Փաստ ինֆո

Գորիսի քաղաքապետ Առուշ Առուշանյանին այս պահին տեղափոխում են Երևան՝ Քննչական կոմիտեի կենտրոնական մասնաշենք։ Այս մասին «Փաստինֆո»-ի հետ զրույցում ասաց փաստաբան Արմեն Մելքոնյանը։

Փաստաբանն այս պահին Առուշանյանի կարգավիճակի, հարուցված քրեական գործի վերաբերյալ որևէ տեղեկություն չունի։

Նրա խոսքով՝ որևէ իրավական փաստաթուղթ չի ներկայացվել, կարգավիճակի մասին ոչինչ չեն հայտնել, բայց տևական ժամանակ է անձն անհետացել է։

«Ասում են՝ հարուցվել է քրեական գործ, չեն մատնանշում ոչ հոդված, ոչ էլ, թե ինչ դեպքի առթիվ է հարուցված քրեական գործը, ինչ կասկածանքի շուրջ է ձերբակալվել Առուշանյանը։ Միանշանակ՝ ձերբակալումը ոչ իրավաչափ է, ապօրինի է»,- նշեց փաստաբանը։

Հիշեցնենք, որ Առուշանյանը բերման է ենթարկվել այսօր վաղ առավոտյան։ Ոստիկանությունը «Փաստինֆո»-ին հայտնել էր, թե քաղաքապետը բերման է ենթարկվել քրեական գործի շրջանակներում ու ներկայացվել նախաքննական մարմնին, մինչդեռ ՔԿ-ից «Փաստինֆո»-ին ասել էին, որ քրեական գործը դեռ չեն ստացել։ Եթե քրգործը դեռ ՔԿ վարույթում չէ, հետեւապես անձը չէր կարող քննիչի հանձնարարությամբ բերման ենթարկվել ու նախաքննական մարմնին ներկայացվել։

Նրա բերման ենթարկելուց անցել է նվազագույնը 6-7 ժամ ու այս ընթացքում նա ազատ չի արձակվել, իսկ ՀՀ քրեական դատավարության օրենսգրքի համաձայն անձը կարող է բերման ենթարկվածի կարգավիճակում մնալ առավելագույնը 3 ժամ։

Փաստաբանի մոտ տպավորություն էր, թե Առուշանյանին առևանգել են, ավելին՝ չէր բացառել, որ գուցե հանձնել են արդեն Ադրբեջանի իշխանություններին, որովհետև Առուշանյանն այն անձանցից է, որ պատերազմի առաջին օրվանից առ այսօր հայրենիք է պաշտպանել, մինչև երեկ քնել է խրամատներում։ Ա.Մելքոնյանի փոխանցմամբ՝ բացի Առուշանյանի պաշտպանը լինելուց, նրա հետ տևական ժամանակ միասին են հայրենիքը պաշտպանել։

Նշենք, որ Առուշ Առուշանյանը որպես կամավորական մասնակցել է հայրենիքի սահմանների պաշտպանությանը ու դեմ է եղել Սյունիքի բարձունքները թշնամուն հանձնելու Նիկոլ Փաշինյանի որոշմանը, քանի որ այն վտանգում է սյունեցիների անվտանգությունը: Օրեր շարունակ Սյունիքում տեղի են ունեցել բողոքի ակցիաներ, բայց դիրքերն այդուհանդերձ հանձնվեցին ու արդեն ապահով չէ Գորիս-Դավիթ Բեկ, Գորիս- Կապան ավտոճանապարհներով երթեւեկությունը: Գորիսի համայնքապետը լավ «ընդունելություն» էր խոստացել Նիկոլ Փաշինյանին:

Այսօր վաղ առավոտյան Նիկոլ Փաշինյանը ուղեւորվել է Սյունիք`իբր սյունեցիների հետ հանդիպման, սակայն նախքան իր մեկնելը մի քանի հազար ոստիկան է ուղարկել Սյունիք` իր մուտքը մարզի տարածք ապահովելու համար: Սյունեցիները դարպասների մոտ փակել է ճանապարհը՝ պնդելով, որ Նիկոլ Փաշինյանը մուտք չի կարող գործել Սյունիք։

Նիկոլ Փաշինյանը Սյունիք է մտել ուղղաթիռով, հանդիպել միայն Սիսիանում մի քանի տասնյակ մարդու հետ ու հեռացել։ Հանդիպմանը ներկա չի եղել նաեւ Սիսիանի քաղաքապետը. Նա ի թիվս այլ սյունեցիների եղել է Գորիս-Տաթեւ ճանապարհին՝ Նիկոլ Փաշինյանի մուտքը մարզի տարածք արգելելու համար։

Հեղինակ՝ Իզաբել Սահակյան

Աղբյուր` Փաստինֆո