Փաստ ինֆո

«Ազգային օրակարգ» կուսակցության անդամները ՀՀ գլխավոր դատախազության դիմաց բողոքի ակցիա են իրականացնում։ Նրանք պահանջում են հետապնդել կապիտուլյացիա ստորագրած և հայրենիքի տարածքները հանձնած վարչապետին։

«Ազգային օրակարգ» կուսակցության նախագահ Արա Հակոբյանը նշեց, որ պետք է հասկանանք, թե ինչ վիճակում ենք գտնվում. «Մենք պարտվել ենք պատերազմում, ունեցել ծանր կորուստներ, կորցրել մեր հայրենիքի մի մասը։

Այս ամեն ինչն իրականացվել է Հայաստանում գործող վարչապետի և նրա իշխանախմբի պատճառով, նրանց մասնակցությամբ։ Այս պարագայում ունենք իրավիճակ, որ ՀՀ դատախազությունը պետք է մի շարք գործեր հարուցեր այդ հարցերի կապակցությամբ, պետք է քրեական հետապնդումներ սկսեր, որպեսզի պարզաբանվեր, թե ինչպես եղավ, որ այս պատերազմում անպատրաստ էին, ինչպես եղավ, որ մեր ունեցած զենքերը չկրակեցին, մեր գեներալները, որոնք պետք է մասնակցեին պատերազմի կառավարմանը, բունկերներից դուրս մղվեցին, իսկ այդ բունկերներում հայտնվեցին մարդիկ, որոնք այդտեղ չպետք է լինեն։

Ո՞վ պետք է այդ գործերը հարուցի. ՀՀ դատախազությունը, ինչի փոխարեն դատախազությունը շարունակում է սպասարկել տապալված վարչախմբի շահերը, տապալված վարչապետին»,-նշեց Արա Հակոբյանը։

Նա հավելեց, որ «Ազգային օրակարգ» կուսակցությունը պատրաստում է նաև դիմում, որով որպես ընդդիմադիր ուժ դիմելու է դատախազությանը։ Վերջինս նշեց, որ հույս ունեն՝ դատախազության այն հատվածը, որը պետությանը ծառայելու միտում ունեն, իսկապես կծառայեն պետությանը, այլ ոչ թե վարչախմբին։

Արա Հակոբյանն ընդգծեց, որ այսօր Հայաստանում փաստացի իշխանություն չկա, և վտանգված է Հայաստանի պետականությունը. «Հայաստանն այնպիսի վիճակում է, որ Հայաստանի մասին որոշումներ են ընդունում տարբեր պետություններ, այդ թվում մեր թշնամի պետությունները, և այդ որոշումներին Հայաստանը չի մասնակցում»,-նշեց Արա Հակոբյանը՝ հավելելով, որ պայքարի են դուրս եկել, որպեսզի վերականգնեն իշխանությունը Հայաստանում։

Աղբյուր` Փաստինֆո