Փաստ ինֆո

«Նիկոլ Փաշինյանը ոչ մի կերպ հեռանալու մտքի հետ չի հաշտվում, որովհետև շատ լավ գիտի՝ Հայաստանի Հանրապետության, Արցախի և հայության նկատմամբ ինքը ոչ թե մեկ կամ մի քանի, այլ բազմաթիվ ծանրագույն քրեական հանցագործություններ է իրականացրել, որի հետևանքներն իր համար չափազանց ծանր են լինելու, - «Փաստինֆո»-ի հետ զրույցում ասել է Արցախի Հանրապետության Մարդու իրավունքների նախկին պաշտպան, իրավապաշտպան Ռուբեն Մելիքյանը:

Ըստ նրա` այդ հանցագործությունների մի մասը հասարակական լայն զանգվածներին արդեն իսկ հասանելի են: «Միայն այդքանն արդեն բավարար է՝ մոտավոր պատկերացում կազմելու, թե մարդկային ինչպիսի որակի հետ մենք գործ ունենք, էլ չեմ խոսում երկրի ղեկավարին հատուկ վարքի մասին, որովհետև, ըստ էության, նա երկիր չի ղեկավարել, այլ պարզապես և ուղղակիորեն Հայաստանի Հանրապետության տարածքում սպասարկել է օտարերկրյա գործակալական ցանցի շահերը», - նշել է Ռ.Մելիքյանը:

Իրավապաշտպանն ընդգծում է՝ վերջին երկուսուկես տարիների և, մասնավորապես, արցախյան վերջին պատերազմի ընթացքում Հայաստանի Հանրապետության և հայ ժողովրդի նկատմամբ Նիկոլ Փաշինյանի գործած սարսափելի հանցանքների ողջ համապատկերը պարզ կդառնա այն ժամանակ, երբ նա օրենքով նախատեսված կարգով պատասխանատվության կենթարկվի դրանց համար. «Մինչ այս պահը մենք փաստացի գիտենք այն, ինչ վերջերս մամուլի ասուլիսի ընթացքում բարձրաձայնեց գեներալ – գնդապետ Մովսես Հակոբյանը: Նորից եմ կրկնում, միայն այսքանն էլ բավական պետք է լիներ, որպեսզի այդ անձը խստագույն քրեական պատասխանատվության ենթարկվեր, բայց, վստահ եմ, նրա հանցանքների ողջ ծավալին մենք դեռ առիթ կունենաք ծանոթանալու առաջիկայում: Այնպես, որ պատասխանելով հարցին՝ ինչո՞ւ այդ մարդը ոչ մի կերպ չի հեռանում իշխանության ղեկից, պետք է ասեմ՝ նա պարզապես սարսափում է իրեն սպասվելիք, միաժամանակ, հայ ժողովրդի նկատմամբ որևէ իշխանությունների կողմից երբեւէ իրականացված ամենածանր հանցագործությունների համար պատասխանատվության բեռից»:

Անդրադառնալով Փաշինյանի կողմից վարչապետի աթոռին մնալու մեկ այլ և ոչ պակաս վտանգավոր թեզին, ըստ որի, վերջինս տարածքային զիջումների գաղտնի պայմանավորվածություն ունի ադրբեջանական կողմի հետ, որի արդյունքում, այսօր արդեն իրական վտանգի տակ է հայտնվել Հայաստանի Հանրապետության հարավային սահմանը, մասնավորապես՝ Սյունիքը, Ռուբեն Մելիքյանը պատասխանում է՝ այդ վտանգն ակնառու և իրական է.«Մեր երկիրն այս պահին ղեկավարող անձի պարագայում, բոլորովին չեմ բացառում, որ օրակարգում դրված է նաև այդ հարցը՝ այլ երկրների ղեկավարներին հանձնելու Հայաստանի Հանրապետության սահմաններում գտնվող այլ տարածքներ ևս: Այդ մասին արդեն այսօր բացահայտ կերպով խոսում էր Ադրբեջանի նախագահը՝ հավակնոտ պահանջներ ներկայացնելով Սյունիքի, Սևանի և մինչև անգամ մայրաքաղաք Երևանի նկատմամբ`հայտարարելով, թե դրանք նույնպես պատմական ադրբեջանական հողեր են, որոնք պետք է այս կամ այն ձևով վերադարձվեն Ադրբեջանին: Այսպիսի պայմաններում, ես վստահ պնդում եմ, որ մենք գործ ունենք մի այնպիսի իրավիճակի հետ, որը շատ նման է ազգային ազատագրական պայքարի տրամաբանությանը:

Արդեն կասկած չի հարուցում, որ մեր երկիրը ղեկավարում է օտարերկրյա գործակալական ցանցի, այլ կերպ ասած՝ թշնամու շահերը սպասարկող անձնավորություն, որի հեռացումն ու օրենքով նախատեսված կարգով պատասխանատվության ենթարկելու խնդիրը օրակարգային հարց է դարձել մեր պետության և պետականության լինելիության համար»,- եզրափակում է զրույցը իրավապաշտպան Ռուբեն Մելիքյանը:

Հեղինակ՝ Նվարդ Մանվելյան

Աղբյուր` Փաստինֆո