Փաստ ինֆո

Կասկած չկա, որ ոչ միայն գործ են հարուցելու, այլև՝ արգելված, անմարդկային վերաբերմունքի բոլոր ձևերը կիրառելու են այդ անձի նկատմամբ։ Ավելին՝ մենք այդպես էլ չենք իմանա՝ իրականում իսկապես նա նախկինում ունեցել է նման շփումներ, նման վերաբերմունք՝ ադրբեջանական ռազմագերիների նկատմամբ։ Այս մասին «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը։

Ավելի վաղ տեղեկացրել ենք՝ Բաքվի ռազմական դատարանի որոշմամբ կալանավորվել է ՀՀ քաղաքացի Լյուդվիգ Մկրտչյանը։ Նա գերի է ընկել ղարաբաղյան երկրորդ պատերազմի ընթացքում ու հիմա նրան ադրբեջանցիները մեղադրում են 25-30 տարի առաջ ադրբեջանցի գերիների նկատմամբ բռնություն գործադրելու մեջ։
Լարիսա Ալավերդյանը «Փաստինֆո»-ի հետ զրույցում նշեց, որ այժմ փորձում է տեղեկություններ ստանալ Մկրտչյանի վերաբերյալ, հասկանալ՝ արդյոք նա պաշտոնատար անձ է եղել, եթե նման վերաբերմունք է դրսևորվել է, թե մասնավոր անձ է։

Ալավերդյանն ընդգծեց, որ տարիներ շարունակ ամենատարբեր ձևերով պնդում էին, որ հայկական կողմը պետք է այդպիսի գործողություններ սկսի այն մարդկանց նկատմամբ, որոնք նման անմարդկային, դաժան վերաբերմունք են ցուցաբերել հայ գերիների կամ պատանդների նկատմամբ։

«Ընդհուպ՝ մինչև Մարաղայի դեպքերով, հստակ գիտենք, որ այդ խմբի ղեկավարը, որն այդտեղ ցեղասպանական գործողություններ է իրականացրել, սպանել են ամենաանմարդկային ձևերով, ողջ մարդկանց նկատմամբ սարսափելի գործողություններ են իրականացրել, Ադրբեջանի առաջին հերոսի կոչումն է ստացել՝ 1992թ ապրիլ ամսվա գործողությունների համար և հիմա այդ անձը գտնվում է Շվեդիայում, ապրում է որպես քաղաքական էմիգրանտ։ Որևէ իշխանության ժամանակ հայկական կողմը չհասավ դրան, այնինչ Ադրբեջանը դա անում է և հայտնի չէ՝ կեղծ, թե իրական հիմքերով»,- նշեց Ալավերդյանը։

Ալավերդյանը մտահոգություն հայտնեց առ այն, որ հայկական կողմը տարիներ շարունակ այդ հարցում պասիվություն է դրսևորել, քայլեր չեն արել՝ սկսելու հետապնդումները՝ մինչև անգամ Ինտերպոլի միջոցով՝ հաշվի առնելով նաև Ադրբեջանի կողմից պետական մակարդակով հայատյացության քարոզչությունը, գլխատման, անմարդկային վերաբերմունքի դեպքերը, Արցախյան պատերազմում՝ յուրաքանչյուր գլխատված հայի համար հավելյալ գումար առաջարկելը։

«Ինձ դա է մտահոգում։ Հայկական կողմն ինչպես եղել, այնպես էլ մնում է հանցագործ պասիվության մեջ։ Դա կոչվում է անգործությամբ մարդու իրավունքների ոտնահարում»,- նշեց Ալավերդյանը։

Ալավերդյանն ընդգծեց, որ Ադրբեջանը որևէ անգամ չի ցուցաբերել հարգանք՝ լինի միջազգային մարդասիրական իրավունքի նորմերի հանդեպ, լինի՝ ընդհանրապես միջազգային իրավունքի, հակառակը՝ Ադրբեջանը միշտ հակադրվել է և օգտագործել է այդ նորմերը՝ հակաիրավական գործողություններ իրականացնելու համար։

«Այստեղ երկու կարծիք լինել չի կարող։ Գործ ունենք հայկական կողմի հանցագործ անտարբերության հետ և այդ առումով Ադրբեջանն իրականացնում է իր հայատյաց, ռասիստական իր բնույթով գործողությունները և չարամտորեն օգտագործում է միջազգային նորմերն այն ժամանակ, երբ իրեն պետք է իրականացնել այդ հակամարդկային նպատակները»,- նշեց Ալավերդյանը։

Ինչ վերաբերում է գերիների փոխանակմանը և բոլորը բոլորի դիմաց սկզբունքին, Ալավերդյանն արձանագրեց, որ դա չի լինելու, Ադրբեջանը սկսելու է ամենաարգելված ձևերով անել ամենը, լինի դա՝ մարդկանց առևտուրը, լինի՝ ամենատարբեր ձևերով օգտագործելը, անունը դնել բոլորը բոլորի դիմաց։

«Հիմա 62-63 հաստատված գերի են վերցրել Խծաբերդի, Հին Թաղերի տարածքում, որևէ տեղեկություն կա՞, որ նա պատրաստ է ներկայացնել։ ՄԻԵԴ-ն արդեն իսկ պահանջել է, ինչ եք կարծում՝ Ադրբեջանը պատրաստվում է դա արագ իրականացնել՝ ոչ։ Ադրբեջանն իրեն բնութագրել է որպես ցանկացած միջազգային կամ երկկողմանի, բազմակողմանի պայմանագրերի խախտող։ Չգիտեմ ինչ պատրանք ենք այսօր ուզում ստեղծել, որ Ադրբեջանի հետ կարելի է կնքել որևէ պայմանագիր կամ պայմանավորվածություն ունենալ և նա դա կիրականացնի։ Ոչ, չի իրականացնելու։ Նա ունի մեկ նպատակ՝ ցեղասպանական բոլոր ձևերով փորձելու է ամբողջովին հայաթափ անել ամբողջ տարածաշրջանը և ամբողջ աշխարհում տապալել հայության նկարագիրը »,- նշեց Ալավերդյանը՝ հիշեցնելով, որ հենց դրա համար է ստեղծվել Ադրբեջան պետությունը և, եթե չնայենք արմատը, փորձենք անցնել միայն վերևի շերտերով, միշտ անհաջողություններ ենք ունենալու։

Հեղինակ՝ Իզաբել Սահակյան

Աղբյուր` Փաստինֆո