Փաստ ինֆո

Էջմիածնում գտնվող զորամասի անհետ կորած համարվող զինվորներից մեկը դեկտեմբերի 14-ին վերադարձել է Հայաստան։ Այս մասին ՊՆ-ի դիմաց տեղի ունեցած ակցիայի ժամանակ ասել է անհետ կորած զինծառայողների հարազատներից Անահիտ Ադոյանը:

«Ունենք մեկ տղա, որը վերադարձել է, կփորձենք կապ հաստատել նրա հետ: Շատ ուրախ ենք, որ գոնե մեկը վերադարձել է Հայաստան, բայց պետք է պայքարենք մնացած 40-ի համար: Նա նույն զորամասի ՄՈԲ-ից էր»,- նշել է նա Ադոյանը:

Մեկ ուրիշ զինծառայողի մայրն էլ  հայտարարել է, որ զինվորները գերի են ընկել հրամանատարի պատճառով. «հոկտեմբերի 20-ին հրամանատարը քնից հանել է երեխեքին, անպատրաստ, անզեն, լցրել ավտոբուսն ու քշել Զանգելան. Ճանպարհին երեք հայկական պոստերին կանգնեցրել են, հարցրել են՝ ուր ես տանում, ասել է՝ ավազի բլուրի մոտ, բայց 7 կմ էլ այդտեղից անցել է, տարել հանձնել թուրքին, ինքը խիղճը հանգիստ եկել»։

Նրա փոխանցմամբ՝ այսօր մեկը մյուսի վրա են գցում, ասում են՝ վրիպում է եղել, շփոթել են ճանապարհը: «40 երեխու դու տվել ես ուղեւորի ձե՞ռքը: Դու ուզում ես ջրից չոր դուրս գալ, չես կարող: Ես կոչ եմ անում բռնել ու դատել նրան, կամ տվեք մեր ձեռքը, մենք դատենք»,- նշել է զինվորի ծնողն ու ավելացրել, որ հրամանատարը Արսեն Աբգարյանն է, որը մինչեւ այսօր պատասխանատվության  չի ենթարկվել։

Կնոջ խոսքերով՝ այդ խմբի տղաները չպետք է մասնակցեին մարտական գործողություններին, նրանք քիմիկներ են ու որոնողական աշխատանքի պետք է գնային՝ Կապան, Մեղրի: Մի օր դիակ են հավաքել, մի օր ականապատել են:

«Հետ էիր եկել, վերցնեիր 200 հոգու, գնայիր քո տղերքի հետեւից, տեսնեիր՝ որը որտեղ զոհվեց, որին տարան գերի: Քեզ հետաքրքիր չի եղե՞լ երեխեքի ճակատագիրը»,-ընդգծել է զինծառայողի մայրը:

Աղբյուր` Փաստինֆո