Փաստ ինֆո

Սյունիքի մարզի Տեղ գյուղի ուղղությամբ տեղակայված դիրքերին ադրբեջանցիներ են մոտեցել։ 

«Փաստինֆո»-ի հետ զրույցում Տեղ համայնքի ղեկավար Ներսես Շադունցը նշեց, որ սահմանների ճշգրտում է եղել, ադրբեջանցիները մոտեցել են, խոսել և հետո գնացել են. «Մենք մեր բարձունքում կանգնած ենք եղել, իրենք էլ քարտեզով մոտեցել են, մեր հրամանատարն իջել և նրանց հետ խոսել է։ Ասել են՝ իրենք էլ գան այդ գծի վրա կանգնեն, ասել ենք՝ չի լինի։ Արավուսի վարչական շրջանի ղեկավարը մեր ջոկատի հրամանատարն է, նա է ադրբեջաներենով բանակցություններ վարել։ Այնպես չէ, որ լարվածություն է առաջացել»,-ասաց Ներսես Շադունցը։

Հարցին՝ արդյոք ադրբեջանցիների գալուց հետո սահմանի հետ կապված փոփոխություն եղել է, Ներսես Շադունցն ասաց. «Նրանց գալուց հետո սահմանի հետ կապված փոփոխություն չի եղել, չի էլ կարող լինել։ Մենք մեր պոստերում որտեղ կանգնած ենք, այնտեղ էլ կանգնելու ենք, տեղներիցս իրար չենք գա։ Հիմա մենք կանգնած ենք, իրանք էլ պետք է գան կանգնեն, մեր դիմացը, կողքը թե որտեղ կկանգնեն չգիտեմ, բայց մենք մեր դիրքերից իրավունք չունենք շարժվել»,-ասաց համայնքապետը։

Անդրադառնալով փաստաթղթի ստորագրումից հետո գյուղացիների տրամադրություններին և մտահոգություններին, Ներսես Շադունցը նկատեց՝ սահմանի կամ թուրքի գալ-չգալու հետ կապված խուճապ չկա, քանի որ յուրաքանչյուրն իր տեղում է կանգնում. «Գյուղացիները Ջաբրայիլում 50-60 հազար գլուխ ոչխար են պահել։ Պատկերացնո՞ւմ եք այդ 60 հազար գլուխ անասունը հիմա հետ է եկել Տեղ համայնք։ Արոտավայրեր չունենք այս պահին, շատերն էլ առիթից օգտվելով էժան գնով գալիս խաբում են ժողովրդին, անասունները։ Ժողովուրդը մենակ դրանից կարող է մի քիչ ընկճված լինի»,-նշեց համայնքապետը։

Վերջինս նշեց, որ գյուղատնտեսական աշխատանքով զբաղվելու համար արդեն ուրիշ մոդել պետք է ընտրեն։ Հիմա պետք է փոխեն, բազմավեկտոր գյուղատնտեսություն վարեն. «Փոքր տարածքի վրա մեծ արդյունավետությամբ գյուղատնտեսություն վարենք։ Մենք նախկին սիստեմով էինք անում, հիմա ազգովի պետք է գիտնական դառնանք, գյուղատնտես, բժիշկ դառնանք, զինվորական դառնանք։ Մեր երկիրը մեզանից լավ ոչ ոք չի պահելու»,-ամփոփեց Ներսես Շադունցը։

Աղբյուր` Փաստինֆո