի ձեռքով հանձնվեցին թշնամուն։

Ի հավելումն, նիկոլական իշխանությունը, որ ՀՀ քաղաքացու գրպանը մտնելուց և նորանոր հարկեր ու տուրքեր մոգոնելուց զատ այլ բան չի կարող /ներդրումները Փաշինյանի օրոք սառույցին են գրված մեկընդմիշտ/՝ քան, ասենք,   ավելացված արժեքի հարկի կիրառումը՝  առողջապահության և կրթության ոլորտների վրա, որոնք մինչ այժմ ազատված էին այդ հարկատեսակից։ Այդպիսով, արդեն իսկ թանկ առողջապահական ծառայությունները կթանկանան  20 տոկոսով և՛ պետական, և՛ մասնավոր հաստատություններում։ Նույն կերպ՝ կթանկանա ուսման վարձը՝ պետական և մասնավոր բուհերում։ Ի հավելումն, ԱԱՀ է կիրառվելու նաև մինչ այժմ ԱԱՀ-ից ազատված գյուղացիների նկատմամբ, ինչը նշանակում է՝ գյուղացին էլ պիտի իր ապրանքը թանկացնի։

Ասել է, թե՝ 2021 տնտեսական տարին Հայաստանի համար  կատաստրոֆիկ է լինելու։

Մ․ Մինասյան

Աղբյուր` Փաստինֆո