Փաստ ինֆո

Այսօր Ամենայն Հայոց Կաթողիկոսը և Մեծի Տանն Կիլիկիո հայրապետը միացել են վարչապետի հրաժարականը պահանջողներին։ Ինձ համար տարօրինակը միայն բուն հրաժարականի պահանջը չէ, որն ամբողջությամբ քաղաքական է։ Տարօրինակը հոգևոր առաջնորդների կողմից կոչ անելու համար ընտրված օրն է։ ԱԺ-ում այս մասին ասաց պատգամավոր Արման Բաբաջանյանը։

Պատգամավորը նկատեց՝ հոգևոր առաջնորդները կոչ անելու համար ընտրել են այն օրը, երբ հրապարակում հավաքված քաղաքական ուժերը հրաժարականի վերջնագիր ներկայացրեցին վարչապետին․ «Կարելի էր այդ հրաժարականը պահանջել կիրակի օրը, նախօրեին, անցյալ շաբաթ օրը կամ վաղը, բայց մեր եկեղեցու երկու պետերը որոշեցին իրենց պահանջը միացնել հրաժարականի պահանջ ներկայացրած քաղաքական ուժերին՝ ավելի սրելու իրավիճակը, չմտածելով դրա հետևանքների մասին։ Ի՞նչ պետք է աներ եկեղեցին, ի՞նչ պետք է անեին հայրապետները։

Պետք է ոչ թե միանային հրաժարական պահանջողներին կամ դրա հակառակորդներին, այլ հաշտության և համերաշխության օրակարգ պետք է բերեին հրապարակ։ Եկեղեցին իր դրոշը պետք է բարձրացներ՝ պահանջելով վայր իջեցնել բոլոր կուսակցությունների դրոշները և պետք է անհապաղ սկսեր ներհասարակական հաշտեցման գործընթացը»,-ասաց Արման Բաբաջանյանը՝ նշելով, որ եկեղեցին հոկտեմբերի 27-ից, 2004թ․-ի ապրիլի 13-ից, մարտի 1-ից հետո ոչ մեկի հրաժարականը չպահանջեց։ Պատգամավորի խոսքով եկեղեցին այդ ժամանակ կանգնեց մեր պետականության ողնաշարը ջախջախող պետական այրերի կողքին։

«Այն, որ այս իշխանությունը պետք է հրաժարական տա, երկու կարծիք չի կարող լինել։ Այն, որ դա պետք է լինի օրենքի տառին համապատասխան, այստեղ ևս որևէ մեկն անհամաձայն չէ։ Այն, որ բոլոր քաղաքական սուբյեկտներին պետք է հնարավորություն տրվի առաջիկա արտահերթ խորհրդարանական ընտրություններին մասնակցել, դա էլ քննարկման հարց չէ, բայց վստահ եմ, որ ընտրություններից առաջ չափազանց կարևոր են մի քանի հիմնարար բարեփոխումներ»,-ասաց Արման Բաբաջանյանը։

Մանրամասները՝ տեսանյութում

Աղբյուր` Փաստինֆո